1 Samuel 1:1-28
1 Bisi siku lelaki ari Ramataim-zofim* ba kawasan ke begunung ba Efraim. Nama iya Elkanah. Iya orang Efraim. Iya anak Jeroham. Jeroham nya anak Elihu. Elihu nya anak Tohu, lalu Tohu nya anak Zup.
2 Elkanah bisi dua iku bini, iya nya Hanah enggau Peninah. Peninah bisi anak, tang Hanah nadai anak.
3 Tiap taun, Elkanah mupuk ari kuta iya ngagai Siloh deka nyembah* Petara sereta nyerahka pemeri ngagai Jehovah, ketuai soldadu serega. Ba dia meh dua iku anak lelaki Eli, iya nya Hopni enggau Pinehas, gawa ke Jehovah nyadi imam.
4 Bisi sekali, lebuh Elkanah nyerahka pemeri, iya meri sekeda ari pemeri nya ngagai bini iya Peninah enggau ngagai semua bala anak lelaki enggau bala anak indu seduai iya.
5 Tang, Elkanah meri siti begian ti istimewa ngagai Hanah, laban iya amat sayauka Hanah taja pan Jehovah nadai meri Hanah anak.
6 Ketegal Jehovah nadai meri Hanah anak, madu iya Peninah enda ngetu-ngetu ngeleseka iya ketegal deka ngemediska ati iya.
7 Nya meh utai ke digaga Peninah tiap taun. Tiap kali Hanah ngagai rumah Jehovah, Peninah balat ngeleseka iya sampai iya nyabak sereta enggai makai.
8 Laki iya Elkanah nanya iya: “Hanah, nama kebuah nuan nyabak? Nama kebuah nuan enggai makai? Nama kebuah nuan tusah ati? Ukai enda aku berega agi ari 10 iku anak lelaki?”
9 Pengudah sida makai sereta ngirup ba Siloh, Hanah mupuk ari endur nya. Maya nya, Imam Eli benung duduk ba bangku iya semak tiang pintu penama langkau sembiang* Jehovah.
10 Hanah berasai amat tusah ati. Iya besampi ngagai Jehovah enggau sabak-sabak.
11 Udah nya, iya besumpah: “O Jehovah, ketuai soldadu serega, peda meh penusah aku. Enti Nuan ingatka aku, nembiak Nuan tu, sereta meri aku siku anak lelaki, aku deka nyerahka iya ngagai Nuan, Jehovah. Iya deka gawa ke Nuan seumur idup iya, lalu buk iya enda dichukur.”
12 Hanah lama amat besampi ngagai Jehovah, lalu Eli beratika mulut iya.
13 Hanah besampi dalam ati. Semina mulut iya aja ke engkebut, tang nyawa iya enda didinga. Nya alai, Eli ngumbai iya mabuk.
14 Ku Eli bejaku enggau Hanah: “Ni pengelama nuan deka terus mabuk? Anang agi ngirup.”
15 Ku Hanah nyaut: “Ukai, tuan. Aku nadai ngirup wain tauka ai bisa. Aku mantaika semua asai ati aku ngagai Jehovah, laban aku balat tusah ati.
16 Anang ngumbai aku orang ke nadai guna. Ari tadi aku besampi, laban aku balat merinsa sereta tusah ati.”
17 Udah nya, Eli nyaut iya: “Mupuk meh nuan enggau selamat. Awakka Petara orang Israel meri utai ke dipinta nuan.”
18 Ku Hanah bejaku ngagai Eli: “Awakka tuan selalu bisi runding ti manah pasal aku.” Hanah pan mupuk, makai, lalu mua iya enda agi tusah.
19 Hari siti, Elkanah enggau sida sebilik dani tumu pagi, lalu nyembah Jehovah. Udah nya, sida pulai ngagai rumah sida ba Ramah. Elkanah tinduk* enggau bini iya Hanah, lalu Jehovah ingatka Hanah.
20 Dalam timpuh setaun,* Hanah pan ngandung lalu ngadaka siku anak lelaki ke diberi nama Samuel.* Ku Hanah: “Aku udah minta iya ari Jehovah.”
21 Maya pan datai alai Elkanah enggau sida sebilik mupuk nyerahka pemeri ke patut diberi ninting taun ngagai Jehovah, sereta nyerahka pemeri kena ngamatka semaya iya.
22 Tang, Hanah enda enggau sida. Ku iya madah ngagai laki iya: “Sepengudah anak tu badu nusu ila, aku deka mai iya ngagai rumah Jehovah.* Iya deka diau din seumur idup iya.”
23 Ku Elkanah nyaut iya: “Enti nuan ngasaika utai nya manah ba nuan, kereja aja meh utai nya. Diau meh ba rumah sampai anak tua badu agi nusu. Awakka Jehovah ngamatka utai ke disebut nuan.” Nya alai, Hanah diau ba rumah, lalu nusuka anak iya sampai anak iya badu agi nusu.
24 Pengudah anak nya badu agi nusu, Hanah pan mai iya ngagai Siloh. Hanah mega mai siku sapi lelaki ke beumur tiga taun, 11 kilogram tepung,* enggau siti sarang ti besai ke bisi wain. Iya mai anak iya sama enggau iya datai ngagai rumah Jehovah ba Siloh.
25 Udah nya, sida nyayat sapi nya lalu mai anak nya ngagai Eli.
26 Ku Hanah: “Tuan, aku besumpah atas nama tuan,* aku meh indu ke kala bediri enggau tuan ba ditu besampi ngagai Jehovah.
27 Maya nya, aku besampi minta anak tu, lalu Jehovah udah nyaut sampi aku.
28 Diatu, aku nyerahka* iya ngagai Jehovah. Seagi-agi iya idup, iya deka diempu Jehovah.”
Iya* lalu besugang ngagai Jehovah ba dia.
Nota Kaki
^ Tauka “ari Ramah, orang Zuf.”
^ Tauka “besugang ngagai.”
^ Iya nya, rumah sembiang.
^ Iya nya, ngereja pengawa seks.
^ Tauka engka, “Lebuh datai maya iya.”
^ Reti nya “Nama Petara.”
^ Jaku Asal, “ngagai Jehovah.”
^ Jaku Asal, “1 efah.” Peda Rujukan B14.
^ Tauka “atas nama tuan ti idup sereta ke enseput.”
^ Jaku Asal, “nyali.”
^ Tu merujuk ngagai Elkanah.
