1 Samuel 11:1-15
11 Udah nya, Nahas, raja orang Amon, datai enggau bala soldadu iya lalu nirika kem kena nyerang kuta Jabes ba Gilead. Semua orang ke diau ba Jabes madah ngagai Nahas: “Gaga sempekat* enggau kami, lalu kami deka gawa ke nuan.”
2 Disaut Nahas, raja orang Amon: “Aku ulih ngaga sempekat enggau kita, tang bisi syarat: Igi mata kanan kita semua mesti dikeruk. Aku deka ngereja nya kena ngemaluka semua orang Israel.”
3 Ku bala tuai orang Jabes madah: “Beri kami timpuh tujuh hari kena kami nganjung orang mai pesan ngagai serata menua Israel. Enti nadai orang deka nyelamatka kami, nya baru kami nyerahka diri ngagai nuan.”
4 Lebuh orang ke mai pesan nya datai ba Gibeah, iya nya endur alai Saul diau, sida pan lalu madahka pesan nya ngagai orang ba dia. Nya alai, semua sida ke ba dia inggar amat nyabak.
5 Maya nya, Saul benung datai ari ladang mai bala sapi iya. Iya lalu nanya: “Nama utai ti udah nyadi? Nama kebuah bala orang nya nyabak?” Sida pan lalu madahka ngagai iya pesan ke dibai bala orang ke mai pesan ari Jabes.
6 Lebuh Saul ninga pesan nya, iya lalu nerima kuasa kudus ari Petara. Iya pan lalu balat ringat.
7 Iya ngambi dua iku sapi lelaki lalu netak tubuh sapi nya nyadi mayuh lampang. Iya ngasuh bala orang ke mai pesan mai dagin nya ngagai serata Israel, lalu madahka: “Barang sapa ke enggai nitihka Saul enggau Samuel, sapi orang nya deka ditetak baka tu!” Jehovah ngasuh semua orang nya ngembuan asai ati ti nangi sereta deka ngayanka basa, nyentukka semua sida seati magang.
8 Udah nya, iya ngitung penyampau sida ba Besek. Bisi 300,000 iku orang Israel enggau 30,000 iku orang Judah.
9 Ku sida bejaku enggau bala orang ke mai pesan ari Jabes: “Padahka tu ngagai orang Jabes ba Gilead: ‘Maya tengah hari pagila, kita deka diselamatka.’” Nya alai, bala orang ke mai pesan nya madah ngagai orang ba Jabes, lalu sida gaga amat ati.
10 Udah nya, bala orang ba Jabes madah ngagai Nahas: “Kami deka nyerahka diri ngagai nuan pagila. Nuan ulih ngereja sebarang utai ti dikedeka nuan ngagai kami.”
11 Hari siti, Saul magi bala soldadu iya ngagai tiga iti raban. Sida mansang ngagai tengah-tengah kem munsuh maya tumu pagi* lalu munuh orang Amon nyentuk ngagai tengah hari. Orang Amon ke agi idup bepechah ari pangan diri. Sida enda begulai enggau pangan diri, tang ngatika diri.
12 Udah nya, orang Israel bejaku enggau Samuel: “Ni orang ke madahka Saul enda layak nyadi raja kitai? Serahka sida ngagai kami ngambika kami munuh sida!”
13 Tang ku Saul nyaut: “Seharitu, nadai siku pan orang tau dibunuh laban Jehovah udah nyelamatka orang Israel.”
14 Udah nya, Samuel bejaku ngagai orang Israel: “Aram kitai ngagai Gilgal lalu ngesahka baru Saul nya raja kitai.”
15 Nya alai, semua sida mansang ngagai Gilgal. Ba dia sida ngelantik Saul nyadi raja ba depan Jehovah. Sida nyerahka pemeri bebaik ba depan Jehovah. Saul enggau semua orang Israel lalu ngerami pengawa nya enggau ati ti amat gaga.
