1 Samuel 12:1-25
12 Pengujung iya, Samuel bejaku ngagai semua orang Israel: “Aku udah nitihka semua peminta kita, lalu aku udah ngelantik siku raja kena merintah kita.
2 Tu meh raja ke benung ngiring kita! Aku udah tuai sereta bisi uban, lalu bala anak lelaki aku bisi enggau kita. Aku udah ngiring kita kenyau ari aku agi biak nyentukka seharitu.
3 Tu aku. Enti kita bisi utai ke enda puas ati pasal aku, padahka nya ba depan Jehovah enggau orang ke ditata Iya. Kati aku kala ngambi sapi tauka keledai ari orang bukai? Kati aku kala nipu tauka ngenusahka pengidup orang bukai? Kati aku kala nerima rasuah lalu ngakim enggau enda adil? Enti bisi, aku deka mulaika semua nya ngagai kita.”
4 Sida pan nyaut: “Nuan nadai kala nipu tauka ngenusahka pengidup kami. Nuan mega nadai kala ngambi nama-nama utai ari orang bukai.”
5 Nya alai, Samuel madah ngagai sida: “Seharitu, kita madahka aku nadai salah. Jehovah enggau orang ke udah ditata Iya meh ke nyadi saksi aku.” Lalu sida nyaut: “Iya meh saksi nuan.”
6 Samuel bejaku ngagai sida: “Jehovah nyadi saksi ba depan kita. Iya meh ke udah milih Moses enggau Aron, lalu mai aki ini kita pansut ari menua Ejip.
7 Diatu, terus meh bediri, lalu aku deka ngakim kita ba depan Jehovah nitihka semua utai manah ke udah digaga Jehovah ngagai kita enggau ngagai bala aki ini kita.
8 “Pengudah Jakop datai ba menua Ejip lalu aki ini kita belabuh minta tulung ari Jehovah, Jehovah udah nganjung Moses enggau Aron ngiring aki ini kita pansut ari menua Ejip, lalu sida ulih diau ba menua tu.
9 Tang sida enda agi ingatka Jehovah, Petara sida, lalu Iya nyerahka* sida ngagai jari Sisera, iya nya ketuai soldadu Hasor, sereta ngagai jari orang Pilistin, enggau raja Moap. Semua bala munsuh tu beperang ngelaban sida.
10 Udah nya, sida minta tulung ari Jehovah lalu madah: ‘Kami udah bedosa laban kami ninggalka Jehovah lalu nyembah Baal enggau patung Astoret. Diatu, selamatka kami ari jari munsuh kami ngambika kami ulih nyembah Nuan.’
11 Udah nya, Jehovah nganjung Jerubaal, Bedan, Jeptah, enggau Samuel, lalu nyelamatka kita ari jari bala munsuh ke ngelingi kita ngambika kita ulih diau likun.
12 Lebuh Nahas, raja orang Amon, datai nyerang kita, kita suah madah ngagai aku: ‘Enda ngawa nya! Kami tetap dekaka siku raja merintah kami,’ taja pan Jehovah, Petara kita nya, Raja kita.
13 Tu meh raja ke udah dipilih sereta ke dipinta kita. Jehovah udah ngelantik siku raja kena merintah kita.
14 Enti kita nangika Jehovah, nyembah Iya, ngasika Iya, sereta enda ngelaban pesan Jehovah, lalu kita enggau raja ke merintah kita nitihka Jehovah, Petara kita, kita deka nadai apa nama.
15 Tang, enti kita enda ngasika Jehovah lalu ngelaban pesan Jehovah, Jehovah deka ngelaban kita enggau bala apai kita.
16 Diatu, terus meh bediri lalu peda meh utai ti luar biasa ke deka digaga Jehovah ba depan mata kita.
17 Ukai enda diatu musin ngetau gandum? Aku deka besampi minta Jehovah ngambika Iya ngasuh hari ujan sereta guntur. Nya baru kita nemu lalu sedar, kita udah ngereja utai ti amat jai ba mata Jehovah lebuh kita minta siku raja.”
18 Udah nya, Samuel ngangauka Jehovah, lalu Jehovah ngasuh hari ujan sereta guntur ba hari nya, nyentukka semua orang amat takutka Jehovah enggau Samuel.
19 Nya alai, semua orang madah ngagai Samuel: “Besampi meh ngagai Petara nuan, Jehovah, ngarika kami, laban kami enggai mati. Kami udah nambahka dosa kami lebuh kami minta siku raja.”
20 Nya alai, Samuel madah ngagai sida: “Anang takut. Kita endang udah ngereja semua utai ti jai tu, tang anang limpang ari Jehovah. Sembah meh Jehovah enggau pengabis ati kita.
21 Anang limpang nitihka petara ti pelesu* ke nadai mai penguntung sereta enda ulih nyelamatka kita, laban petara nya nadai kuasa.*
22 Jehovah Empu ke udah milih kita nyadi nembiak Iya. Nya alai, Jehovah enda sekali-kali ninggalka nembiak Iya ketegal nama Iya ti bemulia.
23 Pasal aku empu, aku sigi enggai badu besampika kita, laban enti aku badu besampika kita, nya baka siti dosa ke ngelaban Jehovah. Aku deka terus ngajar kita jalai ti betul sereta manah.
24 Nangi meh ke Jehovah lalu sembah meh Iya enggau setia* sereta enggau pengabis ati kita. Kingatka utai ti luar biasa ke udah dikereja Iya ke kita.
25 Tang, enti kita sengaja ngereja utai ti jai, kita enggau raja kita deka ditinggang penusah.”
Nota Kaki
^ Jaku Asal, “nyual.”
^ Tauka “nitihka utai ti nadai guna.”
^ Tauka “laban utai nya nadai guna.”
^ Tauka “sembah meh Iya dalam pemendar.”
