1 Samuel 15:1-35
15 Udah nya, Samuel bejaku ngagai Saul: “Jehovah udah nganjung aku ngambika nata nuan nyadi raja kena merintah bala nembiak Iya, orang Israel. Diatu, pendingka utai ke deka dipadahka Jehovah.
2 Tu utai ke dipadah Jehovah, ketuai soldadu serega: ‘Aku deka orang Amalek betanggungjawapka utai ke udah digaga sida ngagai orang Israel, laban sida udah ngelaban orang Israel lebuh orang Israel pansut ari menua Ejip.
3 Alai mupuk, lalu bunuh orang Amalek. Punaska sida sama enggau semua utai ke dikemisi sida. Anang nejuka sida idup.* Kita mesti munuh sida abis lengis, enda ngira lelaki tauka indu, anak mit tauka anak ke baru ada, sapi lelaki tauka bedus, enggau unta tauka keledai.’”
4 Nya alai, Saul ngempuruka bala soldadu iya lalu ngitung sida ba Telaim. Bisi 200,000 iku soldadu ke bejalai kaki enggau 10,000 iku soldadu ari Judah.
5 Saul enggau bala soldadu iya mansang nyentuk ngagai kuta orang Amalek, lalu belalai ba lebak* ngambika ulih nyerang sida enggau ngenyit.
6 Udah nya, Saul bejaku ngagai orang Keni: “Mupuk kita ari orang Amalek ngambika aku enda ngemunaska kita sama enggau sida. Kita udah ngayanka pengerindu ti setia ngagai semua orang Israel lebuh sida pansut ari menua Ejip.” Nya alai, orang Keni pan mupuk ninggalka orang Amalek.
7 Udah nya, Saul munuh orang Amalek berengkah ari Habilah sampai Sur, ke ba sepiak menua Ejip.
8 Iya nangkap Agak, raja orang Amalek. Raja nya ditejuka iya idup, tang semua sida ke bukai dibunuh iya magang ngena pedang.
9 Taja pia, Saul enggau bala soldadu iya enda munuh* Agak. Sida mega enda munuh bedus, kambin, enggau sapi ke pemadu manah sereta gemu. Sida enda nganchurka semua utai ti berega. Sida enggai ngemunaska semua utai nya. Tang, sida nganchurka semua utai ke enda berega sereta ke dikenggaika sida.
10 Udah nya, Jehovah bejaku ngagai Samuel:
11 “Aku kecewa udah ngelantik Saul nyadi raja, laban iya udah ninggalka Aku sereta enda ngasika Aku.” Samuel berasai amat tusah ati, lalu iya bebendar besampi ngagai Jehovah semalam-malam.
12 Samuel dani tumu pagi laban deka betemu enggau Saul. Tang, bisi orang madah ngagai Samuel: “Saul udah mupuk ngagai Karmel, lalu ba din iya udah ngaga siti tiang pengingat ke iya empu. Udah nya, iya mupuk ngagai Gilgal.”
13 Lebuh Samuel betemu enggau Saul, Saul madahka: “Awakka Jehovah merekatka nuan. Aku udah ngereja utai ke diasuh Jehovah.”
14 Samuel lalu nanya: “Enti pia, nama kebuah aku bisi ninga munyi bedus, kambin, enggau sapi?”
15 Disaut Saul: “Jelu nya dirampas ari orang Amalek. Bala soldadu enda munuh* bedus, kambin, enggau sapi ti pemadu manah laban sida deka nyerahka jelu nya ngagai Jehovah, Petara nuan, nyadika pemeri. Tang, kami udah ngemunaska utai bukai.”
16 Samuel lalu bejaku ngagai Saul: “Umbas nya! Aku deka madah ngagai nuan utai ke disebut Jehovah ngagai aku malam tadi.” Ku Saul nyaut: “Padah meh!”
17 Ku Samuel agi: “Endaka suba nuan ngumbai diri enda penting lebuh nuan dipilih nyadi tuai ke semua raban bansa orang Israel, sereta lebuh Jehovah nata nuan nyadi raja orang Israel?
18 Jehovah udah meri nuan siti pengawa, lalu Iya madahka: ‘Alai bunuh orang Amalek ke bedosa abis lengis. Laban meh sida nyentukka kita ngemunaska semua sida.’
19 Nya alai, nama kebuah nuan enda ngasika Jehovah? Nuan beguai-guai ngambi utai ke dirampas ari munsuh ketegal nuan amu. Nuan ngereja utai ti jai ba mata Jehovah!”
20 Ku Saul nyaut: “Aku udah ngasika Jehovah. Aku ngereja utai ke diasuh Jehovah, lalu udah nangkap Agak, raja orang Amalek. Aku mega udah munuh semua orang Amalek abis lengis.
21 Tang, bala soldadu ngambi bedus enggau sapi ti pemadu manah ari semua utai ke patut dibunuh. Sida deka nyerahka jelu nya nyadika pemeri ke Jehovah, Petara nuan, ba Gilgal.”
22 Ku Samuel: “Ni bagi utai ti lebih dikerinduka Jehovah? Nyerahka pemeri tunu tauka ngasika Iya? Ngasika Jehovah manah agi ari nyerahka pemeri tunu, lalu mendingka Iya manah agi ari nyerahka lemak bedus lelaki.
23 Pengawa ngelaban Petara nya sama jai enggau pengawa meramal, lalu ngumbaka diri sama jai enggau pengawa ngena kuasa sihir* sereta besembahka patung.* Ketegal nuan enda ngasika Jehovah, Iya enggai nerima nuan nyadi raja.”
24 Disaut Saul: “Aku udah bedosa, laban aku enda ngasika pesan Jehovah sereta jaku nuan. Nya ketegal aku takutka bala rayat aku lalu mendingka utai ke dipinta sida.
25 Tang diatu, ampunka meh dosa aku, lalu pulai meh sama enggau aku ngambika aku ulih nyembah Jehovah.”
26 Tang ku Samuel: “Enggai aku pulai enggau nuan, laban nuan enda ngasika Jehovah lalu Jehovah enggai nerima nuan nyadi raja orang Israel.”
27 Lebuh Samuel nguing deka mupuk, Saul bepegai ba ujung baju jubah Samuel ke enda belengan lalu baju jubah nya charik.
28 Nya alai, Samuel madah ngagai iya: “Seharitu, Jehovah udah nyarikka perintah Israel ari nuan, lalu Iya deka meri perintah nya ngagai orang bukai ke manah agi ari nuan.
29 Nambahka nya, Petara orang Israel ti bemulia enda bula tauka ngubah runding Diri,* laban Iya enda baka mensia ke selalu ngubah runding.”*
30 Ku Saul nyaut: “Aku udah bedosa, tang ayanka meh basa ngagai aku ba depan bala tuai rayat aku enggau ba depan orang Israel. Pulai meh sama enggau aku ngambika aku ulih nyembah Jehovah, Petara nuan.”
31 Nya alai, Samuel pan pulai sama enggau Saul, lalu Saul nyembah Jehovah.
32 Ku Samuel bejaku: “Bai Agak, raja orang Amalek nya ngagai aku kitu.” Agak lalu datai ngagai iya getar-getar takut.* Sebedau tu, Agak berunding: ‘Aku tentu enda mati.’
33 Tang ku Samuel: “Baka pedang nuan ke udah ngasuh mayuh sida ke indai lenyau anak, indai nuan mega deka lenyau anak.” Udah nya, Samuel lalu mantap Agak sampai mati ba depan Jehovah, ba Gilgal.
34 Udah nya, Samuel mupuk ngagai Ramah, lalu Saul pulai ngagai rumah iya ba Gibeah.
35 Samuel tusah ati ketegal Saul. Samuel nadai agi betemu enggau Saul nyentuk ngagai hari Samuel mati. Jehovah kecewa laban Iya udah ngelantik Saul nyadi raja orang Israel.
Nota Kaki
^ Tauka “Anang kasihka sida.”
^ Tauka “wadi.”
^ Tauka “bala soldadu iya kasihka.”
^ Tauka “Bala soldadu kasihka.”
^ Peda Penerang Leka Jaku, “Ilmu sihir.”
^ Jaku Asal, “patung terafim,” iya nya, patung ke disembah diri sebilik.
^ Tauka “nesal.”
^ Tauka “nesal.”
^ Tauka engka, “ngagai iya enggau yakin.”
