1 Samuel 21:1-15
21 Udah nya, David mansang ngagai Imam Ahimelek ba Nop. Lebuh Ahimelek betemu enggau David, Ahimelek getar-getar takut lalu nanya: “Nama kebuah nuan datai kediri? Nama kebuah nadai orang enggau nuan?”
2 Ku David nyaut: “Bisi utai ke diasuh raja kereja aku. Tang iya madah: ‘Anang madah ngagai sapa-sapa pasal utai ke diasuh aku kereja nuan tauka pasal iring ke udah diberi aku ngagai nuan.’ Aku udah besemaya deka betemu enggau bala aku ba siti endur.
3 Nyadi, enti nuan bisi lima iti tuku roti tauka nama-nama pemakai, beri meh nya ngagai aku.”
4 Tang ku imam nya madah: “Roti biasa nadai, semina bisi roti ti kudus. Nuan tau makai roti nya asalka bala nuan nadai tinduk* enggau orang indu baru-baru tu.”
5 Ku David nyaut: “Sebedau tu, lebuh kami pansut beperang, kami endang nadai tinduk enggau orang indu. Enti bala aku tuchi lebuh ngereja pengawa ti biasa, tentu seharitu sida lebih agi tuchi laban ngereja pengawa ti istimewa!”
6 Nya alai, imam nya meri roti ti kudus ngagai David, laban semina roti ti diberi ngagai Petara aja ke bisi ba dia. Roti nya udah diambi ari langkau sembiang Jehovah lalu diganti ngena roti ti baru ba hari ti sama.
7 Doek nya siku ari ulun Saul. Iya orang Edom, lalu iya ketuai pengibun bedus Saul. Ba hari nya, iya ba depan Jehovah, ba Langkau Sembiang.
8 Ku David agi: “Kati nuan bisi sangkuh tauka pedang? Aku nadai mai pedang tauka senyata bukai, laban pengawa ke diberi raja nya ngenyit.”
9 Imam nya nyaut: “Pedang Goliat, iya nya orang Pilistin ke dibunuh nuan ba Lebak Elah, bisi ba ditu. Pedang nya dibalut enggau kain lalu diengkah ba belakang epod. Enti nuan ka, ambi meh pedang nya, laban semina nya aja senyata ke bisi ba ditu.” Lalu ku David: “Nadai pedang bukai ke manah baka pedang nya. Beri meh nya ngagai aku.”
10 Ba hari nya mega, David majak ngerarika diri ari Saul lalu datai ba Gat, kuta Raja Akis.
11 Bala pegawai Akis bejaku ngagai Akis: “Ukai enda iya, David, raja ba menua iya empu? Ukai enda iya ke disebut orang lebuh orang betanda sambil belagu:‘Saul munuh beribu iku orang,Lalu David munuh bepuluh ribu iku orang’?”
12 David mikirka utai ke disebut sida, lalu iya berasai balat takut ke Raja Akis, ari Gat.
13 Nya alai, David ngaga diri gila ba depan sida. Iya baka orang gila lebuh begulai enggau sida. Iya ngurik pintu penama kuta, lalu nejuka ai liur iya labuh ba ragum iya.
14 Nya alai, ku Akis bejaku enggau bala pegawai iya: “Peda kita! Gila lelaki tu! Nama kebuah kita mai iya ngagai aku?
15 Udah bisi mayuh orang gila ke ngelingi aku. Aku enda begunaka lelaki ke gila tu. Nama kebuah ngelakka lelaki tu tama ngagai rumah aku?”
Nota Kaki
^ Iya nya, ngereja pengawa seks.
