1 Samuel 22:1-23
22 Nya alai, David mupuk ari endur nya lalu ngerarika diri ngagai gua ba Adulam. Lebuh bala menyadi iya enggau semua ruang bilik apai iya ninga pasal nya, sida pan datai betemu enggau iya.
2 Semua orang ke bisi penusah, ke berutang, enggau ke tusah ati, begempung enggau David lalu iya nyadi ketuai sida. Penyampau sida kira-kira 400 iku orang.
3 Udah nya, David mupuk ari endur nya ngagai Mispeh ba Moap. Lalu ku iya bejaku ngagai raja Moap: “Awakka meh apai indai aku diau enggau nuan sampai aku nemu utai ke deka dikereja Petara ke aku.”
4 Nya alai, iya ninggalka apai indai iya enggau raja Moap, lalu seduai iya pan diau enggau raja nya sepemanjai timpuh David ba endur iya belalai.
5 Bisi sekali, Nabi Gat madah ngagai David: “Anang diau ba endur nuan belalai. Mupuk ari nya lalu mansang ngagai menua Judah.” Nya alai, David mupuk lalu mansang ngagai utan ba Heret.
6 David enggau bala iya udah temu orang, lalu Saul ninga pasal nya. Maya nya, Saul benung duduk ba baruh pun kayu tamaris ba endur ti tinggi, ba Gibeah. Iya benung megai sangkuh lalu semua pegawai iya ngelingi iya.
7 Udah nya, Saul madah ngagai semua pegawai nya: “Pendingka aku, kita orang Benjamin! Kati anak Jesi mega deka meri kita tanah enggau ladang anggur? Kati iya deka ngelantik kita nyadi ketuai atas 1,000 iku orang sereta ketuai atas 100 iku orang?
8 Semua kita bepakat ngelaban aku! Nadai siku pan ari kita madah ngagai aku, anak aku udah ngaga sempekat enggau anak Jesi! Nadai siku ari kita kasihka aku! Kita nadai madah ngagai aku, anak aku udah ngasut ulun aku empu kena ngelaban aku sereta nganti maya deka nyerang aku, baka ke digaga iya diatu.”
9 Udah nya, Doek, orang Edom nya, ke bisi kuasa atas bala pegawai Saul madah: “Bisi aku meda anak Jesi nya datai ngagai Ahimelek anak Ahitup, ba Nop.
10 Ahimelek minta iring ari Jehovah ngarika David. Iya mega meri David pemakai sereta meri iya pedang Goliat, orang Pilistin nya.”
11 Raja lalu tekala nya nganjung orang ngangauka Imam Ahimelek anak Ahitup enggau semua imam ari ruang bilik apai Ahimelek, ba Nop. Nya alai, semua sida pan datai betemu enggau raja.
12 Saul madah: “Pendingka aku, anak Ahitup.” Ahimelek nyaut: “Au, tuan.”
13 Saul madah ngagai iya: “Nama kebuah nuan bepakat enggau anak Jesi nya ngelaban aku? Nama kebuah nuan meri iya roti enggau pedang, lalu minta iring ari Petara ngarika iya? Iya udah ngelaban aku lalu nganti maya deka nyerang aku, baka ke digaga iya diatu.”
14 Ku Ahimelek nyaut: “Ari semua bala pegawai tuan, sapa ke ulih dipechaya* baka David? Iya menantu tuan, iya ketuai pengawal ke nyaga tuan, lalu iya mega amat dipebasa ba istana tuan.
15 Tu ukai keterubah kali aku minta iring ari Petara ngarika iya. Enda patut aku bepakat enggau iya ngelaban tuan! Anang nuduh aku enggau ruang bilik apai aku ngereja utai ti jai, laban aku amat enda nemu pasal utai tu.”
16 Tang ku raja nyaut: “Nuan enggau semua ruang bilik apai nuan mesti mati!”
17 Udah nya, raja madah ngagai bala pengawal ke ngelingi iya: “Bunuh semua imam Jehovah nya, laban sida udah nyukung David! Sida nadai madah ngagai aku, taja pan sida nemu David nya orang ke mesti ditangkap!” Tang, bala pengawal Saul enggai munuh bala imam Jehovah.
18 Udah nya, raja bejaku ngagai Doek: “Bunuh bala imam nya!” Tekala nya, Doek, orang Edom nya lalu munuh sida. Ba hari nya, iya udah munuh 85 iku imam ke ngena epod ke digaga ari kain linin.
19 Iya mega nyerang Nop, kuta bala imam, ngena pedang. Iya munuh semua lelaki, indu, anak mit, anak ke baru ada, sapi, keledai, enggau bedus, ngena pedang.
20 Tang, siku ari anak lelaki Ahimelek anak Ahitup, ke benama Abiatar, mujur ngerarika diri lalu nitihka David.
21 Abiatar madah ngagai David: “Saul udah munuh bala imam Jehovah.”
22 Nya alai, David madah ngagai iya: “Sehari nya, lebuh aku meda Doek, orang Edom nya ba din, aku sigi udah nemu iya tentu deka madah ngagai Saul. Aku empu deka betanggungjawap atas pemati tiap iku orang dalam ruang bilik apai nuan.
23 Diau meh enggau aku. Anang takut. Aku deka ngelindung nuan. Barang sapa ke deka munuh nuan, iya patut munuh aku dulu.”
Nota Kaki
^ Tauka “ke setia.”
