1 Samuel 24:1-22
24 Pengudah Saul pulai ari begagaika orang Pilistin, bisi orang madah ngagai iya: “David bisi ba menua puang ba En-gedi.”
2 Nya alai, Saul milih 3,000 iku lelaki ari semua orang Israel, lalu ngiga David enggau bala David ba bukit batu, iya nya endur ke bisi kambin gunung.
3 Saul datai ba kandang* bedus ba tisi jalai, lalu ba dia bisi siti gua. Iya tama ke dalam gua nya laban deka bira. Maya nya, David enggau bala iya benung duduk ba endur ke dalam agi ba gua nya.
4 Bala David madah ngagai David: “Tu meh maya iya Jehovah madah ngagai nuan: ‘Aku udah nyerahka munsuh nuan ngagai jari nuan, lalu nuan ulih ngereja sebarang utai ti dikedekaka nuan ngagai iya.’” Nya alai, David angkat lalu belalai mutung ujung baju jubah Saul ke enda belengan.
5 Tang udah nya, David berasai besalah* laban iya udah mutung ujung baju jubah Saul ke enda belengan.
6 Iya madah ngagai bala iya: “Ba mata Jehovah, aku enda patut ngereja nya ngagai tuan aku laban iya orang ke ditata Jehovah. Aku enda tau ngemediska iya laban iya udah ditata Jehovah.”
7 Nya meh chara David nagang bala iya,* lalu iya enda ngasuh sida nyerang Saul. Saul pan mupuk ari gua nya lalu neruska pejalai iya.
8 Udah nya, David pan pansut ari gua nya lalu ngangauka Saul: “Tuan raja!” Lebuh Saul malik ke belakang, David besugang lalu meremi ngagai iya.
9 David madah ngagai Saul: “Nama kebuah tuan pechayaka jaku orang ke madahka: ‘David deka ngemediska tuan?’
10 Seharitu, tuan empu udah meda Jehovah udah nyerahka tuan ngagai jari aku ba dalam gua nya. Tang lebuh bisi orang ngasuh aku munuh tuan, aku kasihka tuan, lalu madahka iya: ‘Enggai aku munuh iya, laban iya udah ditata Jehovah.’
11 Tuan,* peda ujung baju jubah tuan ke enda belengan ke dipegai aku tu. Lebuh aku mutung ujung baju tuan, aku enda munuh tuan. Tuan empu ulih meda sereta nemu aku nadai niat deka ngelaban tauka ngemediska tuan, lalu aku enda bedosa ngagai tuan. Taja pia, tuan begagaika aku lalu deka munuh aku.
12 Awakka Jehovah nyadi hakim entara tua. Awakka Jehovah malas tuan ngarika aku. Tang aku sigi enda ngemediska tuan.
13 Kelia menya, bisi jaku munyi tu: ‘Orang ke jai, ngereja utai ti jai.’ Tang aku enggai ngelaban tuan.
14 Sapa ke digagai raja orang Israel? Sapa aku tu? Aku tu baka ukui ke udah mati! Baka kutu aja!
15 Awakka Jehovah nyadi hakim lalu ngakim tua. Iya deka meresa pekara tu lalu ngetanka aku. Iya mega deka ngakim aku lalu deka nyelamatka aku ari jari tuan.”
16 Pengudah David nyebut semua nya, Saul lalu nanya: “Anak ku, David, nuan ke bejaku nya?” Lalu Saul pan balat amat nyabak.
17 Ku Saul: “Nuan enda salah. Aku ke salah, laban nuan ngereja utai ti manah ngagai aku. Tang, aku malas nuan ngena penyai.
18 Seharitu, nuan udah nunjukka diri manah ngagai aku. Nuan enda munuh aku, taja pan Jehovah udah nyerahka aku ngagai jari nuan.
19 Ni bisi orang deka ngelepaska munsuh iya pia aja? Jehovah deka merekatka nuan ketegal nuan udah ngereja utai ti manah ngagai aku seharitu.
20 Diatu, aku nemu nuan tentu deka nyadi raja, lalu perintah Israel deka meruan di baruh perintah nuan.
21 Besumpah meh ngagai aku atas nama Jehovah, nuan enda ngemunaska peturun aku sereta enda muai nama aku ari ruang bilik apai aku.”
22 Nya alai, David besumpah ngagai Saul. Udah nya, Saul pulai, lalu David enggau bala iya pulai baru ngagai endur sida belalai.
Nota Kaki
^ Merujuk ngagai kandang ke digaga ari batu.
^ Tauka “ati David nyalahka David.”
^ Tauka engka, “ngasuh bala iya mupuk.”
^ Jaku Asal, “Apai.”
