1 Samuel 27:1-12
-
Orang Pilistin meri David kuta Siklak (1-12)
27 Ku David bejaku dalam ati diri: “Ila Saul tentu deka munuh aku. Manah agi aku rari ngagai menua orang Pilistin. Nya baru Saul deka badu begigaka aku ba serata menua Israel, lalu aku ulih ngelepaska diri ari iya.”
2 Nya alai, David enggau 600 iku bala iya mupuk betemu enggau Akis anak Maok, iya nya raja menua Gat.
3 David enggau bala iya sereta ruang bilik sida diau enggau Akis ba Gat. Dua iku bini David, iya nya Ahinoam ari Jesril enggau Abigail, balu Nabal ari Karmel, mega enggau David.
4 Lebuh Saul ninga David udah rari ngagai Gat, iya lalu badu begigaka David.
5 Udah nya, David bejaku ngagai Akis: “Enti tuan setuju, beri meh aku siti ari kuta ti mit alai aku diau. Manah agi enti aku enda diau enggau tuan ba kuta raja.”
6 Nya alai, ba hari nya Akis meri David kuta Siklak. Nya meh kebuah kuta Siklak diempu bala raja Judah nyentuk ngagai seharitu.
7 David diau ba menua orang Pilistin pengelama setaun empat bulan.
8 Sepemanjai timpuh nya, David enggau bala iya suah nyerang orang Gesur, orang Girsi, enggau orang Amalek. Semua bansa nya diau ba kawasan Telam, sampai ngagai Sur enggau menua Ejip.
9 Lebuh David nyerang menua sida, iya munuh semua lelaki enggau indu. Tang iya ngambi kambin, bedus, sapi, keledai, unta, enggau gari sida. Udah nya, iya pulai ngagai Raja Akis.
10 Lebuh Akis nanya: “Ni kawasan ke diserang nuan seharitu?” David nyaut: “Aku nyerang selatan* menua Judah,” tauka “Selatan menua orang Jerahmil,” tauka “Selatan menua orang Keni.”
11 David munuh semua lelaki enggau indu ngambika sida enda dibai ngagai Gat. David madah: “Ngambika sida enda madah ngagai orang ba dia: ‘Tu utai ke dikereja David.’” Nya meh utai ke dikereja David sepemanjai iya diau ba menua orang Pilistin.
12 Akis pechayaka utai ke disebut David, lalu iya berunding: “Tentu David amat dipegedika bansa iya empu, orang Israel. Nya alai, iya tentu deka nyadi ulun aku belama iya.”
Nota Kaki
^ Tauka “Negeb.”
