1 Samuel 28:1-25
-
Saul betemu enggau manang ba En-dor (1-25)
28 Maya nya, orang Pilistin ngempuruka bala soldadu sida beperang ngelaban orang Israel. Nya alai, Akis bejaku ngagai David: “Nuan nemu, nuan enggau bala nuan deka mupuk beperang enggau aku.”
2 Ku David nyaut Akis: “Au, tuan. Tuan empu nemu utai ke deka digaga aku.” Ku Akis bejaku: “Nya kebuah aku ngelantik nuan nyadi pengawal tetap ke nyaga aku.”
3 Maya Samuel mati, semua orang Israel tusah ati lalu nguburka iya ba kuta iya empu, iya nya ba Ramah. Sebedau nya, Saul udah muru semua manang enggau orang ke nemu nilit nasit ari menua Israel.
4 Orang Pilistin begempuru, lalu nirika kem ba Sunem. Saul ngempuruka semua soldadu orang Israel, lalu sida nirika kem ba Gilboa.
5 Lebuh Saul meda kem soldadu orang Pilistin, iya balat amat takut lalu ati iya kesal amat.
6 Taja pan Saul udah mayuh kali betanya ngagai Jehovah, tang Jehovah enda nyaut iya, nemuka nya nengah mimpi, nengah Urim,* tauka nengah bala nabi.
7 Pengujung iya, ku Saul bejaku ngagai bala pegawai iya: “Giga siku indu manang ke aku. Bisi utai ke deka ditemu aku ari iya.” Ku bala pegawai iya nyaut: “Ba En-dor bisi siku indu manang.”
8 Saul ngena gari bukai ngambika orang enda ngelala iya. Iya mai dua iku pegawai iya betemu enggau indu manang nya maya malam hari. Ku iya bejaku ngagai indu nya: “Kena penau nuan nulung aku nemu utai ke deka nyadi, lalu kangauka orang ke deka disebut aku.”
9 Tang, ku indu nya nyaut: “Nuan tentu nemu Saul udah muru semua manang enggau orang ke nemu nilit nasit ari menua tu. Nya alai, nama kebuah nuan deka manjuk aku lalu ngasuh aku diukum bunuh?”
10 Saul besumpah atas nama Jehovah: “Atas nama Jehovah, Petara ti idup, nuan enda diukum ketegal pengawa tu.”
11 Ku indu nya nanya: “Sapa ke patut dikangauka aku?” Ku Saul nyaut: “Kangauka Samuel.”
12 Lebuh indu nya meda “Samuel,”* iya nyerauh lalu madah ngagai Saul: “Nuan tu Saul! Nama kebuah tuan nipu aku?”
13 Ku Raja Saul bejaku ngagai iya: “Anang takut. Padahka utai ke dipeda nuan.” Ku indu nya nyaut: “Aku meda siku orang ke baka petara pansut ari tanah.”
14 Saul lalu nanya: “Baka ni gamal iya?” Ku indu nya nyaut: “Iya lelaki ti tuai, lalu iya ngena baju jubah ke enda belengan.” Ari utai ke disebut indu nya, Saul ngumbai orang nya “Samuel.” Saul pan besugang lalu meremi.
15 Udah nya, “Samuel” nanya Saul: “Nama kebuah tuan ngangauka aku? Tuan ngachau aku.” Disaut Saul: “Aku bisi penusah ti besai. Orang Pilistin benung nyerang aku, lalu Petara udah ninggalka aku. Iya nadai agi nyaut aku, nemuka nya nengah bala nabi tauka nengah mimpi. Nya meh kebuah aku ngangauka nuan, ngambika nuan ulih madah utai ke patut dikereja aku.”
16 Ku “Samuel” bejaku: “Enti Jehovah udah ninggalka tuan lalu udah nyadi munsuh tuan, nama guna tuan betanya ngagai aku?
17 Jehovah tentu deka ngereja utai ti udah dipadah Iya nengah aku. Jehovah tentu deka ngerampas perintah tu ari tuan, lalu nyerahka nya ngagai David.
18 Tuan enda ngasika pesan Jehovah, lalu enda ngemunaska orang Amalek ke udah ngasuh Iya balat ringat. Nya meh kebuah Jehovah ngereja utai tu ngagai tuan seharitu.
19 Jehovah deka nyerahka tuan enggau orang Israel ngagai orang Pilistin. Pagila, tuan enggau bala anak lelaki tuan deka begulai enggau aku. Jehovah mega deka nyerahka bala soldadu orang Israel ngagai orang Pilistin.”
20 Saul lalu tekala nya rebah telentang ba tanah, laban iya balat takutka utai ti udah disebut “Samuel.” Nambahka nya, iya lemi tulang laban sehari-hari enggau semalam-malam nya iya nadai makai.
21 Indu nya mansang ngagai Saul, lalu meda iya balat kesal. Ku indu nya bejaku: “Aku udah nitihka utai ke diasuh tuan, lalu aku udah berambunka nyawa ngereja utai ke dipinta tuan.
22 Nya alai, pendingka utai ku aku. Aku deka nyediaka roti ke tuan. Makai meh ngambika tuan kering, lalu ulih neruska pejalai.”
23 Tang Saul enggai. Ku iya: “Enggai aku makai.” Tang, pegawai iya enggau indu nya majak ngasuh iya makai. Nyau kelama, iya nitihka utai ku sida. Iya angkat lalu duduk ba katil.
24 Indu nya bisi siku anak sapi ke gemu. Iya lalu berumban nyayat anak sapi nya. Iya mega ngambi tepung, ngaga iya nyadi adunan, lalu manggang iya nyadi roti ti enda beragi.
25 Iya ngenahka semua pemakai nya ke Saul enggau pegawai iya lalu sida pan makai. Ba malam nya mega, sida mupuk.
