1 Samuel 29:1-11
-
Orang Pilistin enda pechayaka David (1-11)
29 Bala soldadu orang Pilistin begempuru ba Afek, lalu bala soldadu orang Israel benung ba kem semak enggau mata ai ba Jesril.
2 Bala tuai orang Pilistin mai raban bala soldadu sida ke bisi 100 iku enggau 1,000 iku dalam siti-siti raban. David enggau bala iya benung bejalai enggau Raja Akis ba belakang sida.
3 Bala tuai orang Pilistin lalu nanya: “Nama pengawa sida orang Hebrew tu ditu?” Akis nyaut: “Iya David, siku ari ulun Raja Saul ari Israel. Iya udah enggau aku setaun lebih. Kenyau ari iya udah ninggalka Saul lalu datai kitu, aku nadai tetemuka nama-nama penyalah ba iya sampai seharitu.”
4 Tang, sida ringat ngagai Akis lalu madah: “Asuh iya pulai ngagai endur ke udah ditetapka tuan ke iya. Anang ngasuh iya beperang enggau kitai. Ni nemu iya deka ngelaban kitai, lalu munuh kitai maya kitai benung beperang. Enti iya ulih munuh bala kitai, endaka nya siti penguntung ba iya kena ngelantangka ati tuan iya?
5 Ukai enda iya David ke disebut orang lebuh orang betanda sambil belagu:
‘Saul munuh beribu iku orang,Lalu David munuh bepuluh ribu iku orang’?”
6 Nya alai, Akis ngangauka David lalu madah: “Aku besumpah atas nama Jehovah, Petara ti idup, nuan orang ke lurus, lalu aku gaga ati deka mai nuan enggau aku beperang. Kenyau ari nuan datai kitu, aku nadai tetemuka nama-nama penyalah ba nuan sampai seharitu. Tang sida enda pechayaka nuan.
7 Nya alai, pulai meh enggau selamat, lalu anang ngereja nama-nama utai ke ngasuh sida pedis ati.”
8 Nya alai, David nanya: “Nama udah digaga aku? Kenyau ari aku datai kitu sampai seharitu, kati aku kala ngaga penyalah? Nama kebuah aku enda ulih enggau tuan beperang ngelaban bala munsuh tuan?”
9 Ku Akis nyaut: “Ba aku, nuan manah baka melikat Petara. Tang, bala tuai orang Pilistin madah nuan enda tau enggau kami beperang.
10 Nya alai, dani tumu pagi pagila. Nuan enggau bala nuan patut mupuk lebuh hari nyau tawas.”
11 Nya alai, David enggau bala iya dani tumu pagi lalu pulai ngagai menua orang Pilistin. Orang Pilistin pan mupuk ngagai Jesril.
