1 Samuel 3:1-21
-
Samuel nyadi nabi (1-21)
3 Samuel ke agi mit gawa ke Jehovah ba baruh iring Eli. Tang maya nya, nadai mayuh orang ke nerima pesan ari Jehovah sereta meda utai ke dipandangka Iya dalam runding sida.
2 Bisi sekali, Eli benung tinduk ba bilik iya. Mata iya udah rabun, lalu iya enda entu ulih meda utai agi.
3 Lampu kelita Petara bedau padam, lalu Samuel benung tinduk ba rumah sembiang* Jehovah, endur alai peti lampang batu Adat Petara disimpan.
4 Udah nya, Jehovah ngangauka Samuel. Ku iya nyaut: “Nama utai, tuan?”
5 Iya lalu belanda ngagai Eli. Ku iya: “Tuan ngangauka aku?” Tang ku Eli nyaut: “Nadai aku ngangauka nuan deh. Alai meh nuan tinduk.” Nya alai, Samuel pan tinduk baru.
6 Jehovah ngangauka Samuel baru: “Samuel!” Samuel pan angkat lalu mansang ngagai Eli. Ku iya: “Tuan ngangauka aku?” Ku Eli nyaut: “Nadai aku ngangauka nuan, anak. Alai meh nuan tinduk baru.”
7 (Samuel bedau entu ngelala Jehovah, lalu iya bedau agi nerima pesan ari Jehovah.)
8 Jehovah ngangauka Samuel kali ketiga: “Samuel!” Samuel pan angkat lalu mansang ngagai Eli. Ku iya: “Tuan ngangauka aku?”
Udah nya, baru Eli nemu Jehovah meh ke ngangauka nembiak nya.
9 Nya alai, Eli lalu bejaku enggau Samuel: “Alai nuan tinduk baru. Enti Iya ngangauka nuan baru, nuan patut nyebut: ‘Bejaku meh Jehovah, nembiak Nuan tu benung mendingka Nuan.’” Samuel pan pulai ngagai bilik iya, lalu tinduk baru.
10 Jehovah datai lalu bediri ba dia. Iya ngangau baru: “Samuel! Samuel!” Samuel lalu nyaut: “Bejaku meh. Nembiak Nuan tu benung mendingka Nuan.”
11 Ku Jehovah bejaku ngagai Samuel: “Aku deka ngereja utai ba Israel. Sapa-sapa ke ninga pasal utai nya deka tekenyit.
12 Ba hari nya ila, Aku deka ngamatka semua jaku Aku pasal Eli enggau ruang bilik iya, ari pun sampai ujung.
13 Nuan mesti madah ngagai iya, Aku deka ngukum ruang bilik iya belama iya, laban taja pan iya nemu bala anak iya enda bebasaka* Petara, tang iya enda bebendar ngerara seduai iya.
14 Nya meh kebuah Aku besumpah ngagai ruang bilik Eli. Penyalah sida enda ulih diampun, sekalika nya ngena korban tauka pemeri.”
15 Samuel tinduk sampai pagi. Udah nya, iya muka pintu rumah Jehovah. Samuel takut deka madah ngagai Eli pasal utai ke dipadah Petara.
16 Tang Eli ngangauka Samuel: “Samuel!” Ku Samuel nyaut: “Tu aku, tuan.”
17 Eli nanya iya: “Nama pesan ke dipadah Petara ngagai nuan? Anang ngelalaika utai nya ari aku. Awakka Petara ngukum nuan enggau balat enti nuan ngelalaika siti leka jaku pan ari pesan nya.”
18 Nya alai, Samuel madahka semua utai ngagai iya. Iya enda ngelalaika nama-nama utai ari Eli. Ku Eli bejaku: “Nya utai ti dikedekaka Jehovah. Awakka Iya ngereja utai ti manah ba mata Iya.”
19 Samuel majak mansang besai, lalu Jehovah bisi enggau iya sereta nentuka semua utai ke disebut Samuel nyadi magang.
20 Semua orang Israel ari Dan nyentuk ngagai Beer-sheba bela nemu, Samuel udah dilantik Jehovah nyadi nabi.
21 Jehovah majak ngayanka Diri ba Siloh. Ba dia, nengah jaku Jehovah, Jehovah nulung Samuel ngelala Iya.
