1 Samuel 30:1-31
30 Ba hari ti ketiga, David enggau bala iya datai ba Siklak, lalu orang Amalek udah ngerumpak kuta Siklak enggau kawasan ba begian selatan.* Sida mega nyerang Siklak sereta nunu kuta nya.
2 Sida nabanka bala indu enggau semua orang ke ba kuta nya, enda ngira tuai tauka biak. Orang Amalek semina nabanka sida, tang nadai munuh sapa-sapa.
3 Lebuh David enggau bala iya datai ba kuta nya, sida meda kuta nya udah ditunu. Lalu bala bini enggau anak sida udah ditaban.
4 Nya alai, David enggau bala iya bendar amat nyabak sampai sida nyau nadai agi pengering deka nyabak.
5 Dua iku bini David, iya nya Ahinoam ari Jesril enggau Abigail, balu Nabal ari Karmel, mega udah ditaban.
6 Semua sida balat ringat, laban sida udah lenyau bala anak sida. Sida deka nikau David ngena batu. Nya alai, David balat tusah ati, tang iya bulih pengering ari Jehovah, Petara iya.
7 Udah nya, ku David bejaku ngagai Imam Abiatar anak Ahimelek: “Bai epod kitu.” Abiatar pan lalu mai epod ngagai David.
8 David lalu betanya ngagai Jehovah: “Kati aku patut ngagai bala perumpak nya? Kati aku ulih tegagaika sida?” Ku Petara nyaut iya: “Alai, gagai meh sida. Nuan tentu ulih tegagaika sida lalu nyelamatka semua orang enggau barang kita ke udah ditabanka sida.”
9 David lalu tekala nya mupuk enggau 600 iku bala iya. Sida bejalai sampai Wadi* Besor. Tang, sekeda ari bala David ngetu ba dia.
10 David neruska pejalai iya enggau 400 iku bala iya. Tang, 200 iku bala iya ke bukai tinggal ba Wadi Besor, laban sida kelalu lelak deka meraka Wadi Besor nya.
11 Lebuh ba rantau jalai, bala David tetemuka siku lelaki ari menua Ejip ba padang. Lalu sida pan mai iya ngagai David. Sida meri iya pemakai enggau ai irup.
12 Sida mega meri iya siti kuih buah ara enggau dua iti kuih kismis. Pengudah iya makai, iya bulih pengering baru, laban udah tiga hari enggau tiga malam iya enda makai tauka ngirup.
13 David lalu nanya iya: “Sapa tuan nuan? Ari ni nuan?” Iya nyaut: “Aku ari Ejip, lalu tuan aku siku lelaki orang Amalek. Tang, tuan aku udah ninggalka aku laban aku sakit tiga hari ti udah.
14 Kami udah ngerumpak kawasan selatan* orang Kereti, kawasan orang Judah, enggau kawasan selatan* Kalep. Kami mega udah nunu kuta Siklak.”
15 Lalu ku David: “Ulih nuan mai kami ngagai endur bala perumpak nya?” Ku lelaki nya: “Enti nuan besumpah atas nama Petara, nuan enda munuh aku sereta enda nyerahka aku ngagai jari tuan aku, aku deka mai nuan ngagai sida.”
16 Nya alai, lelaki nya mai David ngagai bala perumpak nya. Maya nya, sida ngachir ba sebelah endur nya. Sida benung makai ngirup sereta berami, laban sida udah ngerumpak mayuh barang ari menua orang Pilistin enggau menua Judah.
17 Udah nya, David nyerang sida ari tumu pagi, maya hari agi petang, nyentukka malam. Nadai siku pan ari sida idup. Semina 400 iku orang ke ngerarika diri ngena unta aja ke selamat.
18 David ngambi pulai baru semua orang enggau semua utai ti udah ditabanka orang Amalek. Iya mega nyelamatka dua iku bini iya.
19 Nadai siti utai ke enggi sida lenyau, baikka nya mit tauka besai. Sida ngambi pulai baru bala anak sida sereta barang sida. David ngambi pulai baru semua utai ke udah ditaban orang Amalek.
20 David mega ngambi semua bedus, kambin, enggau sapi orang Amalek. Semua jelu nya bejalai dulu ari jelu tupi sida empu, lalu dijaga bala David. Ku sida: “Semua tu enggi David magang.”
21 Udah nya, David pulai ngagai 200 iku bala iya ke tinggal ba Wadi Besor ketegal sida kelalu lelak nitihka David. Sida betemu enggau David enggau bala sida ke bukai. David mansang semak ngagai sida lalu nanyaka rita sida.
22 Taja pia, sekeda ari sida ke jai sereta nadai guna ti udah nitihka David madahka: “Sida nadai enggau kitai. Enda ibuh meh meri sida barang ke udah dirampas kitai. Sida semina tau ngambi anak enggau bini sida, udah nya mupuk.”
23 Ku David nyaut: “Anang pia, madi. Enda manah kitai ngaga utai ti udah diberi Jehovah ngagai kitai baka nya. Iya udah ngelindung kitai lalu nyerahka bala perumpak ke nyerang kitai nya ngagai jari kitai.
24 Enti kita bejaku jai pasal sida, nadai orang deka mendingka kita. Orang ke tinggal nyaga barang deka nerima upah ti sama enggau orang ke mupuk beperang. Semua orang deka bulih upah ti sama rata.”
25 Kenyau ari sehari nya, utai ke disebut David nya nyadi adat enggau atur ti tetap ke orang Israel.
26 Lebuh David pulai ke Siklak, iya nganjung sekeda ari barang ke dirampas nya ngagai bala kaban iya, iya nya bala tuai orang Judah. Ku iya: “Tu hadiah* ke kita, ke dirampas ari bala munsuh Jehovah.”
27 David nganjung hadiah nya ngagai sida ke diau ba Bethel, ba Ramot ba Negeb,* ba Jatir,
28 ba Aroer, ba Sipmot, ba Estemoa,
29 ba Rakal, ba kuta orang Jerahmil, ba kuta orang Keni,
30 ba Hormah, ba Borasan, ba Atak,
31 ba Hebron, enggau ba semua endur ke suah ditengah David enggau bala iya.
Nota Kaki
^ Tauka “Negeb.”
^ Peda Penerang Leka Jaku.
^ Tauka “Negeb.”
^ Tauka “Negeb.”
^ Jaku Asal, “berekat.”
^ Tauka “ba selatan.”
