1 Samuel 4:1-22
4 Samuel enda ngetu-ngetu madahka jaku Petara ngagai semua orang Israel.
Udah nya, orang Israel beperang ngelaban orang Pilistin. Orang Israel nirika kem semak Ebeneser, lalu orang Pilistin nirika kem ba Afek.
2 Orang Pilistin ngatur barisan bala soldadu sida kena nyerang orang Israel. Perang nya amat balat, nyentukka orang Israel alah laban orang Pilistin. Orang Pilistin munuh kira-kira 4,000 iku orang Israel ba perang nya.
3 Lebuh orang Israel pulai ngagai kem sida, bala tuai orang Israel lalu nanya: “Nama kebuah Jehovah nejuka kitai alah laban orang Pilistin seharitu?* Aram kitai ngambi peti lampang batu Adat Jehovah ari Siloh, ngambika peti nya bisi enggau kitai lalu nyelamatka kitai ari munsuh.”
4 Nya alai, sida nganjung orang ke Siloh ngambi peti lampang batu Adat. Peti nya enggi Jehovah, ketuai soldadu serega, ke duduk ba kerusi diraja ba atas* dua iku cherub. Dua iku anak lelaki Eli, iya nya Hopni enggau Pinehas, mega bisi enggau sida.
5 Lebuh peti lampang batu Adat Jehovah datai ba kem, semua orang Israel manjung enggau nyawa ti inggar nyentukka tanah nyau berenyang.
6 Maya orang Pilistin ninga munyi panjung orang Israel, sida lalu nanya: “Nama utai ke ngasuh orang Hebrew manjung ba kem sida?” Pengujung iya, sida nyau nemu peti lampang batu Adat Jehovah udah dibai ngagai kem orang Israel.
7 Orang Pilistin lalu takut. Ku sida: “Petara udah datai ngagai kem nya!” Sida mega madahka: “Parai meh kitai tu! Utai ke baka tu bedau kala nyadi.
8 Nadai penyadi meh kitai tu! Sapa ke ulih nyelamatka kitai ari Petara ti bekuasa tu? Lebuh ba menua puang, Iya meh Petara ke udah munuh orang Ejip ngena mayuh macham penulah.
9 Orang Pilistin, anang takut! Kitai mesti berani ngelaban ngambika kitai enda nyadi ulun orang Hebrew, baka sida ke kala nyadi ulun kitai. Beperang meh enggau berani!”
10 Nya alai, orang Pilistin nyerang lalu ngalahka orang Israel. Orang Israel lalu rari ngagai rumah* diri empu. Mayuh amat orang Israel mati ba perang nya. Bisi 30,000 iku soldadu sida ke bejalai kaki udah mati.
11 Nambahka nya, peti lampang batu Adat Petara udah dirampas munsuh, lalu dua iku anak Eli, iya nya Hopni enggau Pinehas, mega mati.
12 Ba hari nya mega, siku lelaki ari raban bansa Benjamin belanda ari endur beperang lalu datai ba Siloh. Gari iya charik lalu ba pala iya bisi tanah.
13 Lebuh lelaki nya datai, Eli benung duduk ba bangku iya ba tisi jalai sambil nganti, laban iya balat irauka peti lampang batu Adat Petara ti bendar. Lelaki nya tama ngagai kuta, lalu madahka berita nya. Semua orang ba kuta nya lalu begau.
14 Lebuh Eli ninga munyi orang begau, iya lalu nanya: “Nama kebuah orang balat amat begau?” Lelaki nya pan beguai-guai mansang ngagai Eli lalu madahka berita nya ngagai iya.
15 (Maya nya, Eli beumur 98 taun, lalu mata iya enda ulih meda agi.)
16 Lelaki nya madah ngagai Eli: “Aku datai ari endur beperang. Aku baru ngerarika diri ari endur nya.” Nya alai, Eli nanya: “Nama utai udah nyadi, anak?”
17 Ku lelaki ke mai berita nya nyaut: “Orang Israel udah ngerarika diri ari orang Pilistin, lalu mayuh ari soldadu orang Israel udah mati. Anak lelaki nuan, Hopni enggau Pinehas, mega udah mati, lalu peti lampang batu Adat Petara ti bendar mega udah dirampas.”
18 Lebuh lelaki nya madah pasal peti lampang batu Adat Petara ti bendar, Eli lalu rebah telentang ke belakang ari bangku iya, ba tisi pintu penama kuta. Ketegal iya nyau udah tuai sereta gemu, pegu iya patah lalu iya mati. Iya udah nyadi hakim orang Israel pengelama 40 taun.
19 Menantu indu iya, iya nya bini Pinehas, benung ngandung lalu nyauka beranak. Maya iya ninga pasal peti lampang batu Adat Petara ti bendar udah dirampas, lalu entua lelaki iya enggau laki iya mega udah mati, perut iya ngenyit pedis lalu iya pan beranak.
20 Lebuh iya nyauka mati, bala indu ke bediri ngimbai iya bejaku enggau iya: “Anang takut. Nuan udah ngadaka siku anak lelaki.” Tang iya enda nyaut, lalu nadai nunjukka diri ninga utai ke disebut sida.
21 Taja pia, iya meri anak nya nama Ikabot.* Ku iya madah: “Mulia udah ninggalka orang Israel.” Iya nyebut baka nya laban peti lampang batu Adat Petara ti bendar udah dirampas, lalu entua lelaki iya enggau laki iya udah mati.
22 Ku iya bejaku: “Mulia udah ninggalka orang Israel, laban peti lampang batu Adat Petara ti bendar udah dirampas.”
Nota Kaki
^ Jaku Asal, “Nama kebuah Jehovah ngalahka kitai ba depan orang Pilistin seharitu?”
^ Tauka engka, “ba entara.”
^ Jaku Asal, “langkau kain.”
^ Reti nya “Dini Alai Mulia?”
