1 Samuel 5:1-12
5 Pengudah orang Pilistin ngerampas peti lampang batu Adat Petara ti bendar, sida mai peti nya ari Ebeneser ngagai Asdod.
2 Orang Pilistin ngambi lalu mai peti nya tama ngagai kuil* Dagon. Sida ngengkahka peti nya ba sepiak patung Dagon.
3 Hari siti, orang Asdod dani tumu lalu tepedaka patung Dagon labuh tingkap ba tanah, iya nya ba depan peti lampang batu Adat Jehovah. Nya alai, sida ngambi patung Dagon nya lalu ngengkahka patung Dagon nya ba endur asal iya.
4 Hari siti, sida dani tumu lalu tepedaka patung Dagon labuh tingkap baru ba tanah, ba depan peti lampang batu Adat Jehovah. Kali tu, pala patung Dagon enggau kedua-dua tapa jari iya patah lalu garing-garing ba depan pintu penama. Semina tubuh patung nya* aja ke enda patah.
5 Nya kebuah nyentukka seharitu, bala imam Dagon enggau semua orang ke tama ngagai kuil Dagon enda ngindik kawasan depan pintu penama kuil nya, iya nya endur alai patung nya labuh ba Asdod.
6 Jehovah balat amat ngukum orang Asdod. Iya ngukum Asdod enggau kawasan ke ngelingi Asdod ngena penyakit buasir.
7 Lebuh orang Asdod meda utai ke nyadi, ku sida madah: “Anang ngelakka peti lampang batu Adat Petara orang Israel nya enggau kitai agi, laban Petara sida udah balat ngukum kitai enggau Dagon, petara kitai.”
8 Nya alai, sida ngangauka semua pemerintah orang Pilistin lalu ngempuruka sida. Ku sida nanya bala pemerintah nya: “Nama utai ke patut digaga kitai enggau peti lampang batu Adat Petara orang Israel?” Ku bala pemerintah nya nyaut: “Pindahka peti nya ngagai Gat.” Sida pan lalu mindahka peti nya kin.
9 Pengudah sida mindahka peti nya ngagai Gat, Jehovah ngukum kuta nya lalu ngasuh orang ba dia begau. Iya ngenataika penyakit buasir ngagai orang ke diau ba kuta nya, enda ngira orang ke tuai tauka orang ke biak.
10 Nya alai, sida mindahka peti lampang batu Adat Petara ti bendar nya ngagai Ekron. Tang pengudah peti nya datai ba Ekron, orang ke diau ba kuta nya madah enggau nyawa ti inggar: “Sida mai peti lampang batu Adat Petara orang Israel kitu kena munuh semua kitai!”
11 Nya alai, sida ngangauka semua pemerintah orang Pilistin, lalu ngempuruka sida. Ku sida bejaku ngagai bala pemerintah nya: “Bai peti lampang batu Adat Petara orang Israel ari endur tu, lalu pulaika iya ngagai endur asal iya, ngambika kami enda mati.” Semua orang ke diau ba kuta nya takut enggaika sida mati, laban Petara ti bendar udah balat amat ngukum sida.
12 Orang ke enda dibunuh kena penyakit buasir, lalu semua orang ke diau ba kuta nya nyabak enggau nyawa ti inggar minta tulung, nyentukka nyawa sida ulih didinga sampai ke langit.
