1 Samuel 6:1-21
-
Peti lampang batu Adat dipulaika (1-21)
6 Peti lampang batu Adat Jehovah nya ba kawasan orang Pilistin pengelama tujuh bulan.
2 Orang Pilistin ngangauka bala imam enggau bala orang ke nemu betilit nasit,* lalu nanya sida: “Nama patut digaga kami ngagai peti lampang batu Adat Jehovah? Padah ngagai kami, baka ni kami ulih mulaika peti nya ngagai endur asal iya.”
3 Ku sida nyaut: “Anang mulaika peti lampang batu Adat Jehovah, Petara orang Israel, enti nadai mai utai. Kita patut nyerahka pemeri kena ngampunka penyalah kita. Nya baru kita deka gerai, lalu nemu kebuah Iya agi ngukum kita.”
4 Nya alai, orang Pilistin nanya: “Nama pemeri ke patut diserahka kami ngagai Iya kena ngampunka penyalah kami?” Ku sida nyaut: “Nitihka penyampau bala pemerintah orang Pilistin, beri lima tekang emas ke baka bentuk buasir enggau lima tekang emas ke baka bentuk tikus, laban penyakit ti sama udah ninggang tiap iku kita enggau bala pemerintah kita.
5 Kita patut ngaga patung baka buasir enggau baka tikus ke ngerusak kuta kita. Kita mega patut bebasaka Petara orang Israel. Engka Iya deka badu agi ngukum kita, petara kita, enggau kuta kita.
6 Nama kebuah kita degil baka orang Ejip enggau Firaun? Endaka Petara orang Israel udah balat ngukum sida, lalu sida terpaksa nejuka orang Israel mupuk?
7 Nya alai diatu, sediaka siti kerita sapi ti baru enggau dua iku indu sapi ke udah bisi anak sereta ke nadai kala ngesan tangkun. Udah nya, panggaika tangkun kerita nya ba sapi nya lalu tanchangka iya. Tang, kita mesti mai anak sapi nya pulai ngagai kandang.
8 Ambi peti lampang batu Adat Jehovah lalu engkahka peti nya ba atas kerita sapi nya. Udah nya, simpan patung emas ke deka diberi kita kena minta ampun ba dalam kutak ke diengkah ba sepiak peti nya. Awakka sapi nya mupuk,
9 lalu udah nya peratika: Enti peti nya dibai ngagai Bet-shemes, iya nya endur asal iya, reti iya, Petara orang Israel meh ke udah ngereja utai ti balat jai tu ngagai kitai. Tang enti peti nya enda dibai kin, kitai deka nemu ukai Iya ke ngukum kitai. Sigi penyakit nya empu ke deka datai ninggang kitai.”
10 Orang Pilistin pan lalu ngereja nya. Sida ngambi dua iku indu sapi ke udah bisi anak, lalu manggaika tangkun kerita sapi ba sapi nya lalu nanchang iya, tang sida mai anak sapi nya pulai ngagai kandang.
11 Udah nya, sida ngengkahka peti lampang batu Adat Jehovah ba kerita nya sama enggau kutak ke bisi patung tikus ke digaga ari emas enggau patung emas ke baka bentuk buasir.
12 Sapi nya bejalai terus ngagai Bet-shemes, enda limpang ke kiba tauka ke kanan. Dua iku sapi nya bemunyi lebuh bejalai. Bala pemerintah orang Pilistin nitihka sapi nya nyentuk ngagai sempadan Bet-shemes.
13 Maya nya, orang Bet-shemes benung ngetau gandum ba lebak. Lebuh sida meda peti nya, sida balat gaga ati.
14 Kerita sapi nya datai ba ladang Josua ke diau ba Bet-shemes, lalu ngetu semak sigi batu ti besai. Udah nya, sida ngererak kerita sapi nya, melah iya nyadika kayu api, lalu nyerahka sapi nya nyadika pemeri tunu ke Jehovah.
15 Orang Lewi nurunka peti lampang batu Adat Jehovah enggau kutak ke bisi patung emas, lalu ngengkahka semua nya ba atas batu ti besai nya. Ba hari nya, orang Bet-shemes nyerahka pemeri tunu enggau pemeri ke bukai ngagai Jehovah.
16 Lebuh lima iku pemerintah orang Pilistin meda nya, sida lalu mulaika diri ngagai Ekron ba hari nya mega.
17 Tu meh patung emas ke baka bentuk buasir ke dianjung orang Pilistin nyadika pemeri ngagai Jehovah, kena ngampunka penyalah kuta tu: Siti ke Asdod, siti ke Gaza, siti ke Askelon, siti ke Gat, lalu siti ke Ekron.
18 Kelimpah ari nya, penyampau patung tikus ke digaga ari emas ke dianjung sida sama enggau penyampau semua kuta ke diempu lima iku pemerintah orang Pilistin, enda ngira nya kuta ke bedinding tauka kampung ke enda bedinding.
Nyentukka seharitu, batu ti besai alai sida ngengkahka peti lampang batu Adat Jehovah udah nyadi batu pengingat. Batu nya ba ladang Josua, orang Bet-shemes.
19 Tang, Petara munuh orang Bet-shemes laban sida merening ngagai peti lampang batu Adat Jehovah. Iya udah munuh 50,070 iku orang* ari bala sida. Sida berengkah tusah ati ke pemati orang ke udah mati nya, laban Jehovah udah munuh mayuh amat orang.
20 Ku orang Bet-shemes nanya: “Sapa ulih tan datai semak Jehovah, Petara ti kudus tu? Manah agi enti Iya ninggalka kitai lalu mupuk ngagai orang bukai.”
21 Nya alai, sida nganjung orang ngagai Kiriat-jearim. Ku sida madah ngagai orang ke diau ba dia: “Orang Pilistin udah mulaika peti lampang batu Adat Jehovah. Datai kitu lalu ambi peti nya.”
Nota Kaki
^ Tauka “nemu ngereja pengawa ke ngasuh orang nemu pasal utai ke deka nyadi dudi hari.”
^ Jaku Asal, “70 iku orang, 50,000 iku orang.”
