1 Samuel 7:1-17
7 Nya alai, orang Kiriat-jearim datai lalu ngambi peti lampang batu Adat Jehovah. Sida mai peti nya ngagai rumah Abinadap ke ba atas bukit. Sida ngelantik* anak iya, Eleasar, kena nyaga peti lampang batu Adat Jehovah.
2 Peti nya lama amat ba Kiriat-jearim, iya nya pengelama 20 taun. Udah nya, semua orang Israel belabuh ngiga Jehovah.*
3 Ku Samuel bejaku ngagai semua orang Israel: “Enti kita ingin deka pulai baru ngagai Jehovah enggau pengabis ati kita, buai meh patung petara-petara bansa bukai sereta patung Astoret ari bala kita. Kuingka ati kita ngagai Jehovah. Anang bebagi ati lalu sembah meh Iya siku aja. Nya baru Iya deka nyelamatka kita ari jari orang Pilistin.”
4 Nya alai, orang Israel muai semua patung Baal enggau Astoret, lalu nyembah Jehovah siku aja.
5 Udah nya, Samuel bejaku: “Gempuruka semua orang Israel ba Mispah, lalu aku deka besampi ngagai Jehovah ngarika kita.”
6 Nya alai, sida begempuru ba Mispah. Ba hari nya, sida nyauk ai, nuangka ai nya ba depan Jehovah,* sereta bepuasa. Ba dia, sida madah: “Kami udah bedosa ngelaban Jehovah.” Samuel belabuh nyadi hakim orang Israel ba Mispah.
7 Lebuh orang Pilistin ninga orang Israel begempuru ba Mispah, bala pemerintah orang Pilistin mansang nyerang orang Israel. Maya orang Israel ninga nya, sida lalu takut.
8 Ku orang Israel bejaku ngagai Samuel: “Anang ngetu besampi ngagai Jehovah, Petara kitai, ngambika Iya nulung sereta nyelamatka kitai ari jari orang Pilistin.”
9 Nya alai, Samuel ngambi siku anak bedus lalu nyerahka jelu nya nyadika pemeri tunu ngagai Jehovah. Udah nya, Samuel besampi ngagai Jehovah kena minta tulung ngarika orang Israel, lalu Jehovah nyaut sampi iya.
10 Lebuh Samuel benung nyerahka pemeri tunu nya, orang Pilistin nyerang orang Israel. Tang ba hari nya mega, Jehovah ngenataika guntur ari langit kena ngelaban orang Pilistin, lalu Iya ngasuh orang Pilistin charut nyentukka orang Israel ulih ngalahka sida.
11 Orang Israel pansut ari Mispah, begagaika orang Pilistin, lalu munuh sida nyentuk ngagai selatan Bet-kar.
12 Udah nya, Samuel ngambi sigi batu lalu ngengkahka batu nya ba entara Mispah enggau Jeshanah, lalu batu nya diberi iya nama Ebeneser.* Samuel madahka: “Sampai diatu Jehovah nulung kitai.”
13 Baka nya meh orang Pilistin dialahka. Sida enda agi tama ngagai kawasan orang Israel. Sekumbang Samuel agi idup, Jehovah majak ngelaban orang Pilistin.
14 Kelimpah ari nya, semua kuta ke dirampas orang Pilistin udah dipulaika baru ngagai orang Israel, ari Ekron sampai ngagai Gat, lalu orang Israel bulih baru kawasan sida ari orang Pilistin.
Maya nya mega, orang Israel enggau orang Amor diau bebaik enggau pangan diri.
15 Samuel mengkang nyadi hakim orang Israel sepemanjai pengidup iya.
16 Ninting taun, iya ngagai Bethel, Gilgal, enggau Mispah. Iya nyadi hakim orang Israel ba semua endur nya.
17 Tang, iya deka pulai ngagai rumah iya ba Ramah. Ba dia, iya nyadi hakim orang Israel sereta mega nirika siti alta ke Jehovah.
Nota Kaki
^ Jaku Asal, “nguduska.”
^ Tauka “ngiga Jehovah sambil nyabak.”
^ Nya merujuk ngagai pengawa kena nunjukka sesiku orang nesal ati ke penyalah diri.
^ Reti nya “Batu ke Nulung.”
