1 Samuel 8:1-22
8 Lebuh Samuel nyau udah tuai, iya ngelantik bala anak lelaki iya nyadi hakim ke orang Israel.
2 Anak iya ke tuai benama Joel, lalu iya ti kedua benama Abijah. Seduai iya nyadi hakim ba Beer-sheba.
3 Tang, seduai iya enda nitihka teladan apai seduai iya. Seduai iya rindu ngulihka penguntung ngena chara ti enda jujur, nerima rasuah, sereta ngakim enggau chara ti enda adil.
4 Udah nya, semua tuai orang Israel begempuru lalu mansang betemu enggau Samuel ba Ramah.
5 Ku sida bejaku enggau iya: “Nuan nyau udah tuai, lalu bala anak nuan enda nitihka teladan nuan. Nya alai, lantik siku raja ke kami kena ngakim kami baka bansa bukai.”
6 Tang Samuel enda nyamai ati lebuh sida madahka: “Beri kami siku raja nyadi hakim kami.” Nya alai, Samuel besampi ngagai Jehovah.
7 Ku Jehovah bejaku enggau Samuel: “Pendingka semua utai ke dipinta sida. Ukai nuan ke enda diterima sida, tang Aku ke enda diterima sida nyadi raja.
8 Kenyau ari Aku udah mai sida pansut ari menua Ejip nyentukka seharitu, sida seruran ngereja utai ti sama. Sida suah amat udah ninggalka Aku, lalu nyembah petara bukai. Diatu, nya meh utai ke digaga sida ngagai nuan.
9 Pendingka utai ke dipinta sida. Tang nuan mesti meri amaran ti berat ngagai sida. Padah ngagai sida hak raja lebuh iya merintah sida.”
10 Nya alai, Samuel lalu madahka semua jaku Jehovah ngagai orang ke minta siku raja ari iya.
11 Ku iya madahka: “Tu meh hak raja ke deka merintah kita: Iya deka ngambi anak lelaki kita lalu ngasuh sida ngemudika kerita kuda iya, nyadi soldadu ke nepan kuda, lalu sida ti bukai deka belanda ba depan kerita kuda iya.
12 Iya deka ngelantik tuai atas 1,000 iku orang enggau tuai atas 50 iku orang. Sekeda orang deka ngeradu tanah ba ladang iya, ngetau utai ti ditanam ba ladang iya, sereta begagaka senyata perang enggau perengka ke kerita kuda iya.
13 Iya deka ngambi anak indu kita ngambika ngaga minyak wangi ke iya, nyadi tukang masak ke iya, sereta ngaga roti ke iya.
14 Iya deka ngambi tanah, ladang anggur, enggau kebun buah kana kita ti pemadu manah, lalu meri utai nya ngagai bala pemesai iya.
15 Iya mega deka ngambi 10 peratus asil bijirin enggau asil buah anggur ke diulih kita, lalu iya deka meri utai nya ngagai bala pegawai ke gawa ke iya enggau ngagai bala penulung iya.
16 Iya deka ngambi ulun kita ke lelaki enggau ke indu, sapi kita ti pemadu manah, sereta keledai kita kena ngereja pengawa ke iya.
17 Iya deka ngambi 10 peratus ari bedus enggau kambin kita, lalu kita empu deka nyadi ulun iya.
18 Maya deka datai alai kita deka besebana ketegal raja ti udah dipilih kita. Tang Jehovah enda pedulika kita.”
19 Tang sida enggai mendingka Samuel. Ku sida: “Enda ngawa nya! Kami tetap dekaka siku raja merintah kami.
20 Kami ka nyadi baka semua bansa bukai. Raja kami deka ngakim kami, nguluka kami, sereta beperang ngarika kami.”
21 Pengudah Samuel ninga semua utai ke disebut sida, iya lalu madahka semua jaku sida ngagai Jehovah.
22 Ku Jehovah bejaku ngagai Samuel: “Pendingka utai ke dipinta sida lalu lantik siku raja ngambika merintah sida.” Udah nya, Samuel bejaku ngagai sida: “Pulai meh ngagai kuta kita.”
