Satu Tesalonika 3:1-13
3 Nya alai, lebuh kami nyau enda ulih natka diri lelengauka kita, kami berunding manah agi enti kami terus diau ba Atens,
2 lalu nganjung Timoti ngagai kita. Iya menyadi kitai sereta ulun Petara* ke nusui Berita Manah pasal Kristus. Kami nganjung iya ngambika iya negapka kita sereta ngelantangka ati kita, ngambika pengarap kita nyadi kering.
3 Enggau nya, nadai siku pan ari kita nyadi lemi* ketegal napi penusah tu. Kita empu nemu, kitai enda ulih nyeliahka diri ari pemerinsa ke baka nya.*
4 Lebuh kami enggau kita, kami suah madah tumu ngagai kita, pasal kitai deka napi pemerinsa, lalu kita empu nemu utai nya sigi amat nyadi.
5 Nya meh kebuah lebuh aku nyau enda ulih natka diri lelengauka kita, aku nganjung Timoti ngagai kita, kena nemu sekalika kita agi tetap ati tauka enda, laban aku irau enggaika Sitan udah nguji kita, lalu ngujungka kami lebu ngapa bebendar gawa.
6 Tang diatu, Timoti baru udah pulai kitu pengudah iya nemuai ngagai kita, lalu iya udah mai berita manah pasal penetap ati sereta pengerindu kita. Iya mega madahka, kita suah ngenang pasal kami, lalu keran amat deka betemu enggau kami, baka kami ke keran amat deka betemu enggau kita.
7 Nya alai, bala menyadi, lebuh kami napi semua penusah enggau pemerinsa, ati kami lantang ketegal kita sereta ketegal penetap ati kita.
8 Kami nyadi kering baru* enti kita bediri tegap nyadi nembiak Tuan kitai.
9 Baka ni ku kami ulih meri terima kasih ti chukup ngagai Petara, ke semua pengaga ti diasaika kami ba mua Petara ketegal kita?
10 Siang enggau malam kami bebendar besampi ngambika kami ulih betemu enggau kita, lalu meri utai ke diguna kena negapka pengarap kita.
11 Ngarapka Petara ti Apai kitai enggau Tuan Jesus muka jalai ngambika kami ulih datai ngagai kita.
12 Nambahka nya, ngarapka Tuan kitai ngasuh pengerindu kita majak nambah. Au, ngambika kita ngembuan chukup mayuh pengerindu ke pangan diri sereta ke semua orang, sama baka pengerindu kami ke kita.
13 Enggau nya, iya deka ngasuh ati kita kering, nadai bepenyalah, sereta kudus, ba mua Petara ti Apai kitai lebuh Tuan kitai, Jesus, pulai baru enggau semua nembiak iya ti kudus.*
Nota Kaki
^ Tauka engka, “sereta ke sama gawa enggau Petara.”
^ Tauka “beguyat.”
^ Tauka “kitai udah dipilih napi utai tu.”
^ Jaku Asal, “Kami idup.”
^ Tauka “Jesus, enggau semua nembiak iya ti kudus bisi enggau kitai.” Jaku Gerika, “parousia.” Peda Penerang Leka Jaku, “Parousia.”
