Satu Timoti 1:1-20
1 Aku, Paul, ke nyadi rasul Jesus Kristus, diasuh Petara ti Penyelamat kitai sereta Jesus Kristus ke dikearapka kitai,
2 nulis surat tu ngagai Timoti,* ke baka anak aku empu sereta ke sama arap enggau aku:
Ngarapka nuan bulih pemanah ati ti besai, pengasih, sereta pengelantang ari Petara ti Apai kitai sereta ari Tuan kitai, Jesus Kristus.
3 Suba, aku udah meransang nuan terus diau ba Epesus lebuh aku deka mupuk ngagai Masedonia. Diatu, aku mega meransang nuan ngereja utai ti sama, ngambika nuan ulih ngerara sekeda orang awakka sida enda nusui ajar ti pelesu,
4 tauka beratika cherita ti bula sereta mansik pasal tusut peturun. Semua nya nadai guna, lalu semina ngasuh orang nyebut utai tang nadai bukti. Nya nadai kaul enggau utai ti disediaka Petara kena negapka pengarap kitai.
5 Kebendar iya, pesan* tu diberi ngambika kitai ngembuan pengerindu ti datai ari ati ti tuchi, ari ati* ti beresi, sereta ari pengarap ke enda diayanka enggau pura-pura.
6 Tang, sekeda orang limpang ari pekara tu lalu enggau orang berandauka utai ti nadai reti.
7 Sida deka nyadi pengajar adat, tang sida enda meretika utai ke disebut diri tauka utai ke diajar sida enggau balat andal.
8 Kitai nemu, Adat nya endang manah enti iya dikena enggau chara ti patut.
9 Adat ukai digaga ke orang ti lurus, tang ke orang ti ngelanggar adat sereta ke rindu ngelaban, orang ke enda nangika Petara sereta ke bedosa, orang ke enda tetap ati,* orang ke ngamahka utai ti tuchi, orang ke munuh apai indai tauka orang bukai,
10 orang ke ngereja ulah seks ti kamah,* lelaki ke ngereja ulah seks enggau lelaki bukai,* orang ke nabanka orang bukai,* orang ke bula, orang ke ngelanggar sumpah, sereta orang ke ngereja semua utai ti ngelaban ajar ti manah.*
11 Ajar nya sejalai enggau Berita Manah ti bemulia pasal Petara ti gaga ati, lalu aku udah diberi pengawa nusui Berita Manah tu.
12 Aku beterima kasih ngagai Tuan kitai, Jesus Kristus, ke meri aku kuasa, laban iya ngumbai aku tetap ati sereta meri aku pengawa ti kudus,
13 taja pan suba aku bejaku ngelaban Petara, merinsaka bala nembiak Iya, sereta enda bebasaka orang. Maya nya, aku enda sedarka pengawa diri lalu enda arap. Taja pia, Kristus mandangka pengasih ngagai aku.
14 Tuan kitai mandangka pemanah ati ti chukup besai amat ngagai aku, lalu nulung aku arapka Iya sereta nerima pengerindu ari Jesus Kristus.
15 Jaku tu ulih dikearapka lalu patut diterima enggau pengabis ati. Jesus Kristus datai ke dunya kena nyelamatka orang ke bedosa. Ari semua sida, aku meh ke pemadu balat bedosa.
16 Taja pan aku orang ke pemadu balat bedosa, tang Jesus Kristus mandangka pengasih ngagai aku kena nunjukka iya balat sabar. Enggau nya, aku nyadi teladan ke orang ti arapka iya, ngambika bulih pengidup ti meruan belama iya.
17 Ngarapka Raja ke meruan belama iya, ke enda nemu mati, ke enda ulih dipeda, sereta Petara ti siku aja diberi basa enggau mulia belama iya. Amin.
18 Aku meri pesan* tu ngagai nuan, anak aku Timoti. Pesan tu sejalai enggau jaku bala nabi ke udah nyebut pasal nuan, ngambika nengah jaku nya, nuan ulih terus belaban enggau manah baka siku soldadu,
19 lalu ngetanka pengarap sereta ati* ti beresi. Sekeda orang udah enda ibuhka ati* sida, nyentukka pengarap sida anchur baka kapal ti karam.
20 Sekeda ari sida nya, nyengkaum Himinius enggau Aleksander, lalu aku udah nyerahka seduai iya ngagai Sitan,* ngambika seduai iya kena disiplin awakka enda agi bejaku ngelaban Petara.
Nota Kaki
^ Reti nya “Iya ti Bebasaka Petara.”
^ Tauka “iring.”
^ Jaku Gerika, “sy·neiʹde·sis.” Peda Penerang Leka Jaku, “Sy·neiʹde·sis.”
^ Tauka “enda tetap ati ngayanka pengerindu.”
^ Peda Penerang Leka Jaku.
^ Tauka “lelaki ke ngereja pengawa homoseksual.”
^ Tauka “penculik.”
^ Tauka “ti mai penguntung.”
^ Tauka “iring.”
^ Jaku Gerika, “sy·neiʹde·sis.” Peda Penerang Leka Jaku, “Sy·neiʹde·sis.”
^ Jaku Gerika, “sy·neiʹde·sis.” Peda Penerang Leka Jaku, “Sy·neiʹde·sis.”
^ Reti iya, seduai iya dibuai ari raban gempuru.
