Bansa Israel ti Kedua 13:1-22
13 Ba taun ti ke-18 Raja Jeroboam merintah, Abijah nyadi raja Judah.
2 Iya merintah ba Jerusalem pengelama tiga taun. Indai iya benama Mikaiah, iya nya anak indu Uriel, ari Gibeah. Maya nya, Abijah enggau Jeroboam beperang ngelaban pangan diri.
3 Abijah mupuk beperang mai 400,000 iku bala soldadu ti kering sereta ke udah dilatih. Jeroboam mai 800,000 iku bala soldadu ti kering sereta ke udah dilatih, lalu ngatur barisan soldadu nya kena ngelaban Abijah.
4 Abijah niki ngagai Gunung Semaraim, ke ba kawasan begunung Efraim, lalu bejaku: “O Jeroboam enggau semua orang Israel, pendingka aku!
5 Kati kita enda nemu Jehovah, Petara orang Israel, udah meri perintah Israel ngagai David sereta bala peturun iya belama iya? Iya udah ngaga sempekat ti meruan* enggau David.
6 Tang Jeroboam anak Nebat, ulun Solomon anak David, angkat ngelaban tuan iya.
7 Bala orang ke nadai pengawa sereta ke nadai guna majak nitihka iya. Pengujung iya, sida ulih ngalahka Rehoboam anak Solomon. Maya nya, Rehoboam agi biak sereta takut, lalu iya enda telabanka sida.
8 “Kati kita ngumbai diri ulih telabanka perintah Jehovah ke udah diberi ngagai peturun David? Taja pan penyampau kita mayuh, tauka bisi patung anak sapi emas ke digaga Jeroboam nyadika petara kita, anang ngumbai diri ulih menang.
9 Kita udah muru bala imam Jehovah, iya nya bala peturun Aron enggau orang Lewi. Udah nya, kita ngelantik imam ke diri empu baka ke digaga bansa bukai. Kita nerima sapa-sapa ke datai mai siku anak sapi lelaki enggau tujuh iku bedus lelaki, lalu ngelantik orang nya nyadi imam ke petara pelesu.
10 Ba kami, Jehovah nya Petara kami. Kami enda ninggalka Iya. Bala imam kami ari peturun Aron, lalu sida gawa ke Jehovah. Sida ditulung orang Lewi.
11 Ninting pagi enggau lemai, sida nyerahka pemeri tunu nyentukka asap niki ke atas ngagai Jehovah. Sida mega nunu menyan ti bebau rengut, ngengkahka roti ti belapis* ba atas mija ke digaga ari emas ti tulin, sereta ngidupka api ba penuduk lampu emas ninting lemai. Kami bejalaika pengawa kami ngagai Jehovah, Petara kami, tang kita ninggalka Iya.
12 Peda kita! Petara ti bendar bisi enggau kami, lalu Iya benung ngiring kami. Bala imam Iya nyepu terumpit nyadika tanda perang ngelaban kita. Kita orang Israel, anang ngelaban Jehovah, Petara aki ini kita. Kita tentu enda ulih menang!”
13 Tang, Jeroboam ngasuh sekeda ari bala soldadu iya nyerang bala soldadu Judah ari belakang. Reti nya, sida nyerang bala soldadu Judah ari depan enggau ari belakang.
14 Lebuh bala soldadu Judah malik ke belakang, sida nyau nemu sida diserang ari depan enggau belakang. Nya alai, sida belabuh ngangauka Jehovah, lalu ba maya ti sama, bala imam nyepu terumpit enggau inggar.
15 Udah nya, bala soldadu Judah manjung ngasuh mansang beperang. Maya sida manjung, Petara ti bendar ngalahka Jeroboam enggau semua soldadu Israel ba depan Abijah enggau bala soldadu Judah.
16 Bala soldadu Israel ngerarika diri ari bala soldadu Judah, lalu Petara nyerahka sida ngagai orang Judah.
17 Abijah enggau bala soldadu iya munuh mayuh amat orang Israel. Sida munuh 500,000 iku bala soldadu Israel ke udah dilatih.
18 Nya alai, orang Judah menang ngelaban orang Israel, laban sida bepanggai ba Jehovah, Petara aki ini sida.
19 Abijah majak begagaika Jeroboam lalu ngerampas kuta-kuta enggi Jeroboam, iya nya Bethel enggau kuta-kuta mit ke ngelingi iya, Jeshanah enggau kuta-kuta mit ke ngelingi iya, sereta Efrain enggau kuta-kuta mit ke ngelingi iya.
20 Maya jeman Abijah, Jeroboam enda ulih ngemulaika baru kuasa perintah iya. Pengujung iya, Jehovah munuh Jeroboam.
21 Perintah Abijah majak kering. Iya bisi 14 iku bini sereta 22 iku anak lelaki enggau 16 iku anak indu.
22 Sejarah bukai pasal Abijah, iya nya pasal pengawa iya enggau jaku iya, udah ditulis Nabi Ido.
