Bansa Israel ti Kedua 16:1-14
16 Ba taun ke-36 Assa merintah, Raja Baasa ari Israel nyerang Judah lalu berengkah nirika baru* kuta Ramah, ngambika nadai sapa-sapa pan ke ulih pansut tauka tama ngagai kawasan Assa, raja Judah.
2 Nya alai, Assa ngambi pirak enggau emas ari endur nyimpan reta ba Rumah Jehovah sereta ba istana raja, lalu nyerahka semua nya ngagai Ben-hadad, iya nya raja Siria, ke diau ba Damaskus. Assa ngirumka pesan tu ngagai Ben-hadad:
3 “Bisi sempekat entara aku enggau nuan, sereta entara apai aku enggau apai nuan. Semua pirak enggau emas tu ke nuan. Kinsil sempekat ke digaga nuan enggau Raja Baasa ari Israel, ngambika iya mupuk ari kawasan aku.”
4 Ben-hadad mendingka jaku Raja Assa, lalu nganjung beberapa iku ketuai soldadu iya nyerang kuta-kuta Israel. Sida ngalahka Ijon, Dan, Abel-maim, enggau semua kuta alai nyimpan barang ba Naptali.
5 Lebuh Baasa ninga pasal utai nya, iya tekala nya ngetuka pengawa nirika* kuta Ramah lalu ngelengkaka pengawa nya.
6 Udah nya, Raja Assa ngangauka semua orang Judah, lalu ngasuh sida ngangkut batu enggau kayu ti dikena Baasa nirika baru* kuta Ramah. Iya ngena semua utai nya nirika baru kuta Geba enggau kuta Mispah.
7 Maya nya, Nabi Hanani betemu enggau Assa, raja Judah, lalu madah: “Ketegal tuan bepanggai ba raja Siria, ukai ba Jehovah, Petara tuan, nya alai tuan lenyau peluang ngalahka bala soldadu Siria.
8 Suba, ukai enda bala soldadu Etiopia enggau Libia mayuh amat, lalu sida bisi mayuh kerita kuda enggau bala soldadu ke nepan kuda? Maya nya, ketegal tuan bepanggai ba Jehovah, nya alai Iya nyerahka sida ngagai tuan.
9 Mata Jehovah seruran beratika serata dunya, laban Iya deka nunjukka pengering Iya ke* orang ti nyembah Iya enggau pengabis ati. Tang diatu, tuan udah ngereja utai ti beli. Nya alai, berengkah ari diatu tuan deka seruran beperang.”
10 Assa lalu pedis ati sereta balat amat ringat ngagai nabi nya lalu ngejil iya.* Assa mega berengkah merinsaka sekeda rayat iya.
11 Sejarah pasal pengidup Assa, ari pun sampai ujung, bisi ditulis dalam Bup Bala Raja Judah enggau Israel.
12 Ba taun ke-39 Assa merintah, kaki iya kena penyakit lalu ngujungka iya empu nyau sakit raya. Taja pia, iya nadai minta tulung ari Jehovah, tang iya minta tulung ari orang ke nemu berubat.
13 Pengujung iya, Assa mati ba taun ke-41 iya merintah.
14 Iya dikuburka ba Kuta David. Kubur iya amat lawa, lalu iya empu ke ngaga kubur nya. Bangkai iya digalika ba endur ke penuh enggau minyak balsam, rempah ke udah di champur, enggau minyak wangi ke digaga khas. Kelimpah ari nya, sida mega nungkun api ti mau kena nunjukka basa ngagai iya.*
Nota Kaki
^ Tauka “negapka.”
^ Tauka “negapka.”
^ Tauka “negapka.”
^ Tauka “pengering Iya kena nulung.”
^ Tauka “iya nganchin nabi nya ngena kanchin kayu.”
^ Tu merujuk ngagai pengawa nunu rempah, ukai pengawa nunu bangkai Assa.
