Bansa Israel ti Kedua 2:1-18
-
Nyediaka utai kena ngaga Rumah Petara (1-18)
2 Solomon meri pesan ngasuh nirika siti Rumah kena ngemuliaka nama Jehovah sereta siti istana ke raja.
2 Solomon milih 70,000 iku pekereja ke ngangkut utai ti berat, 80,000 iku orang mutung batu ba kawasan ke begunung, enggau 3,600 iku orang ke ngemataka bala pekereja nya.
3 Solomon lalu ngirumka pesan tu ngagai Hiram, raja ari Tirus: “Suba, tuan udah ngirumka kayu sidar ngagai apai aku, David, kena ngaga siti istana alai diau. Diatu kereja meh utai ti sama ke aku.
4 Aku deka ngaga siti Rumah kena ngemuliaka nama Jehovah, Petara aku. Aku deka nguduska Rumah nya ke Iya. Aku mega deka ngengkahka roti ti belapis* sereta nunu menyan ti bebau rengut ba depan Iya. Aku deka nyerahka pemeri tunu ninting pagi enggau lemai, maya Hari Sabat, maya pengerami bulan baru, sereta maya pengerami bukai ke Jehovah, Petara kami. Nya meh utai ke patut seruran digaga orang Israel.
5 Aku deka ngaga siti Rumah ti besai, laban Petara kami besai agi ari petara bukai.
6 Sapa ke sanggup ngaga Rumah ke Iya? Indah serata langit pan enda chukup besai ke Iya. Sapa meh aku tu nyentukka aku ulih ngaga Rumah ke Iya? Aku semina ulih ngaga endur alai nyerahka pemeri tunu nyentukka asap niki ke atas ngagai Iya.
7 Anjung mega siku tukang ke landik ngaga utai ngena emas, pirak, temaga, besi, enggau kain ke digaga ari ubung ke bewarna ungu, mirah, enggau biru. Tukang nya mega patut nemu ngukir. Iya deka gawa ba Judah enggau ba Jerusalem begulai enggau bala tukang ke landik ke bukai, ke udah dipilih apai aku David.
8 Anjung mega kayu sidar, juniper, enggau algum* ari Lebanon. Aku nemu bala rayat tuan landik nebang pun kayu ba Lebanon. Bala rayat aku deka gawa enggau bala rayat tuan.
9 Sida deka nyediaka mayuh amat kayu ke aku laban aku deka nirika siti Rumah ti besai sereta ngalitka ati.
10 Aku deka nyediaka pemakai ke bala rayat tuan ke nebang pun kayu. Aku deka nyediaka 3.2 juta kilogram* gandum, 2.6 juta kilogram barli, 440,000 liter* wain, enggau 440,000 liter minyak.”
11 Nya alai, Raja Hiram ari Tirus ngirumka surat ngagai Solomon: “Ketegal Jehovah rinduka nembiak Iya, nya alai Iya ngelantik tuan nyadi raja sida.”
12 Ku Hiram nyambung: “Awakka Jehovah, Petara orang Israel, ke udah ngaga langit enggau dunya dipuji, laban Iya udah meri Raja David anak ke bepenemu-dalam, pintar, sereta ulih meretika utai. Iya deka ngaga siti Rumah ke Jehovah sereta siti istana ke raja.
13 Aku deka nganjung Hiram-abi, iya nya siku tukang ke landik sereta bepengalaman.
14 Indai iya ari raban bansa Dan, lalu apai iya ari Tirus. Hiram-abi amat landik ngaga utai ari emas, pirak, temaga, besi, batu, kayu, enggau kain ke digaga ari ubung ke bewarna ungu, biru, enggau mirah sereta kain ti alus. Iya mega ulih ngaga semua macham bentuk ukiran ke diberi ngagai iya. Iya deka gawa begulai enggau bala tukang ke landik ke udah dipilih apai tuan, David, sereta bala tukang ke landik ke dipilih tuan empu.
15 Anjung meh gandum, barli, minyak, enggau wain ke udah disemayaka tuan.
16 Kami deka nebang pun kayu ba Lebanon nitihka penyampau ke diguna tuan. Kayu nya deka ditanchang nyadi rakit lalu dianyutka sampai ngagai Jopa. Ari endur nya, tuan ulih ngangkut kayu nya ngagai Jerusalem.”
17 Udah nya, Solomon ngitung semua orang asing ke bisi ba Israel, baka ke udah digaga apai iya David. Semua penyampau sida 153,600 iku.
18 Nya alai, Solomon milih 70,000 iku pekereja ke ngangkut utai ti berat, 80,000 iku orang mutung batu ba kawasan ke begunung, enggau 3,600 iku orang ke ngemataka bala pekereja nya.
Nota Kaki
^ Iya nya, roti ti diberi ngagai Petara.
^ Kayu ti berega ke dikena ngasilka barang ti bekualiti.
^ Jaku Asal, “20,000 kor.” Peda Rujukan B14.
^ Jaku Asal, “20,000 bath.” Peda Rujukan B14.
