Bansa Israel ti Kedua 23:1-21
23 Ba taun ti ketujuh, Jehoyada ngereja utai enggau berani. Iya ngaga sempekat enggau bala ketuai atas 100 iku orang. Bala ketuai nya Asariah anak Jeroham, Ismail anak Jehohanan, Asariah anak Obet, Maseyah anak Adayah, enggau Elisapat anak Sikri.
2 Udah nya, sida ngagai serata Judah ngempuruka bala tuai suku Israel enggau orang Lewi ari semua kuta Judah. Lebuh sida datai ba Jerusalem,
3 sida ngaga sempekat enggau Raja Jehoas ba Rumah Petara ti bendar. Udah nya, Jehoyada madah ngagai sida:
“Anak raja mesti merintah, baka ke udah disemayaka Jehovah pasal peturun David.
4 Tu meh utai ke patut digaga kita: Satu pertiga ari bala imam enggau orang Lewi ke mesti gawa maya Hari Sabat, deka bejaga ba pintu,
5 satu pertiga agi deka bejaga ba istana raja, lalu satu pertiga da agi deka bejaga ba Pintu Pugu. Semua orang deka begempuru ba laman Rumah Jehovah.
6 Anang ngelakka sapa-sapa pan tama ngagai Rumah Jehovah, kelimpah ari bala imam enggau orang Lewi ke bekereja ba dia. Sida tau tama laban sida udah dikuduska. Semua rayat mesti bejalaika tanggungjawap sida ngagai Jehovah.
7 Orang Lewi mesti ngelingi raja, lalu tiap iku kita mesti megai senyata. Barang sapa ke nguji ngerenchah tama ngagai Rumah Petara mesti dibunuh. Titihka raja enda ngira kini ke penunga iya.”*
8 Orang Lewi enggau semua orang Judah ngereja utai ke diasuh Imam Jehoyada. Nyadi, tiap iku sida mai bala sida ke gawa maya Hari Sabat enggau sida ke enda gawa maya Hari Sabat, laban Imam Jehoyada ngasuh sida terus gawa.
9 Udah nya, Imam Jehoyada meri bala ketuai nya sangkuh, terabai ti mit,* enggau terabai segala ke enggi Raja David, ke bisi ba Rumah Petara ti bendar.
10 Udah nya, iya ngasuh sida megai senyata sida lalu bejaga ba kawasan sida empu. Sida bejaga ngelingi raja. Sida bediri ba depan Rumah Sembiang lalu bejaga ari sepiak kanan ngagai sepiak kiba Rumah nya. Sekeda sida bejaga semak alta enggau semak Rumah nya.
11 Udah nya, sida mai anak raja pansut. Sida ngengkahka makota enggau gulung surat ke bisi Adat Petara ba atas pala anak raja nya. Jehoyada enggau bala anak iya nata iya lalu ngelantik iya nyadi raja. Udah nya, ku sida: “Idup raja!”
12 Lebuh Ataliah ninga munyi orang belanda enggau munyi orang muji raja, iya jampat-jampat datai ngagai bala orang nya ba Rumah Jehovah.
13 Udah nya, iya meda raja bediri ba sepiak tiang semak enggau pintu penama. Bala tuai enggau bala orang ke nyepu terumpit bisi enggau raja. Semua orang ba menua nya amat gaga ati lalu nyepu terumpit. Bala penyanyi ke mai perengka musik ngiring ba pengawa belagu meri puji. Nya alai, Ataliah pan nyarikka gari iya lalu manjung: “Sida ngelaban! Sida ngelaban!”
14 Imam Jehoyada lalu ngangauka bala ketuai atas 100 iku orang nya (iya nya bala ketuai soldadu): “Bai iya pansut! Enti bisi orang nitihka iya, bunuh orang nya ngena pedang!” Nya ketegal Imam Jehoyada kala madah: “Anang munuh Ataliah ba Rumah Jehovah.”
15 Sida pan nangkap Ataliah. Sida mai iya ngagai Pintu Kuda ba istana. Iya lalu dibunuh ba dia.
16 Udah nya, Jehoyada ngaga siti sempekat entara iya, bala rayat, enggau raja, ngambika sida mengkang nyadi nembiak Jehovah.
17 Udah nya, semua orang datai ngagai kuil Baal, lalu sida ngeruntuhka kuil nya. Alta enggau patung Baal dianchurka sida, lalu sida munuh imam Baal ke benama Matan ba depan alta.
18 Udah nya, Jehoyada ngelantik bala imam enggau orang Lewi ngemataka Rumah Jehovah, nitihka raban ke udah ditetapka David. Sida patut gawa ba Rumah Jehovah sereta nyerahka pemeri tunu ngagai Jehovah nitihka utai ke udah ditulis ba Adat Moses. Sida mega patut belagu enggau gaga ati, baka ke udah ditetapka David.
19 Kelimpah ari nya, Jehoyada ngengkahka bala jejaga ba pintu-pintu Rumah Jehovah ngambika orang ke enda tuchi enda tama ngagai Rumah nya.
20 Iya mega ngasuh bala ketuai atas 100 iku orang, bala orang ke tinggi pangkat, bala pemerintah, enggau semua orang ba menua nya mupuk sama enggau raja ari Rumah Jehovah ngagai istana. Sida tama ngagai istana nengah Pintu Penama Atas. Udah nya, Jehoas duduk ba kerusi diraja.
21 Semua orang ba menua nya amat gaga ati, lalu kuta nya nadai agi pengachau, laban Ataliah udah dibunuh ngena pedang.
Nota Kaki
^ Jaku Asal, “lebuh iya pansut sereta lebuh iya tama.”
^ Kesuah iya, terabai tu dibai orang ke nimbakka anak panah.
