Bansa Israel ti Kedua 25:1-28
25 Amasiah beumur 25 taun lebuh iya nyadi raja, lalu iya merintah ba Jerusalem pengelama 29 taun. Indai iya, Jehoadan, datai ari Jerusalem.
2 Amasiah terus ngereja utai ti betul ba mata Jehovah, tang iya enda ngereja nya enggau pengabis ati.
3 Lebuh Amasiah nyau udah tegap megai perintah, iya lalu terus munuh bala pegawai ke udah munuh apai iya ke nyadi raja sebedau tu.
4 Taja pia, iya enda munuh bala anak sida. Pengawa iya sejalai enggau pesan Jehovah ke ditulis ba Adat Moses: “Apai enda patut mati ketegal dosa anak, lalu anak enda patut mati ketegal dosa apai. Tiap iku orang patut mati ketegal dosa diri.”
5 Udah nya, Amasiah ngempuruka orang Judah lalu ngasuh sida bediri nitihka suku sida empu ba baruh iring tuai atas 1,000 iku orang enggau tuai atas 100 iku orang. Nya meh utai ke digaga iya ngagai semua orang Judah enggau Benjamin. Lebuh iya ngerejista sida ke beumur 20 taun ke atas, iya beratika iya bisi 300,000 iku soldadu ke udah dilatih ke ulih enggau beperang, lalu sida mega landik ngena sangkuh enggau terabai ti besai.
6 Iya mega ngupah 100,000 iku soldadu ti kering ari Israel ngena rega 100 talenta* pirak.
7 Tang, siku nembiak Petara ti bendar datai betemu enggau iya lalu madah: “Anang mai soldadu Israel mupuk enggau nuan, tuan, laban Jehovah nadai enggau orang Israel. Iya nadai enggau bala peturun Efraim.
8 Mupuk meh kita kediri beperang. Tuan mesti berani, laban enti tuan arapka mensia lalu minta tulung ari orang Israel, Petara ti bendar deka ngasuh tuan labuh ba depan munsuh, laban Petara bisi kuasa kena nulung sereta kuasa kena ngasuh orang labuh.”
9 Pengudah ninga nya, Amasiah nanya nembiak Petara ti bendar nya: “Tang, baka ni enggau 100 talenta pirak ke udah diberi aku ngagai soldadu Israel deh?” Ku nembiak Petara ti bendar nya nyaut: “Jehovah ulih meri tuan mayuh agi ari nya.”
10 Nya alai, Amasiah ngasuh bala soldadu ari Efraim nya pulai. Sida balat pedis ati ngagai orang Judah lalu pulai enggau ati ti balat ringat.
11 Udah nya, Amasiah ngemeranika diri ngiring bala soldadu iya ngagai Lebak Garam. Iya munuh 10,000 iku soldadu Seir,
12 lalu nangkap 10,000 da agi soldadu ke agi idup. Bala soldadu ke agi idup nya dibai ngagai tebing bukit, lalu dibuai ke baruh sampai tubuh sida nyau redak.
13 Tang, bala soldadu ke diasuh Amasiah pulai tadi, ke enda enggau beperang, nyau nyerang kuta-kuta Judah ari Samaria sampai ngagai Bet-horon. Sida ngerampas mayuh amat utai sereta munuh 3,000 iku orang.
14 Tang pengudah Amasiah munuh orang Edom, iya pulai mai petara-petara orang Seir. Iya berengkah besugang nyembah petara-petara nya, lalu nunu pemeri ke petara-petara nya nyentukka asap niki ke atas.
15 Ketegal nya, Jehovah balat ringat ngagai Amasiah. Nya alai, Iya nganjung siku nabi betemu enggau Amasiah. Ku nabi nya: “Nama kebuah tuan nyembah petara-petara bansa bukai ke enda ulih nyelamatka nembiak sida ari tuan?”
16 Lebuh nabi nya agi benung bejaku, raja lalu ngelampat jaku iya: “Kemaya aku ngelantik nuan nyadi penasihat* aku? Badu agi bejaku enti nuan enggai dibunuh!” Nabi nya pan alu enda bemunyi. Tang sebedau iya mupuk, ku nabi nya: “Tuan udah nyembah patung lalu enda pedulika jaku aku. Ketegal nya, Petara udah ngaga pemutus deka ngemunaska tuan.”
17 Pengudah Raja Amasiah ari Judah berandau enggau bala penasihat iya, iya nganjung pesan ngagai Jehoas anak Jehoahas, iya nya uchu raja Israel ke benama Jehu. Tu pesan iya: “Bah, aram kitai beperang.”
18 Raja Jehoas ari Israel ngirumka pesan tu ngagai Raja Amasiah ari Judah: “Lalang ti beduri ba Lebanon ngirumka pesan ngagai pun kayu sidar ba Lebanon: ‘Beri anak indu nuan nyadika bini anak lelaki aku.’ Taja pia, siku jelu ti liar ba Lebanon mansa endur nya lalu ngindik lalang ti beduri nya.
19 Nuan madah: ‘Aku udah ngalahka Edom.’ Nya alai, nuan nyadi sumbung lalu minta diri dimuliaka. Diau meh ba istana nuan. Nama kebuah nuan ngiga penusah lalu ngasuh Judah ditinggang pemedis sama enggau nuan?”
20 Tang, Amasiah enggai mending laban Petara ti bendar amat ingin deka nyerahka sida ngagai munsuh, laban sida udah nitihka petara-petara Edom.
21 Nya alai, Raja Jehoas ari Israel mansang betemu enggau Raja Amasiah ari Judah. Sida beperang ba Bet-shemes ba Judah.
22 Judah pan alah laban Israel. Nyadi, semua orang rari ngagai rumah* diri empu.
23 Ba Bet-shemes, Raja Jehoas ari Israel nangkap raja Judah, iya nya Amasiah anak Jehoas, ke mega uchu Jehoahas.* Udah nya, sida mai Amasiah ngagai Jerusalem lalu Jehoas ngeruntuhka dinding Jerusalem, berengkah ari Pintu Efraim nyentuk ngagai Pintu Sukut. Pemanjai dinding ke diruntuhka nya kira-kira 178 meter.*
24 Iya ngambi semua emas, pirak, enggau semua pekekas ke bisi ba Rumah Petara ti bendar ke dijaga Obet-edom enggau ba endur nyimpan reta ba istana raja. Iya mega mai beberapa iku orang tebusan. Udah nya, iya pulai baru ngagai Samaria.
25 Raja Judah, iya nya Amasiah anak Jehoas, idup 15 taun da agi pengudah pemati raja Israel, iya nya Jehoas anak Jehoahas.
26 Sejarah bukai pasal Amasiah, iya nya pasal pengidup iya ari pun sampai ujung, bisi ditulis dalam Bup Bala Raja Judah enggau Israel.
27 Kenyau ari maya Amasiah ninggalka Jehovah, beberapa iku orang bepakat ngelaban Amasiah ba Jerusalem. Nya alai, iya ngerarika diri ngagai Lakis. Tang, sida ngasuh orang ngagai iya sampai ke Lakis lalu munuh iya ba dia.
28 Sida mai bangkai iya ngena kuda, lalu nguburka iya begulai enggau aki ini iya ba kuta Judah.
Nota Kaki
^ Peda Rujukan B14.
^ Tauka “penyanding penemu.”
^ Jaku Asal, “langkau kain.”
^ Mega dikumbai Ahasiah.
^ Jaku Asal, “400 kiubit.” Peda Rujukan B14.
