Bansa Israel ti Kedua 32:1-33
32 Pengudah Hesekiah ngereja semua utai nya enggau setia, Raja Senakerip ari Asiria datai deka nyerang Judah. Iya ngepung kuta-kuta ke bedinding ba dia, lalu deka ngerenchah tama ngalahka semua kuta nya.
2 Lebuh Hesekiah nemu pasal Senakerip datai deka nyerang Jerusalem,
3 iya berandau enggau bala pegawai iya sereta bala pahlawan iya. Iya mutuska deka nutup mata ai ba luar kuta, lalu sida besetuju deka nulung iya.
4 Mayuh orang begempuru deka nutup semua mata ai sereta sungai ke mengalir ba menua nya. Ku sida madah: “Awakka bala raja Asiria nadai tetemuka ai lebuh sida datai.”
5 Enggau ati ti keran, Hesekiah nirika baru dinding ke udah runtuh sereta menara-menara ba atas dinding nya. Iya mega ngaga selapis da agi dinding ba luar. Iya ngaduka baru Bukit* ba Kuta David sereta ngaga mayuh senyata enggau terabai.
6 Udah nya, iya ngelantik bala ketuai soldadu lalu ngempuruka rayat ba dataran awam ke semak enggau pintu penama kuta. Ku iya meransang sida:
7 “Kita mesti berani sereta kuat. Anang takut tauka rawan ngagai raja Asiria enggau bala soldadu iya ti mayuh, laban ke enggau kitai mayuh agi ari ke enggau sida.
8 Raja nya bepanggai ba pengering mensia, tang kitai bepanggai ba Petara kitai, Jehovah. Iya deka nulung kitai sereta beperang ngarika kitai.” Jaku Hesekiah, raja Judah nya, ngasuh bala rayat berasai dikeringka.
9 Lebuh Raja Senakerip ari Asiria enggau semua bala soldadu iya ba Lakis, iya nganjung bala pegawai iya ngagai Jerusalem. Sida mai pesan tu ngagai Raja Hesekiah sereta ngagai semua orang Judah ke ba Jerusalem:
10 “Tu utai ku Raja Senakerip ari Asiria: ‘Nama kebuah kita agi ba ditu taja pan serata Jerusalem udah dikepung? Sapa ke dianti kita nulung kita?
11 Kati kita enda nemu Hesekiah benung nipu kita? Iya madah: “Jehovah, Petara kitai, deka nyelamatka kitai ari jari raja Asiria.” Tang, Hesekiah deka nejuka kita mati lepi nadai makai enggau ngirup.
12 Endaka Hesekiah ke muai endur alai kita nyembah Petara kita sereta alta iya, lalu madah ngagai Judah enggau Jerusalem: “Kita patut besugang ba depan siti aja alta lalu nunu pemeri* ba alta nya”?
13 Kati kita enda nemu utai ke dikereja aku enggau aki ini aku ngagai semua bansa ba menua bukai? Kati petara sida ulih nyelamatka menua sida ari jari aku?
14 Aki ini aku udah ngemunaska mayuh bansa sebedau tu. Nadai siku pan petara sida ke ulih nyelamatka sida ari jari aku. Nyadi, nama kebuah kita pechaya Petara kita ulih nyelamatka kita ari jari aku?
15 Anang nejuka Hesekiah nipu tauka nesatka kita! Anang pechayaka iya, laban nadai petara ari bansa bukai tauka petara ari perintah bukai ke kala nyelamatka nembiak iya ari jari aku enggau ari jari aki ini aku. Anang agi Petara kita nya! Nadai Iya ulih nyelamatka kita ari jari aku!’”
16 Bala pegawai Senakerip majak ngeleseka Jehovah, Petara ti bendar, enggau nembiak Iya, Hesekiah.
17 Senakerip mega nulis surat kena ngemaruh sereta ngelaban Jehovah, Petara orang Israel. Ku iya dalam surat nya: “Petara-petara bansa bukai enda ulih nyelamatka nembiak sida ari jari aku. Petara ke disembah Hesekiah pan tentu enda ulih nyelamatka nembiak Iya ari jari aku.”
18 Sida majak bejaku enggau nyawa ti inggar ngena bansa jaku orang Judah, ngambika orang Jerusalem ke ba atas dinding kuta berasai takut sereta rawan. Sida ngereja nya laban sida deka ngerampas kuta nya.
19 Sida bejaku ngelaban Petara orang Jerusalem, baka sida ke bejaku ngelaban petara-petara ke digaga mensia ba dunya.
20 Tang, Raja Hesekiah enggau Nabi Isaiah anak Amoz enda ngetu besampi pasal pekara nya sereta minta tulung ngagai Petara ti ba serega.
21 Nya alai, Jehovah nganjung siku melikat kena munuh bala tuai, ketuai, enggau pahlawan ti kering ba kem soldadu raja Asiria. Enggau ati ti malu, raja Asiria pan pulai ngagai menua iya. Nyadi sekali, lebuh iya tama ngagai kuil petara iya, beberapa iku anak lelaki iya munuh iya ngena pedang.
22 Baka nya meh Jehovah nyelamatka Hesekiah enggau Jerusalem ari jari Raja Senakerip sereta ari bala munsuh ke bukai. Petara meri pengelikun ngagai serata menua nya.
23 Mayuh orang mai pemeri ngagai Jehovah ba Jerusalem. Sida mega mai utai ti berega ngagai Hesekiah, raja Judah. Kenyau ari sehari nya, Raja Hesekiah balat dipebasa semua bansa.
24 Bisi sekali, Hesekiah sakit lalu nyauka mati. Nya alai, iya besampi ngagai Jehovah. Petara nyaut sampi iya lalu meri iya siti tanda.
25 Tang, Hesekiah enda beterima kasihka utai manah ti udah dikereja Petara ke iya, lalu ati iya nyadi sumbung. Nya alai, Petara ringat ngagai Hesekiah, Judah, enggau Jerusalem.
26 Tang udah nya, Hesekiah ngemaruhka diri, lalu ati iya enda agi sumbung. Semua orang ke diau ba Jerusalem mega ngemaruhka diri. Nya alai, Jehovah enda agi ringat ngagai sida sekumbang Hesekiah agi idup.
27 Udah nya, Hesekiah nyadi amat kaya, lalu semua orang bebasaka iya. Iya ngaga setor alai nyimpan pirak, emas, batu ti berega, minyak balsam, terabai, enggau semua utai ti berega.
28 Iya mega ngaga setor alai nyimpan bijirin, wain ti baru, minyak, sereta kandang ke bala bedus, kambin, enggau mayuh macham jelu tupi ke bukai.
29 Iya mega ngaga mayuh kuta ke iya empu, sereta bulih mayuh jelu tupi, kambin, bedus, enggau sapi. Petara meri mayuh amat pengaya ngagai iya.
30 Hesekiah mega nutup begian atas mata ai ba Gihon, lalu ngasuh ai nya mengalir ke baruh ngagai barat Kuta David. Hesekiah mujur magang dalam semua utai ke dikereja iya.
31 Taja pia, lebuh bala pegawai Babilon nganjung bala pengari datai betemu enggau Hesekiah laban deka nanya pasal tanda ke nyadi ba menua iya, Petara ti bendar nejuka iya kediri empu ngaga pemutus, laban Petara deka nguji iya sereta deka nemu utai ba dalam ati iya.
32 Sejarah bukai pasal Hesekiah, iya nya pasal baka ni iya ngayanka pengerindu ti setia, bisi ditulis dalam Bup Bala Raja Judah enggau Israel, ba rekod pasal utai ke dipandangka dalam runding Nabi Isaiah anak Amoz.
33 Pengujung iya, Hesekiah mati lalu dikuburka ba lereng bukit ke nuju ngagai pendam bala anak David. Semua orang Judah enggau Jerusalem meri basa ngagai iya lebuh iya mati, lalu anak lelaki iya, Manasi, nganti iya nyadi raja.
Nota Kaki
^ Jaku Hebrew, mil·lohʼ′ ke mai reti “tugung tanah.”
^ Tauka “nunu pemeri nyentukka asap niki ke atas.”
