Dua Korint 13:1-14
13 Tu ketiga kali aku deka datai ngagai kita. “Tiap iti pekara patut ditentuka betul enti bisi penerang ari dua tauka tiga iku orang saksi.”
2 Taja pan diatu aku nadai enggau kita, tang aku ngasaika diri bisi enggau kita kedua kali. Nyadi, aku deka nangkan orang ke udah ngereja dosa suba sereta nangkan semua sida ke bukai. Enti aku datai baru ila, aku deka nentuka orang ke ngereja dosa nya enda ulih ngerarika diri ari kena disiplin.
3 Enggau nya, aku deka nunjukka ngagai kita, Kristus endang bejaku nengah aku. Iya enda lemi, tang iya ngayanka kuasa iya ba bala kita.
4 Sigi amat. Iya dibunuh ba tiang ketegal iya lemi,* tang diatu iya idup ketegal kuasa Petara. Diatu, kami lemi baka iya suba, tang kami deka idup begulai enggau iya, ketegal kuasa Petara ke bisi ba kita.
5 Anang ngetu meresa diri empu kena nentuka kita arapka Petara enggau pengabis iya tauka enda. Anang ngetu meresa diri kena nentuka kati gaya kita kebendar iya. Kati kita enda nemu, Jesus Kristus beserakup enggau kita? Semadi meh enti Petara enda nerima kita.
6 Aku amat ngarapka kita nemu, kami endang diterima Petara.
7 Kami besampi ngagai Petara, ngambika kita nadai ngereja nama-nama penyalah, ukai kena nunjukka kami diterima orang, tang ngambika kita ngereja utai ti manah, taja pan orang enda nerima kami.
8 Kami enda ulih ngereja nama-nama utai kena ngelaban pemendar. Tang kami semina ulih ngereja utai kena nyukung pemendar.
9 Kami gaga ati lebuh kita kering, taja pan maya nya kami lemi. Kami besampi ngambika kita ngaga ubah ti patut.
10 Nya alai, aku nulis semua pekara nya lebuh aku enda begulai enggau kita, ngambika aku enda ibuh terit lebuh aku begulai enggau kita, laban Tuan udah meri aku kuasa kena negapka kita, ukai kena ngelemika kita.
11 Ke penudi, bala menyadi, terus meh gaga ati, ngaga ubah ti patut, nerima pengelantang, sepenemu, sereta bebaik enggau pangan diri, lalu Petara ti penuh enggau pengerindu sereta pengelantang deka enggau kita.
12 Sambut meh pangan diri enggau penuh pengerindu.*
13 Semua nembiak Petara ti kudus ngirumka salam ngagai kita.
14 Ngarapka semua kita bulih pemanah ati ti besai ari Tuan Jesus Kristus, pengerindu Petara, sereta berekat ari kuasa kudus.
Nota Kaki
^ Nya ketegal iya nyadi mensia.
^ Jaku Asal, “sium ti kudus.” Suba orang Kristian nyium pangan diri lebuh sida betemu.
