2 Raja 1:1-18
-
Elijah madah pasal pemati Ahasiah dudi hari (1-18)
1 Pengudah pemati Ahap, Moap ngelaban Israel.
2 Bisi sekali, Ahasiah labuh ari perabung istana iya* ba Samaria, lalu ketegal nya iya bakal. Nya alai, Ahasiah madah ngagai sekeda orang: “Alai kita nanya Baal-sebup, iya nya petara ba kuta Ekron, kena nemu sekalika aku ulih gerai tauka enda.” Iya pan ngasuh sida mupuk.
3 Tang, melikat Jehovah bejaku ngagai orang Tisbi ke benama Elijah:* “Mupuk nuan lalu betemu enggau orang ke dianjung raja Samaria. Padahka tu ngagai sida: ‘Kati nadai Petara ba Israel nyentukka kita deka nanya Baal-sebup, petara ba kuta Ekron?
4 Nya alai, Jehovah madahka: “Nuan enda ulih angkat ari endur nuan gali laban nuan tentu deka mati.”’” Udah nya, Elijah pan mupuk.
5 Lebuh bala orang nya pulai ngagai raja, raja pan nanya sida: “Nama kebuah kita nikal baru?”
6 Ku sida nyaut iya: “Bisi siku lelaki betemu enggau kami lalu madahka kami: ‘Pulai kita lalu padahka tu ngagai raja ke udah nganjung kita: “Tu meh utai ke dipadahka Jehovah: ‘Kati nadai Petara ba Israel nyentukka nuan nganjung orang ngagai Ekron, laban deka nanya petara Baal-sebup? Nya alai, nuan enda ulih angkat ari endur nuan gali laban nuan tentu deka mati.’”’”
7 Ku raja nya nanya sida: “Baka ni gamal lelaki ke betemu enggau kita nya, ke madahka semua utai tu ngagai kita?”
8 Ku sida nyaut iya: “Iya ngena gari ke digaga ari bulu jelu, lalu tali pinggang iya digaga ari kulit jelu.” Raja lalu terus nyaut: “Nya Elijah, orang Tisbi.”
9 Udah nya, raja nganjung siku ketuai soldadu enggau 50 iku bala soldadu iya ngagai Elijah. Maya nya, Elijah benung duduk ba atas kawasan gunung. Ketuai soldadu nya niki kia lalu madah ngagai iya: “O nembiak Petara ti bendar, raja ngasuh nuan nurun.”
10 Tang, Elijah nyaut iya: “Enti aku tu nembiak Petara, awakka api nurun ari langit, lalu nuan enggau 50 iku bala soldadu nuan deka angus diempa api.” Nyadi, api pan nurun ari langit, lalu ketuai soldadu nya enggau 50 iku bala soldadu iya pan diempa api.
11 Raja pan nganjung siku da agi ketuai soldadu enggau 50 iku bala soldadu iya ngagai Elijah. Ketuai soldadu nya mansang ngagai Elijah lalu madahka: “O nembiak Petara ti bendar, raja ngasuh nuan nurun enggau jampat.”
12 Tang, Elijah nyaut sida: “Enti aku tu nembiak Petara ti bendar, awakka api nurun ari langit, lalu nuan enggau 50 iku bala soldadu nuan deka angus diempa api.” Nyadi, Petara ngasuh api nurun ari langit, lalu ketuai soldadu nya enggau 50 iku bala soldadu iya pan diempa api.
13 Sekali agi, raja nganjung ketuai soldadu ti ketiga enggau 50 iku bala soldadu iya ngagai Elijah. Ketuai soldadu nya niki gunung nya lalu besugang ba depan Elijah. Iya bebendar minta kasih ari Elijah lalu madahka: “Nembiak Petara ti bendar, tulung meh, awakka nyawa aku enggau nyawa 50 iku bala ulun nuan tu berega ba nuan.
14 Sebedau tu, api udah nurun ari langit lalu nganguska dua iku ketuai soldadu. Tiap iku ketuai soldadu nya bisi 50 iku soldadu. Semua sida nya mega mati magang. Tang kali tu, kasih meh ke aku lalu tejuka aku idup.”
15 Nyadi, melikat Jehovah madah ngagai Elijah: “Alai nuan nurun enggau iya. Anang takutka iya.” Nya alai, Elijah mupuk enggau ketuai soldadu nya lalu betemu enggau raja.
16 Udah nya, Elijah bejaku enggau raja: “Tu meh utai ke dipadahka Jehovah: ‘Nuan nganjung orang ngagai Ekron laban deka nanya petara Baal-sebup. Kati nadai Petara ba Israel? Nama kebuah nuan enda nanya Petara ba Israel? Nya alai, nuan enda ulih angkat ari endur nuan gali, laban nuan tentu deka mati.’”
17 Ahasiah pan mati, baka ke udah dipadahka Jehovah nengah Elijah. Ketegal Ahasiah nadai anak lelaki, Jehoram* nganti iya nyadi raja. Utai nya nyadi ba taun ti kedua Jehoram anak Jehosapat nyadi raja Judah.
18 Sejarah bukai pasal Ahasiah, iya nya pasal utai ke udah digaga iya, bisi ditulis ba bup sejarah pasal jeman bala raja Israel.
Nota Kaki
^ Tauka “labuh ari lubang gelegar lantai bilik ba atas istana iya.”
^ Reti nya “Jehovah Nya Petara Aku.”
^ Iya nya, adik lelaki Ahasiah.
