2 Raja 10:1-36
10 Ahap bisi 70 iku anak lelaki ba Samaria. Nya alai, Jehu nulis surat lalu ngirumka surat nya ngagai Samaria, iya nya ngagai bala pegawai Jesril, bala tuai, enggau bala penyaga anak Ahap.* Tu utai ke dipadah ba surat nya:
2 “Bala anak tuan kita bisi enggau kita, lalu kita mega bisi kereta kuda, bala kuda, kuta ti teguh, enggau semua senyata. Nyadi, lebuh kita nerima surat tu,
3 pilih anak lelaki tuan kita ke pemadu manah sereta ke pemadu layak, lalu asuh iya duduk ba kerusi diraja apai iya. Udah nya, beperang meh ngarika ruang bilik tuan kita.”
4 Tang, sida amat takut lalu madahka: “Enti dua iku raja pan alah laban iya, nama agi kitai tu?”
5 Nyadi, orang ke ngemataka istana, gabenor kuta, bala tuai, enggau bala penyaga anak Ahap ngirumka pesan tu ngagai Jehu: “Kami ulun nuan, lalu kami deka ngereja semua utai ke diasuh nuan. Kami enda ngelantik sapa-sapa nyadi raja. Kereja aja nama-nama utai ti manah ba nuan.”
6 Udah nya, Jehu nulis surat ngagai sida baru. Tu utai ke dipadah ba surat nya: “Enti kita bepiak ngagai aku lalu sanggup deka ngasika aku, bai pala anak lelaki tuan kita ngagai aku ba Jesril ba maya tu pagila.”
Maya nya, 70 iku anak lelaki raja bisi ba kuta sama enggau bala tuai kuta nya. Bala tuai nya meh ke udah ngemesaika sida ari mit.
7 Pengudah bala tuai nerima surat nya, sida lalu terus nangkap 70 iku anak lelaki raja lalu munuh sida. Sida ngengkahka pala bala anak raja ba dalam bakul, lalu nganjung nya ngagai Jehu ba Jesril.
8 Orang ke mai pesan datai ngagai Jehu lalu madahka: “Sida udah mai pala bala anak lelaki raja.” Jehu lalu madah: “Engkahka pala nya ba pintu penama kuta, lalu bagi nyadi dua iti tugung. Tejuka pala nya ba dia sampai pagi pagila.”
9 Pagi hari siti, Jehu pansut lalu bediri ba depan semua orang. Ku iya madah: “Kita nadai salah. Aku meh ke udah bepakat ngelaban tuan aku lalu munuh iya. Tang, sapa ke munuh semua sida tu?
10 Nyadi, kita nemu tiap iti jaku Jehovah ke dipadahka Jehovah pasal ruang bilik Ahap tentu deka dikeamatka magang. Nama-nama utai ke dipadahka Jehovah nengah nembiak Iya, Elijah, udah dikereja Iya magang.”
11 Jehu mega munuh semua ruang bilik Ahap ke agi bisi ba Jesril, pia mega enggau bala tuai ke gawa ke iya, bala kaban iya, enggau bala imam iya. Nadai siku pan ditejuka idup.
12 Udah nya, iya mupuk ngagai Samaria. Ba rantau jalai, iya mansa endur orang nyukur bulu bedus.*
13 Ba dia, Jehu betemu enggau kaban belayan* Ahasiah, raja Judah. Ku iya nanya sida: “Sapa kita?” Ku sida nyaut: “Kami kaban belayan Ahasiah, lalu kami dalam pejalai deka ngabas bala anak raja enggau bala anak kuin.* Kami deka nanya rita sida.”
14 Jehu lalu terus madah: “Tangkap sida idup-idup!” Sida pan ditangkap idup-idup lalu dibunuh ba telaga ke bisi ba endur orang nyukur bulu bedus. Semua 42 iku sida dibunuh, lalu nadai siku pan ke ditejuka idup.
15 Pengudah mupuk ari endur nya, Jehu betemu enggau Jehonadap anak Rekap. Jehonadap endang sigi datai deka betemu enggau Jehu. Pengudah Jehu meri jaku tabi ngagai iya,* Jehu lalu nanya: “Kati ati nuan setia ngagai aku, baka ati aku ke setia ngagai ati nuan?”
Ku Jehonadap nyaut: “Au.”
Ku Jehu madah: “Enti pia, bai kitu jari nuan.”
Jehonadap pan ngereja nya, lalu Jehu narit iya niki ngagai kerita kuda iya.
16 Udah nya, Jehu madah: “Titihka aku, lalu nuan deka nemu aku endang sigi enggai meda orang ke enda setia ngagai Jehovah.” Jehu pan mupuk enggau Jehonadap ngena kerita kuda iya.
17 Lebuh Jehu datai ba Samaria, iya munuh semua ruang bilik Ahap enggau sida ke nyukung Ahap ke agi bisi ba dia. Semua sida dibunuh iya magang, nitihka utai ke dipadahka Jehovah nengah Elijah.
18 Udah nya, Jehu ngempuruka semua orang lalu madah: “Ahap enda entu bebendar nyembah Baal. Tang, aku deka bebendar agi nyembah Baal.
19 Nya alai, kangauka semua nabi Baal, semua penyembah iya, enggau semua imam iya. Semua sida mesti datai, laban aku deka nyerahka pemeri ti besai ngagai Baal. Barang sapa ke enda datai deka diukum bunuh.” Kebendar iya, Jehu ngaga diri deka ngereja nya laban iya deka munuh semua penyembah Baal.
20 Ku Jehu nampung baru: “Padahka ngagai orang, bisi gempuru ti kudus ke Baal.” Sida pan ngereja nya.
21 Udah nya, Jehu ngirumka pesan ngagai serata Israel. Semua penyembah Baal datai magang. Nadai siku pan ke enda datai. Sida tama ngagai kuil Baal, sampai kuil nya penuh ari ujung siti ngagai ujung siti.
22 Iya lalu madah ngagai orang ke ngemataka endur nyimpan gari: “Bai pansut gari ke semua penyembah Baal.” Orang nya pan ngereja nya.
23 Udah nya, Jehu enggau Jehonadap anak Rekap tama ngagai kuil Baal. Ku Jehu madah ngagai bala penyembah Baal: “Peresa endur tu enggau silik, lalu tentuka nadai siku pan penyembah Jehovah ba ditu. Semina penyembah Baal aja tau datai.”
24 Pengujung iya, sida pan berengkah nyerahka pemeri tunu enggau pemeri ke bukai. Jehu udah ngasuh 80 iku orang nganti ba luar, lalu iya madah ngagai sida: “Enti bisi orang ngerarika diri, nyawa kita ke deka nganti nyawa orang nya.”
25 Sepengudah sida tembu nyerahka pemeri tunu enggau pemeri ke bukai, Jehu lalu madah ngagai bala jejaga enggau bala pegawai soldadu: “Tama lalu bunuh sida! Anang nejuka siku pan ngelepaska diri!” Bala jejaga enggau bala pegawai soldadu pan munuh sida ngena pedang, lalu muai bangkai sida ke luar. Sida majak tama nyentukka sida datai ba begian ke dalam agi* ba kuil Baal.
26 Udah nya, tiang batu keramat kuil Baal dibai sida pansut lalu ditunu sida magang.
27 Sida ngeruntuhka tiang batu keramat Baal enggau kuil Baal. Kuil nya digaga sida nyadi jamban nyentukka seharitu.
28 Baka nya meh Jehu ngemunaska pengawa orang ke besembahka Baal ba Israel.
29 Tang, Jehu nejuka patung anak sapi emas tetap ba Bethel enggau ba Dan. Ketegal nya, iya bedosa baka Jeroboam anak Nebat, ke udah ngasuh orang Israel bedosa.
30 Jehovah madah ngagai Jehu: “Nuan udah ngereja utai ti manah sereta betul ba mata Aku, laban nuan udah ngereja semua utai ke deka digaga Aku ngagai ruang bilik Ahap. Nya alai, bala anak lelaki nuan deka duduk ba kerusi diraja Israel sampai generasi* keempat.”
31 Tang, Jehu enda ngasika Adat Jehovah, Petara orang Israel, enggau pengabis ati. Iya ngereja dosa baka ke digaga Jeroboam, ke udah ngasuh orang Israel bedosa.
32 Maya nya, Jehovah berengkah ngurangka kawasan menua Israel. Hasael majak nyerang serata kawasan Israel,
33 ari timur Sungai Jordan, semua kawasan Gilead (iya nya kawasan raban bansa Gat, raban bansa Reuben, enggau raban bansa Manasi), ari Aroer ke ba tisi Lebak* Arnon, sampai ngagai Gilead enggau Basan.
34 Sejarah bukai pasal Jehu, iya nya pasal semua utai ke udah digaga iya enggau semua pengering iya, bisi ditulis ba bup sejarah pasal jeman bala raja Israel.
35 Pengujung iya, Jehu pan mati lalu iya dikuburka ba Samaria. Anak iya, Jehoahas, nganti iya nyadi raja.
36 Jehu merintah Israel pengelama 28 taun ba Samaria.
Nota Kaki
^ Jaku Asal, “bala penyaga Ahap.”
^ Engka endur alai nanchang bala bedus ke deka dichukur.
^ Jaku Asal, “bala menyadi.”
^ Iya nya, Kuin Jesebel, indai Raja Jehoram.
^ Tauka “Jehu merekatka iya.”
^ Jaku Asal, “ba kuta,” engka merujuk ngagai bengunan ke baka siti kubu.
^ Tauka “serak.”
^ Tauka “Wadi.”
