2 Raja 13:1-25
13 Ba taun ke-23 Raja Jehoas anak Ahasiah nyadi raja Judah, Jehoahas anak Jehu nyadi raja Israel ba Samaria. Jehoahas merintah pengelama 17 taun.
2 Iya majak ngereja utai ti jai ba mata Jehovah, lalu iya ngereja dosa ti sama baka Jeroboam anak Nebat, ke udah ngasuh orang Israel bedosa. Iya enggai ninggalka pengawa ti jai nya.
3 Nya kebuah Jehovah balat amat ringat ngagai orang Israel. Iya nejuka Raja Hasael ari Siria enggau Ben-hadad, iya nya anak lelaki Hasael, majak ngalahka Israel.
4 Pengudah sesiti timpuh, Jehoahas bebendar minta kasih ari Jehovah. Jehovah mendingka iya laban Iya udah meda pemalat raja Siria merinsaka orang Israel.
5 Nya alai, Jehovah nganjung siku penyelamat kena ngelepaska sida ari orang Siria. Orang Israel pan ulih diau likun ba rumah sida baka ke sebedau tu.
6 (Taja pia, sida enda ninggalka dosa ti digaga ruang bilik Jeroboam, ke udah ngasuh orang Israel bedosa. Sida majak ngereja dosa nya, lalu nejuka tiang kayu keramat tetap ba Samaria.)
7 Jehoahas nadai agi mayuh soldadu laban raja Siria ngemunaska sida, nyentukka sida nyau baka debu ke diindik orang ba endur alai ngindik bijirin. Jehoahas semina bisi 50 iku orang ke nepan kuda, 10 iti kerita kuda, enggau 10,000 iku soldadu ke bejalai kaki.
8 Sejarah bukai pasal Jehoahas, iya nya pasal semua utai ke udah digaga iya enggau pengering iya, bisi ditulis ba bup sejarah pasal jeman bala raja Israel.
9 Pengujung iya, Jehoahas mati lalu iya dikuburka ba Samaria. Anak lelaki iya, Jehoas, nganti iya nyadi raja.
10 Ba taun ke-37 Jehoas nyadi raja Judah, Jehoas anak Jehoahas nyadi raja Israel ba Samaria, lalu iya merintah pengelama 16 taun.
11 Iya majak ngereja utai ti jai ba mata Jehovah, lalu enda ninggalka semua dosa ti digaga Jeroboam anak Nebat, ke udah ngasuh orang Israel bedosa. Iya enggai badu ngereja dosa nya.
12 Sejarah bukai pasal Jehoas, iya nya pasal semua utai ke udah digaga iya, pengering iya, enggau chara iya ngelaban Raja Amasiah ari Judah, bisi ditulis ba bup sejarah pasal jeman bala raja Israel.
13 Udah nya, Jehoas mati, lalu Jeroboam* nganti iya nyadi raja. Jehoas dikuburka ba Samaria begulai enggau bala raja Israel.
14 Lebuh Elisa sakit lalu nyauka mati, raja Israel, iya nya Jehoas, pan datai betemu enggau iya lalu nyabak. Ku Jehoas: “Tuan aku! Tuan aku!* Kerita kuda Israel enggau orang ke nepan kuda!”
15 Udah nya, Elisa madah ngagai Raja Jehoas: “Ambi panah enggau anak panah.” Raja Jehoas pan ngereja nya.
16 Ku Elisa madah ngagai raja Israel nya: “Pegai panah nya.” Nyadi, raja pan megai panah nya, lalu Elisa ngengkahka jari iya ba jari raja.
17 Udah nya, Elisa madah: “Buka jenila tunga ke timur.” Nyadi, raja pan muka jenila nya. Elisa lalu madahka: “Timbak!” Raja pan ngereja nya. Ku Elisa agi: “Anak panah penyelamat ari Jehovah! Anak panah ke ngalahka Siria! Nuan deka ngalahka Siria ba Afek, lalu nuan deka ngemunaska sida abis lengis.”
18 Ku Elisa madah: “Ambi beberapa iti anak panah.” Nyadi, Jehoas pan ngereja nya. Udah nya, Elisa madah ngagai raja Israel nya: “Palu tanah.” Jehoas pan malu tanah tiga kali lalu ngetu.
19 Elisa pan ringat ngagai Jehoas. Ku nembiak Petara ti bendar nya madah: “Nuan patut malu tanah lima kali tauka enam kali! Nya baru nuan ulih ngalahka Siria, lalu ngemunaska sida abis lengis. Tang diatu, nuan semina ulih ngalahka orang Siria tiga kali aja.”
20 Enda lama udah nya, Elisa pan mati lalu dikuburka. Ba pun taun,* bisi bala perumpak ari Moap datai ngagai menua Israel.
21 Lebuh beberapa iku orang benung nguburka siku lelaki, sida tepedaka bala perumpak. Nyadi, sida pan jampat-jampat nikauka bangkai nya ngagai kubur Elisa lalu rari. Lebuh bangkai lelaki nya tekena tulang Elisa, lelaki nya pan idup baru lalu bediri.
22 Sepemanjai Jehoas merintah, Raja Hasael ari Siria majak merinsaka orang Israel.
23 Taja pia, Jehovah ngayanka pemanah ati, pengasih, sereta pengibuh Iya ngagai orang Israel ketegal sempekat ke digaga Iya enggau Abraham, Isak, enggau Jakop. Iya enggai nejuka sida dipunaska, lalu Iya enda muai sida* nyentukka seharitu.
24 Pengudah Raja Hasael ari Siria mati, anak lelaki iya, Ben-hadad, nganti iya nyadi raja.
25 Udah nya, Jehoas anak Jehoahas ngambi kuta-kuta Israel ari Ben-hadad anak Hasael. Kuta-kuta nya diambi Hasael lebuh iya beperang enggau Jehoahas. Jehoas ngalahka Ben-hadad tiga kali, lalu iya ngambi pulai baru kuta-kuta Israel.
Nota Kaki
^ Iya nya, Jeroboam ti Kedua.
^ Jaku Asal, “Apai aku! Apai aku!”
^ Engka merujuk ngagai musin bungai.
^ Jaku Asal, “enda muai sida ari depan Iya.”
