2 Raja 14:1-29
14 Ba taun kedua Jehoas anak Jehoahas nyadi raja Israel, Amasiah anak Raja Jehoas berengkah nyadi raja Judah.
2 Amasiah beumur 25 taun lebuh iya nyadi raja, lalu iya merintah ba Jerusalem pengelama 29 taun. Indai iya, Jehoadin, datai ari Jerusalem.
3 Amasiah terus ngereja utai ti betul ba mata Jehovah, tang enda baka aki iya, David. Iya ngereja semua utai ke digaga apai iya, Jehoas.
4 Tang, endur alai orang nyembah petara pelesu* enda dianchurka. Agi bisi orang nyerahka pemeri sida, ngambika asap ari pemeri tunu niki ke atas ngagai bala petara sida.
5 Lebuh Amasiah nyau udah tegap megai perintah, iya lalu terus munuh bala pegawai ke udah munuh apai iya ke nyadi raja sebedau iya.
6 Taja pia, iya enda munuh bala anak sida. Nya sejalai enggau pesan Jehovah ke ditulis ba Adat Moses: “Apai enda patut diukum mati ketegal dosa anak, lalu anak enda patut diukum mati ketegal dosa apai. Tiap iku orang patut diukum mati ketegal dosa diri.”
7 Iya munuh 10,000 iku orang Edom ba Lebak Garam lalu nguasa kuta Sela. Kuta nya diberi nama Joktil nyentukka seharitu.
8 Udah nya, Amasiah ngasuh orang ngirumka pesan ngagai Jehoas anak Jehoahas, iya nya uchu raja Israel ke benama Jehu. Tu pesan iya: “Bah, aram kitai beperang.”
9 Raja Jehoas ari Israel ngirumka pesan tu ngagai Raja Amasiah ari Judah: “Lalang ti beduri ba Lebanon ngirumka pesan ngagai pun kayu sidar ba Lebanon: ‘Beri anak indu nuan nyadika bini anak lelaki aku.’ Taja pia, siku jelu ti liar ba Lebanon mansa endur nya lalu ngindik lalang ti beduri nya.
10 Sigi amat, nuan udah ngalahka Edom. Nya alai, nuan nyadi sumbung. Gaga ati meh enggau mulia ke diulih nuan, lalu diau meh ba istana nuan. Nama kebuah nuan ngiga penusah lalu ngasuh Judah ditinggang pemedis sama enggau nuan?”
11 Tang, Amasiah enggai mending.
Nya alai, Raja Jehoas ari Israel mansang betemu enggau Raja Amasiah ari Judah. Sida beperang ba Bet-shemes ba Judah.
12 Judah pan alah laban Israel. Nyadi, semua orang rari ngagai rumah* diri empu.
13 Ba Bet-shemes, Raja Jehoas ari Israel nangkap raja Judah, iya nya Amasiah anak Jehoas, ke mega uchu Ahasiah. Udah nya, sida mansang ngagai Jerusalem lalu Jehoas ngeruntuhka dinding Jerusalem, berengkah ari Pintu Efraim nyentuk ngagai Pintu Sukut. Pemanjai dinding ke diruntuhka nya kira-kira 178 meter.*
14 Iya ngambi semua emas, pirak, enggau semua pekekas ke bisi ba Rumah Jehovah enggau ba endur nyimpan reta ba istana raja. Iya mega mai beberapa iku orang tebusan. Udah nya, iya pulai baru ngagai Samaria.
15 Sejarah bukai pasal Jehoas, iya nya pasal utai ke udah digaga iya, pengering iya, enggau chara iya ngelaban Raja Amasiah ari Judah, bisi ditulis ba bup sejarah pasal jeman bala raja Israel.
16 Udah nya, Jehoas mati lalu dikuburka ba Samaria begulai enggau bala raja Israel. Anak lelaki iya, Jeroboam,* nganti iya nyadi raja.
17 Raja Judah, iya nya Amasiah anak Jehoas, idup 15 taun da agi pengudah pemati raja Israel, iya nya Jehoas anak Jehoahas.
18 Sejarah bukai pasal Amasiah bisi ditulis ba bup sejarah pasal jeman bala raja Judah.
19 Udah nya, bisi beberapa iku orang bepakat ngelaban Amasiah ba Jerusalem. Nya alai, iya ngerarika diri ngagai Lakis. Tang, sida ngasuh orang ngagai iya sampai ke Lakis lalu munuh iya ba dia.
20 Sida mai bangkai iya ngena kuda, lalu nguburka iya ba Jerusalem begulai enggau aki ini iya ba Kuta David.
21 Udah nya, semua orang Judah ngelantik Asariah* nyadi raja kena nganti apai iya, Amasiah. Maya nya, Asariah beumur 16 taun.
22 Pengudah raja* mati, Asariah nulung Judah nguasa kuta Elat baru lalu nirika baru kuta nya.
23 Ba taun ke-15 raja Judah, iya nya Amasiah anak Jehoas, merintah, Jeroboam anak Raja Jehoas ari Israel berengkah nyadi raja ba Samaria. Jeroboam merintah pengelama 41 taun.
24 Iya majak ngereja utai ti jai ba mata Jehovah. Iya enda ninggalka semua dosa ti digaga Jeroboam anak Nebat, ke udah ngasuh orang Israel bedosa.
25 Iya ngambi pulai baru sempadan Israel ari Lebo-hamat* nyentuk ngagai Tasik Arabah.* Nya nitihka utai ke dipadahka Jehovah, Petara Israel, nengah nembiak Iya, Jonah anak Amitai, iya nya nabi ari Gat-heper.
26 Jehovah udah meda pemalat pemerinsa ke ditapi Israel. Nadai orang ulih nulung Israel. Indah, sida ke lemi sereta ke nadai daya pan nadai agi ba dia.
27 Tang, Jehovah udah besemaya enda muai nama Israel ari dunya. Nya alai, Iya nyelamatka sida ngena Jeroboam anak Jehoas.
28 Sejarah bukai pasal Jeroboam, iya nya pasal semua utai ke udah digaga iya, pengering iya, chara iya belaban, enggau chara iya mulaika Damaskus enggau Hamat ngagai Judah enggau Israel, bisi ditulis ba bup sejarah pasal jeman bala raja Israel.
29 Udah nya, Jeroboam mati lalu dikuburka begulai enggau bala raja Israel. Anak lelaki iya, Sekariah, nganti iya nyadi raja.
Nota Kaki
^ Jaku Asal, “endur ti tinggi.”
^ Jaku Asal, “langkau kain.”
^ Jaku Asal, “400 kiubit.” Peda Rujukan B14.
^ Iya nya, Jeroboam ti Kedua.
^ Reti nya “Jehovah Udah Nulung.” Iya dikumbai Usiah ba 2Ra 15:13; 2Ba 26:1-23; Isa 6:1; enggau Sek 14:5.
^ Iya nya, apai iya, Amasiah.
^ Tauka “jalai tama ngagai Hamat.”
^ Iya nya, Tasik Mati.
