2 Raja 15:1-38
15 Ba taun ke-27 Raja Jeroboam* ari Israel merintah, Asariah* anak Raja Amasiah ari Judah berengkah nyadi raja.
2 Asariah beumur 16 taun lebuh iya nyadi raja, lalu iya merintah pengelama 52 taun ba Jerusalem. Nama indai iya Jekoliah, lalu indai iya datai ari Jerusalem.
3 Asariah terus ngereja utai ti betul ba mata Jehovah baka apai iya, Amasiah.
4 Tang, endur alai orang nyembah petara pelesu* enda dianchurka. Agi bisi orang nyerahka pemeri sida ngambika asap ari pemeri tunu niki ke atas ngagai bala petara sida.
5 Jehovah ngasuh Raja Asariah kena penyakit kulit ti balat* nyentukka maya iya mati. Iya diau ba rumah bukai, lalu anak lelaki iya, Jotam, ngemataka istana sereta ngakim rayat ba menua nya.
6 Sejarah bukai pasal Asariah, iya nya pasal semua utai ke udah digaga iya, bisi ditulis ba bup sejarah pasal jeman bala raja Judah.
7 Udah nya, Asariah mati lalu iya dikuburka begulai enggau aki ini iya ba Kuta David. Anak lelaki iya, Jotam, nganti iya nyadi raja.
8 Ba taun ke-38 Raja Asariah ari Judah merintah, Sekariah anak Jeroboam berengkah nyadi raja Israel, lalu iya merintah ba Samaria pengelama enam bulan.
9 Iya ngereja utai ti jai ba mata Jehovah baka aki ini iya. Iya enggai badu ngereja dosa ke digaga Jeroboam anak Nebat, ke udah ngasuh orang Israel bedosa.
10 Udah nya, Salum anak Jabes bepakat ngelaban iya lalu munuh iya ba Iblim. Pengudah iya dibunuh, Salum nganti iya nyadi raja.
11 Sejarah bukai pasal Sekariah bisi ditulis ba bup sejarah pasal jeman bala raja Israel.
12 Nya ngamatka utai ke dipadahka Jehovah ngagai Jehu: “Bala anak lelaki nuan deka duduk ba kerusi diraja Israel sampai generasi* keempat.” Nya meh utai ke nyadi.
13 Salum anak Jabes nyadi raja ba taun ke-39 Raja Usiah ari Judah merintah. Salum merintah pengelama sebulan ba Samaria.
14 Udah nya, Menahem anak Gadi mupuk ari Tirsah ngagai Samaria, lalu munuh Salum anak Jabes ba dia. Pengudah Salum dibunuh, Menahem nganti iya nyadi raja.
15 Sejarah bukai pasal Salum enggau pelan jai iya ke angkat ngelaban, bisi ditulis ba bup sejarah pasal jeman bala raja Israel.
16 Lebuh Menahem mupuk ari Tirsah, iya nyerang kuta Tipsah. Iya munuh semua orang ba kuta nya enggau orang ke ba kawasan kuta nya, laban sida enggai muka pintu kuta ke iya. Iya mega nyarikka perut bala indu ke ngandung.
17 Ba taun ke-39 Raja Asariah ari Judah merintah, Menahem anak Gadi berengkah nyadi raja Israel, lalu iya merintah pengelama 10 taun ba Samaria.
18 Iya majak ngereja utai ti jai ba mata Jehovah. Sepemanjai pengidup iya, iya enggai badu ngereja semua dosa ke digaga Jeroboam anak Nebat, ke udah ngasuh orang Israel bedosa.
19 Lebuh Raja Pul ari Asiria datai ngagai Israel, Menahem meri 1,000 talenta* pirak ngagai Pul, ngambika Pul ulih nulung neguhka kuasa iya megai perintah.
20 Semua pirak ke diberi iya ngagai raja Asiria diulih iya ari orang Israel. Iya ngasuh tiap iku orang ke tebilang enggau orang ke kaya mayar 50 shekel* pirak ngagai iya. Udah nya, raja Asiria pan mupuk ari Israel lalu pulai ngagai menua iya empu.
21 Sejarah bukai pasal Menahem, iya nya pasal semua utai ke udah digaga iya, bisi ditulis ba bup sejarah pasal jeman bala raja Israel.
22 Udah nya, Menahem mati lalu anak lelaki iya, Pekahiah, nganti iya nyadi raja.
23 Ba taun ke-50 Raja Asariah ari Judah merintah, Pekahiah anak Menahem berengkah nyadi raja Israel, lalu iya merintah ba Samaria pengelama dua taun.
24 Iya majak ngereja utai ti jai ba mata Jehovah. Iya enggai badu ngereja dosa ke digaga Jeroboam anak Nebat, ke udah ngasuh orang Israel bedosa.
25 Udah nya, pegawai soldadu iya ke benama Pekah anak Remaliah bepakat ngelaban iya lalu munuh iya ba Samaria, ba dalam siti menara ba istana sama enggau Argop enggau Arieh. Maya nya, bisi 50 iku orang Gilead enggau Pekah. Udah nya, Pekah nganti iya nyadi raja.
26 Sejarah bukai pasal Pekahiah, iya nya pasal semua utai ke udah digaga iya, bisi ditulis ba bup sejarah pasal jeman bala raja Israel.
27 Ba taun ke-52 Raja Asariah ari Judah merintah, Pekah anak Remaliah berengkah nyadi raja Israel, lalu iya merintah ba Samaria pengelama 20 taun.
28 Iya majak ngereja utai ti jai ba mata Jehovah. Iya enggai badu ngereja dosa ke digaga Jeroboam anak Nebat, ke udah ngasuh orang Israel bedosa.
29 Lebuh Raja Pekah ari Israel merintah, Raja Tiglat-pileser ari Asiria nyerang lalu nguasa Ijon, Abel-bet-maakah, Janoah, Kedes, Hasor, Gilead, enggau Galili. (Galili bisi ba kawasan Naptali.) Iya mega nangkap orang ke diau ba endur nya, lalu mai sida ngagai Asiria.
30 Udah nya, Hoshea anak Elah bepakat ngelaban Pekah anak Remaliah. Hoshea munuh iya, lalu nganti iya nyadi raja ba taun ke-20 Jotam anak Usiah merintah.
31 Sejarah bukai pasal Pekah, iya nya pasal semua utai ke udah digaga iya, bisi ditulis ba bup sejarah pasal jeman bala raja Israel.
32 Ba taun ti kedua Pekah anak Remaliah merintah nyadi raja Israel, Jotam anak Raja Usiah ari Judah berengkah nyadi raja.
33 Jotam beumur 25 taun lebuh iya nyadi raja, lalu iya merintah ba Jerusalem pengelama 16 taun. Nama indai iya Jerusa anak Sadok.
34 Iya terus ngereja utai ti betul ba mata Jehovah baka apai iya, Usiah.
35 Tang, endur alai orang nyembah petara pelesu enda dianchurka. Agi bisi orang nyerahka pemeri sida, ngambika asap ari pemeri tunu niki ke atas ngagai bala petara sida. Iya meh ke ngaga Pintu Penama Atas ba Rumah Jehovah.
36 Sejarah bukai pasal Jotam, iya nya pasal utai ke udah digaga iya, bisi ditulis ba bup sejarah pasal jeman bala raja Judah.
37 Maya nya, Jehovah berengkah nganjung Raja Resin ari Siria enggau Pekah anak Remaliah ngelaban Judah.
38 Jotam pan mati lalu dikuburka begulai enggau aki ini iya ba Kuta David, iya nya kuta aki ini iya. Anak lelaki iya ke benama Ahas nganti iya nyadi raja.
Nota Kaki
^ Iya nya, Jeroboam ti Kedua.
^ Reti nya “Jehovah Udah Nulung.” Iya dikumbai Usiah ba 2Ra 15:13; 2Ba 26:1-23; Isa 6:1; enggau Sek 14:5.
^ Jaku Asal, “endur ti tinggi.”
^ Tauka “sakit lan; kusta.”
^ Tauka “serak.”
^ Peda Rujukan B14.
^ Peda Rujukan B14.
