2 Raja 16:1-20
16 Ba taun ke-17 Pekah anak Remaliah merintah, Ahas anak Raja Jotam ari Judah berengkah nyadi raja.
2 Ahas beumur 20 taun lebuh iya nyadi raja, lalu iya merintah ba Jerusalem pengelama 16 taun. Iya enda ngereja utai ti betul ba mata Petara iya, Jehovah, enda baka aki iya, David.
3 Iya nunda pengawa bala raja Israel. Iya indah nunu anak lelaki iya empu. Iya ngereja pengawa ke dipegedika Petara, iya nya pengawa ke suah dikereja bansa ke diburu Jehovah ari Israel.
4 Iya majak nyerahka pemeri tunu ngambika asap pemeri niki ke atas. Iya ngereja nya ba endur alai orang nyembah petara pelesu,* ke ba atas bukit sereta ba baruh tiap iti pun kayu ti subur.
5 Maya nya meh Raja Resin ari Siria enggau Raja Pekah anak Remaliah ari Israel datai deka nyerang Ahas ba Jerusalem. Sida ngepung kuta nya, tang sida enda ulih nguasa kuta nya.
6 Maya nya, Raja Resin ari Siria mulaika kuta Elat ngagai orang Edom pengudah iya muru orang Judah ari Elat. Nya alai, orang Edom diau ba kuta Elat nyentukka seharitu.
7 Ahas pan ngasuh orang nganjung pesan tu ngagai Raja Tiglat-pileser ari Asiria: “Tuan raja, aku tu meh anak enggau ulun nuan. Datai meh lalu selamatka aku ari raja Siria enggau raja Israel ke benung nyerang aku.”
8 Udah nya, Ahas ngambi pirak enggau emas ari Rumah Jehovah enggau ari endur nyimpan reta ba istana, lalu meri rasuah ngagai raja Asiria.
9 Raja Asiria ningaka peminta Ahas. Nya alai, raja Asiria ngagai Damaskus lalu nguasa kuta nya. Iya nangkap orang ke diau ba kuta nya lalu mai sida ngagai Kir. Iya mega munuh Resin.
10 Udah nya, Raja Ahas mupuk ngagai Damaskus, laban deka betemu enggau raja Asiria, iya nya Tiglat-pileser. Lebuh Raja Ahas meda alta ke bisi ba Damaskus, iya pan lalu ngirumka pelan ke bisi gambar alta nya enggau chara ngaga alta nya ngagai Imam Urijah.
11 Imam Urijah ngaga siti alta nitihka pelan ke diberi Raja Ahas ari Damaskus. Iya tembu ngaga alta nya sebedau Raja Ahas pulai.
12 Pengudah raja pulai ari Damaskus, iya meda alta nya lalu mansang ngagai alta nya. Iya pan nyerahka pemeri ba atas alta nya.
13 Iya nyerahka pemeri tunu enggau pemeri bijirin nyentukka asap pemeri nya niki ke atas. Iya mega nuangka pemeri wain, lalu mechikka darah pemeri bebaik ba atas alta nya.
14 Udah nya, iya mindahka alta temaga ke ba depan Rumah Sembiang Jehovah ngagai sepiak utara alta iya. Sebedau nya, alta temaga nya bisi ba entara Rumah Jehovah enggau alta iya.
15 Ku Raja Ahas madah ngagai Imam Urijah: “Ba alta ke besai nya, serahka pemeri tunu ke biasa diserahka maya pagi hari nyentukka asap pemeri nya niki ke atas, lalu serahka pemeri bijirin ke biasa diserahka maya lemai hari. Serahka mega pemeri tunu enggau pemeri bijirin ari raja. Pia mega, serahka pemeri tunu, pemeri bijirin, enggau pemeri wain ari bala rayat. Ba atas alta nya, nuan mega patut mechikka semua darah ari pemeri tunu enggau semua darah ari pemeri ke bukai. Tang pasal alta temaga nya, awakka aku empu meh nentuka nama utai ke patut digaga ngagai alta nya.”
16 Imam Urijah pan ngereja semua utai ke diasuh Raja Ahas.
17 Kelimpah ari nya, Raja Ahas mega muka begian tisi kerita temaga lalu mutung nya nyadi beberapa iti begian. Udah nya, iya mindahka bisin ke ba atas kerita nya. Iya mega ngambi Tasik Temaga ke ba atas patung sapi lelaki ke digaga ari temaga, lalu ngengkahka nya ba atas lantai batu.
18 Endur ke dikena maya Hari Sabat, iya nya endur ke bisi perabung ba Rumah Sembiang, mega dipindahka iya. Iya mega mindahka jalai ke ditengah raja tama ngagai Rumah Jehovah. Iya ngereja nya laban iya takutka raja Asiria.
19 Sejarah bukai pasal Ahas, iya nya pasal utai ke udah digaga iya, bisi ditulis ba bup sejarah pasal jeman bala raja Judah.
20 Udah nya, Ahas mati lalu dikuburka begulai enggau aki ini iya ba Kuta David. Anak lelaki iya, Hesekiah,* nganti iya nyadi raja.
