2 Raja 17:1-41
17 Ba taun ke-12 Raja Ahas ari Judah merintah, Hoshea anak Elah berengkah nyadi raja Israel. Iya merintah ba Samaria pengelama semilan taun.
2 Iya majak ngereja utai ti jai ba mata Jehovah, tang enda sejai bala raja Israel ke sebedau tu.
3 Raja Salmaneser ari Asiria datai nyerang iya, lalu iya pan nyadi ulun raja nya. Iya berengkah mayar chukai* ngagai raja nya.
4 Tang, raja Asiria nyau nemu pasal Hoshea ke deka angkat ngelaban, laban Hoshea bisi ngirumka pesan ngagai Raja So ba Ejip. Hoshea mega enda agi mayar chukai ninting taun ngagai raja Asiria. Nya alai, raja Asiria nanchang iya lalu ngurung iya ba dalam jil.
5 Raja Asiria nyerang serata Israel. Udah nya, iya mansang ngagai Samaria lalu ngepung Samaria pengelama tiga taun.
6 Ba taun kesemilan Hoshea merintah, raja Asiria nguasa Samaria. Udah nya, iya nangkap orang Israel lalu nabanka sida ngagai Asiria. Iya ngasuh sida diau ba Halah, ba Habor ke semak enggau Sungai Gosan, enggau ba kuta-kuta orang Media.
7 Utai tu nyadi laban orang Israel udah bedosa ngagai Petara sida, Jehovah. Iya meh ke udah ngelepaska sida ari kuasa Firaun, iya nya raja Ejip, lalu mai sida pansut ari menua Ejip. Sida nyembah* petara-petara bukai
8 sereta nitihka adat bansa bukai ke udah diburu Jehovah. Sida mega nitihka adat ke udah ditetapka bala raja Israel.
9 Orang Israel majak ngereja utai ti jai ba mata Petara sida, Jehovah. Sida majak nirika endur alai orang nyembah petara pelesu* ba semua kuta sida, enda ngira ba menara jaga tauka ba kuta ke bisi dinding ti teguh.*
10 Sida majak nirika tiang batu keramat enggau tiang kayu keramat ba tiap iti bukit ti tinggi enggau ba baruh tiap iti pun kayu ti subur.
11 Ba endur alai orang nyembah petara pelesu, sida majak nunu pemeri baka ke digaga bansa bukai ke udah diburu Jehovah. Sida majak ngereja utai ti jai ke ngasuh Jehovah ringat.
12 Sida enggai badu nyembah patung ti dipegedika* Jehovah, taja pan Iya kala madah ngagai sida: “Anang ngereja nya!”
13 Jehovah majak meri amaran ngagai orang Israel enggau orang Judah nengah semua nabi Iya enggau orang ke dianjung Iya.* Ku Iya madah: “Tinggalka pengawa kita ti jai! Terus meh ngasika pesan enggau atur Aku, iya nya semua adat ke diberi Aku ngagai aki ini kita. Adat nya diberi Aku ngagai kita nengah bala nabi Aku.”
14 Tang sida enggai mending. Sida balat amat degil baka aki ini sida ke enda arapka Petara sida, Jehovah.
15 Sida majak nulak atur Iya enggau sempekat ke udah digaga Iya enggau aki ini sida. Sida mega nulak jaku pengingat ke diberi Iya nyadika amaran. Sida enggai badu nyembah patung ke nadai guna, lalu sida empu pan nyadi orang ke nadai guna. Sida iya nunda semua pengawa bansa bukai ke ngelingi sida, taja pan Jehovah udah nagang sida ngereja nya.
16 Sida ngelanggar semua pesan Petara sida, Jehovah, lalu sida ngaga tiang kayu keramat sereta ngaga dua iku patung anak sapi ari besi. Sida besugang ngagai semua utai ke ba langit lalu nyembah Baal.
17 Sida mega nunu anak lelaki enggau anak indu sida. Sida ngereja pengawa meramal enggau betilitka nasit,* lalu majak nyerahka* diri ngereja utai ti jai ba mata Jehovah ke ngasuh Iya ringat.
18 Nyadi, Jehovah balat amat pedis ati ngagai orang Israel. Nya alai, Iya muai semua sida ngambika nadai dipeda Iya. Semina raban bansa Judah aja ke agi tinggal.
19 Taja pia, orang Judah pan enda ngasika pesan Petara sida, Jehovah. Sida mega nitihka adat ke dititihka orang Israel.
20 Jehovah enggai nerima semua peturun Israel. Iya ngemaluka sida lalu nyerahka sida ngagai bala munsuh.* Pengujung iya, Iya muru sida ari menua nya.
21 Iya nyeraraka* Israel ari ruang bilik David, lalu sida ngasuh Jeroboam anak Nebat nyadi raja. Tang, Jeroboam ngasuh orang Israel limpang ari Jehovah lalu ngasuh sida ngereja dosa ti besai.
22 Orang Israel majak ngereja semua dosa ke digaga Jeroboam, lalu sida enggai ninggalka dosa nya.
23 Pengujung iya, Jehovah muai orang Israel ngambika nadai agi dipeda Iya. Utai nya nyadi baka ke udah dipadahka Iya nengah semua nabi Iya. Nya alai, orang Israel ditangkap lalu dibai ngagai Asiria. Sida diau ba dia nyentukka seharitu.
24 Udah nya, raja Asiria mai orang ari Babilon, Kutah, Ava, Hamat, enggau Separbaim ngagai Samaria, lalu ngasuh sida diau ba kuta-kuta ba Samaria kena nganti orang Israel. Sida nguasa Samaria lalu diau ba kuta-kuta ba dia.
25 Lebuh sida berengkah diau ba dia, sida enda nangika* Jehovah. Nya alai, Jehovah ngasuh singa datai kia, lalu sekeda ari bala sida mati dibunuh singa.
26 Udah nya, raja Asiria nerima berita tu: “Orang ari bansa bukai ke udah ditangkap nuan lalu diasuh nuan diau ba kuta-kuta ba Samaria enda nemu agama* enggau Petara ba menua nya. Nya alai, Petara majak ngasuh singa datai kia lalu munuh sida, laban nadai siku ari sida ke nemu agama enggau Petara ba menua nya.”
27 Nyadi, raja Asiria pan meri pesan tu: “Asuh siku imam ke udah ditangkap kita pulai baru kia lalu diau ba dia, ngambika iya ulih ngajar sida pasal agama enggau Petara ba menua nya.”
28 Nya alai, siku ari bala imam ke udah ditangkap sida ari Samaria pan pulai baru lalu diau ba Bethel. Iya berengkah ngajar orang ba dia baka ni sida ulih nangika* Jehovah.
29 Taja pia, tiap iti bansa ngaga petara sida empu, lalu petara nya diengkahka sida ba kuil ke digaga orang Samaria ba endur ti tinggi. Tiap iti bansa sama bela ngereja nya ba kuta endur alai sida diau.
30 Orang Babilon ngaga patung Sukot-benot, orang Kutah ngaga patung Nergal, orang Hamat ngaga patung Asima,
31 lalu orang Ava ngaga patung Nibhas enggau Tartak. Orang Separbaim nunu anak lelaki sida ke petara sida, iya nya Adramelek enggau Anamelek.
32 Taja pan sida nangika Jehovah, tang sida ngelantik orang biasa nyadi imam. Bala imam nya gawa ba kuil ba endur ti tinggi.
33 Sida sigi nangika Jehovah, tang sida mega nyembah petara sida empu nitihka agama* ba menua asal sida.
34 Sampai ke seharitu, sida agi nitihka agama asal sida. Nadai siku pan ari sida nyembah* Jehovah. Sida enda nitihka Adat Moses, atur Jehovah, pemutus Iya, sereta pesan ke diberi Iya ngagai bala anak lelaki Jakop. (Nama Jakop udah ditukar nyadi Israel.)
35 Lebuh Jehovah ngaga sempekat enggau orang Israel, Iya meri pesan tu: “Kita enda tau nangika petara bukai. Anang besugang ngagai sida tauka nyembah sida tauka nyerahka pemeri ngagai sida.
36 Kita patut nangika Aku, Jehovah, ke udah mai kita pansut ari Ejip ngena lengan Aku ti bekuasa sereta ngena kuasa Aku ti besai. Ngagai Aku meh kita patut besugang sereta nyerahka pemeri.
37 Kita patut bebendar nitihka Adat Moses, atur, pemutus, enggau pesan ke udah ditulis Aku ke kita. Kita enda tau nangika petara bukai.
38 Anang enda ingatka sempekat Aku enggau kita. Kita enda tau nangika petara bukai.
39 Aku meh Petara kita, Jehovah, ke patut dikenangika kita, laban Aku meh ke deka nyelamatka kita ari semua munsuh kita.”
40 Tang, orang bansa bukai nya enda ngasi. Sida majak nitihka agama* asal sida.
41 Sida nangika Jehovah, tang sida mega nyembah patung ke digaga sida. Sampai ke seharitu, bala anak enggau bala uchu sida agi nitihka pengawa aki ini sida.
Nota Kaki
^ Tauka “mai pemeri.”
^ Jaku Asal, “nangika.”
^ Jaku Asal, “endur ti tinggi.”
^ Iya nya, ba semua endur, enda ngira ba endur ke bisi mayuh orang tauka mimit orang.
^ Leka jaku Hebrew nya engka bekaul enggau leka jaku “tai” kena nunjukka asai ati ti balat keji.
^ Tauka “orang ke ulih meda utai ke dipandangka Petara dalam runding iya.”
^ Tauka “nyual.”
^ Pengawa ke ngasuh orang nemu utai ke deka nyadi.
^ Tauka “orang ke ngerampas utai.”
^ Tauka “nyarikka.”
^ Tauka “nyembah.”
^ Tauka “adat agama.”
^ Tauka “nyembah.”
^ Tauka “adat agama.”
^ Jaku Asal, “nangika.”
^ Tauka “adat agama.”
