2 Raja 19:1-37
19 Pengudah Raja Hesekiah ninga nya, iya pan nyarikka gari diri lalu ngerasukka kain guni. Udah nya, iya mansang ngagai Rumah Jehovah.
2 Hesekiah ngasuh Eliakim ke nyadi orang ke ngemataka istana, Sebna ke nyadi sekretari, enggau bala tuai imam betemu enggau Nabi Isaiah anak Amoz. Sida mega udah ngerasukka kain guni.
3 Ku sida madah ngagai Isaiah: “Tu meh utai ke dipadahka Hesekiah: ‘Seharitu kitai diperinsa, dikelese, sereta dikemaluka, laban kitai baka indu ke deka beranak, tang nadai pengering deka ngadaka anak.
4 Raja Asiria udah ngasuh Rabsakeh datai ngeleseka Petara ti idup. Engka Petara Jehovah udah ninga semua utai ke disebut iya. Awakka Petara Jehovah ngukum seduai iya. Nyadi, besampi meh ngarika kami ke agi bisi ba menua tu.’”
5 Bala pegawai Raja Hesekiah pan mansang betemu enggau Isaiah,
6 lalu Isaiah madah ngagai sida: “Tu meh utai ke patut dipadahka kita ngagai tuan kita: ‘Jehovah madah: “Anang nejuka jaku pegawai raja Asiria ngasuh nuan takut. Iya bejaku ngelaban Aku.
7 Nya alai, Aku deka ngasuh iya bisi siti runding. Pengudah iya ninga siti riput, iya deka pulai ngagai menua iya empu. Aku deka ngasuh iya dibunuh ngena pedang ba menua iya empu.”’”
8 Pengudah Rabsakeh ninga pasal raja Asiria nyurutka diri ari Lakis, iya pan pulai deka betemu enggau raja. Maya nya, iya meda raja benung beperang ngelaban Libnah.
9 Lebuh raja Asiria ninga pasal Raja Tirhakah ari Etiopia udah datai deka beperang ngelaban iya, iya lalu ngasuh orang ngirumka pesan ngagai Raja Hesekiah:
10 “Padahka tu ngagai Raja Hesekiah ari Judah: ‘Petara ke dipechayaka nuan engka madah: “Jerusalem tentu enda diserahka ngagai raja Asiria.” Bula Iya nya! Anang ninga utai ku Iya.
11 Nuan empu udah ninga baka ni bala raja Asiria udah nganchurka semua menua bukai. Nuan ngumbai nuan deka selamat?
12 Bala aki ini aku ke nganchurka semua menua nya. Bisi ka petara sida nyelamatka sida? Ni orang Gosan, orang Haran, orang Resep, enggau orang Eden ke ba Tel-asar?
13 Ni raja orang Hamat enggau raja orang Arpat? Ni raja ari kuta Separbaim, kuta Hena, enggau kuta Iwah?’”
14 Hesekiah ngambi surat ari orang ke mai pesan nya, lalu macha surat nya. Udah nya, Hesekiah mansang ngagai Rumah Jehovah lalu ngerembaika surat nya ba depan Jehovah.
15 Hesekiah berengkah besampi ba depan Jehovah. Ku iya madah: “O Jehovah, Petara orang Israel, ke duduk ba kerusi diraja ba atas* cherub. Nuan aja meh Petara ti bendar, ti bekuasa atas semua perintah ba dunya. Nuan meh ke udah ngaga langit enggau dunya.
16 O Jehovah, dingaka lalu pendingka meh! O Jehovah, buka meh mata Nuan lalu peda meh! Dingaka jaku kelese Senakerip ke ditujuka ngagai Nuan, Petara ti idup.
17 Sigi amat Jehovah, bala raja Asiria udah nganchurka bansa bukai enggau menua sida,
18 sereta nunu bala petara sida. Semua nya ukai petara, tang patung ke digaga mensia ari kayu enggau batu. Nya kebuah sida ulih dianchurka.
19 Nya alai, Jehovah, Petara kami, selamatka meh kami ari raja Asiria, ngambika semua perintah ba dunya tu nemu semina Nuan aja meh Petara, O Jehovah.”
20 Udah nya, Isaiah anak Amoz ngirumka pesan tu ngagai Hesekiah: “Tu meh utai ke dipadahka Jehovah, Petara orang Israel: ‘Aku udah ningaka sampi nuan pasal Raja Senakerip ari Asiria.
21 Tu meh utai ke dipadahka Jehovah pasal raja nya:
“Indu dara Sion begedika nuan sereta ngeleseka nuan.
Anak indu Jerusalem ngilikka pala sereta ketawaka nuan.
22 Sapa ke dicabar sereta dikeleseka nuan?
Sapa ke diperak nuan?
Sapa ke dikemaruhka nuan?
Nuan ngelaban Petara Israel ti Kudus!
23 Nuan nganjung orang ngeleseka Jehovah. Ku nuan madah:‘Ngena kerita kuda aku ti mayuh,Aku deka niki gunung ti tinggi,Ngagai endur ti pemadu dalam ba Lebanon.
Aku deka nebang pun kayu sidar ti tinggi sereta pun kayu juniper ti pemadu manah.
Aku deka tama ngagai endur diau ti pemadu jauh, indah tama ngagai utan ti pemadu tebal.
24 Aku deka numbak telaga lalu ngirup ai ba menua bukai;Aku deka ngerangkaika semua sungai* ba Ejip ngena tapa kaki aku.’
25 Kati nuan nadai kala ninga? Ari kelia menya, utai nya udah lama ditentuka.*
Kenyau ari suba, Aku udah ngatur utai nya.
Diatu meh maya Aku deka ngereja nya.
Nuan deka ngeruntuhka kuta ti teguh nyadi tugung batu.
26 Orang ke diau ba dia deka nyadi nadai daya;Sida deka berasai takut sereta malu.
Sida deka nyadi lemi baka sayur ke ba ladang sereta baka rumput;*Sida baka rumput ke ba atap ke rangkai ketegal angin ti angat ari timur.
27 Aku nemu kemaya nuan duduk, kemaya nuan pansut, kemaya nuan tama,Sereta kemaya nuan ringat ngagai Aku,
28 Laban Aku ulih ngasaika pengeringat nuan ngagai Aku, sereta ninga penyarut ke nyadi ketegal nuan.
Nyadi, Aku deka ngaitka pengait ba idung nuan, lalu masang kekang* ba mulut nuan;Aku deka mai nuan pulai baru ngagai endur asal nuan.”
29 “‘Tu meh tanda kena nuan* nemu utai tu amat deka nyadi: Taun tu kita deka makai bijirin ke tumbuh kediri,* lalu ba taun ti kedua mega kita deka makai bijirin ke tumbuh ba endur ti sama. Tang, ba taun ti ketiga, kita deka nanam leka lalu ngetau asil iya. Kita deka nanam anggur lalu makai asil iya.
30 Orang Judah ke agi idup deka nyadi baka utai tumbuh ti beurat jauh ke dalam tanah, lalu bebuah lebat.
31 Orang ke agi idup deka pansut ari Jerusalem, lalu orang ke selamat deka pansut ari Gunung Sion. Jehovah, ketuai soldadu serega, keran deka ngereja nya.
32 “‘Nyadi, tu meh utai ke dipadahka Jehovah pasal raja Asiria:
“Iya tentu enda tama ngagai kuta tuTauka nimbakka anak panah kiaTauka mai terabai nyerang kuta tuTauka ngaga tugung tanah kena ngepung kuta tu.
33 Iya deka pulai nengah jalai ti sama maya iya datai;Iya tentu enda tama ngagai kuta tu,” ku Jehovah.
34 “Aku deka nyaga kuta tu lalu nyelamatka iya ketegal nama AkuEnggau ketegal nembiak Aku, David.”’”
35 Malam nya, melikat Jehovah datai ngagai kem orang Asiria lalu munuh 185,000 iku soldadu. Maya orang dani tumu pagi hari, sida meda semua bangkai nya betegaring ba dia.
36 Nya alai, Raja Senakerip ari Asiria pulai ngagai Nineweh lalu diau ba dia.
37 Lebuh iya besugang ba kuil petara Nisrok, anak lelaki iya ke benama Adramelek enggau Sareser munuh iya ngena pedang. Udah nya, seduai iya rari ngagai Ararat. Anak lelaki iya ke benama Esar-hadon pan nganti iya nyadi raja.
Nota Kaki
^ Tauka engka, “entara.”
^ Tauka “saluran Sungai Nil.”
^ Jaku Asal, “nyadi.”
^ Jaku Asal, “rumput gadung.”
^ Iya nya, besi ke diengkah ba dalam mulut kuda, lalu ditanchang ngena tali ba mulut enggau rekung kuda.
^ Iya nya, Hesekiah.
^ Tauka “makai asil ari leka bijirin ke labuh lalu tumbuh.”
