2 Raja 2:1-25
2 Maya pan nyau datai alai Jehovah deka ngambi Elijah niki ke langit ngena ribut ti balat. Maya nya, Elijah enggau Elisa mupuk ari Gilgal.
2 Ku Elijah madah ngagai Elisa: “Nuan tinggal ditu dulu, laban Jehovah udah ngasuh aku ngagai Bethel.” Tang Elisa madahka: “Aku besumpah atas nama Jehovah, Petara ti idup, sereta atas nama nuan,* aku enggai ninggalka nuan.” Nyadi, seduai iya pan mupuk ngagai Bethel.
3 Udah nya, bala nabi* ba Bethel datai betemu enggau Elisa, lalu madah ngagai iya: “Nemu nuan, Jehovah deka ngambi tuan nuan seharitu, lalu iya enda agi nyadi ketuai nuan?” Ku Elisa nyaut: “Nemu aku. Anang bejaku pasal nya agi.”
4 Elijah madahka: “Elisa, nuan tinggal ditu, laban Jehovah udah ngasuh aku ngagai Jeriko.” Tang Elisa madahka: “Aku besumpah atas nama Jehovah, Petara ti idup, sereta atas nama nuan,* aku enggai ninggalka nuan.” Nyadi, seduai iya pan mupuk ngagai Jeriko.
5 Udah nya, bala nabi ba Jeriko datai betemu enggau Elisa, lalu madah ngagai iya: “Nemu nuan, Jehovah deka ngambi tuan nuan seharitu, lalu iya enda agi nyadi ketuai nuan?” Ku Elisa nyaut: “Nemu aku. Anang bejaku pasal nya agi.”
6 Ku Elijah madah ngagai Elisa: “Tinggal ditu dulu meh nuan, laban Jehovah udah ngasuh aku ngagai Sungai Jordan.” Tang Elisa madahka: “Aku besumpah atas nama Jehovah, Petara ti idup, sereta atas nama nuan,* aku enggai ninggalka nuan.” Nyadi, seduai iya pan mupuk.
7 Bisi 50 iku nabi nitihka seduai iya. Sida meda seduai iya ari jauh maya seduai iya bediri ba tebing Sungai Jordan.
8 Udah nya, Elijah ngambi baju jubah iya, ngulung baju nya, lalu malu sungai nya ngena baju nya. Ai sungai nya tebelah lalu seduai iya pan meraka ke seberai nengah tanah ti rangkai.
9 Pengudah seduai iya datai ba seberai, Elijah terus madah ngagai Elisa: “Padahka, nama utai ke deka nuan gaga aku ke nuan sebedau Petara ngambi aku?” Elisa pan nyaut: “Awakka aku nerima dua kali lipat kuasa kudus* ke bisi ba nuan.”
10 Ku Elijah madah: “Tusah utai ke dipinta nuan nya. Enti nuan bisi meda lebuh Petara ngambi aku, nuan deka nerima utai ke dipinta nuan. Tang enti nuan enda meda aku, nuan enda nerima utai nya.”
11 Lebuh seduai iya bejalai sambil berandau enggau pangan diri, tiba-tiba siti kerita kuda ke beapi ti ditarit kuda ke beapi nyeraraka seduai iya, lalu Elijah pan ditabanka ribut ti balat ke langit.
12 Lebuh Elisa meda utai ke benung nyadi, iya ngangauka Elijah enggau nyawa ti inggar: “Tuan aku! Tuan aku!* Kerita kuda Israel enggau orang ke nepan kuda!” Lebuh Elisa nadai agi meda Elijah, iya lalu nyarikka gari iya empu nyadi dua.
13 Udah nya, Elisa ngambi baju jubah Elijah ke udah labuh, lalu mansang ngagai tebing Sungai Jordan.
14 Iya pan malu ai sungai nya ngena baju jubah Elijah, lalu madahka: “Ni Jehovah, Petara Elijah?” Ai sungai nya tebelah lebuh dipalu iya, lalu iya pan meraka ke seberai.
15 Lebuh bala nabi ba Jeriko meda iya ari jauh, sida pan madahka: “Kuasa kudus ke bisi ba Elijah udah diberi ngagai Elisa.” Nyadi, sida pan mansang betemu enggau iya lalu besugang ba depan iya.
16 Sida madah ngagai Elisa: “Ba kami ditu bisi 50 iku lelaki ke berani. Awakka sida mupuk ngiga tuan nuan. Ni nemu kuasa kudus* Jehovah udah ngangkatka iya, lalu mai iya ngagai siti gunung tauka siti lebak.” Tang Elisa nyaut: “Enda ibuh.”
17 Taja pia, sida majak ngansak iya sampai iya berasai malu. Nya alai, iya madah: “Au meh.” Sida pan ngasuh 50 iku lelaki nya ngiga Elijah. Sepengelama tiga hari sida ngiga iya, tang nadai tetemuka iya.
18 Udah nya, sida pulai ngagai Elisa ke benung diau ba Jeriko. Elisa madah ngagai sida: “Endaka aku udah madah enda ibuh?”
19 Pengudah sesiti timpuh, orang ba kuta nya madah ngagai Elisa: “Baka ke ditemu nuan, tuan, endur kuta tu udah manah. Tang, ai ba ditu ke enda manah, lalu nadai utai ke ulih tumbuh ba tanah.”*
20 Ku Elisa madah: “Bai siti mangkuk mit ti baru ngagai aku, lalu engkahka garam ba dalam mangkuk nya.” Sida pan ngereja nya.
21 Udah nya, iya mansang lalu nikauka garam ngagai pun penatai ai kuta nya. Ku iya madahka: “Tu meh utai ke dipadahka Jehovah: ‘Aku udah ngasuh ai tu nyadi beresi. Nadai agi ke mati tauka mandul* ketegal ai tu.’”
22 Baka ke dipadahka Elisa, ai nya beresi sampai ke seharitu.
23 Ari endur nya, iya pan mupuk ngagai Bethel. Ba rantau jalai, sekeda bala nembiak lelaki pansut ari kuta lalu ngeleseka iya. Ku sida majak madah ngagai iya: “Pala botak, mupuk nuan ari tu! Pala botak, mupuk nuan ari tu!”
24 Pengujung iya, iya malik ke belakang lalu merening sida, lalu nyumpah sida dalam nama Jehovah. Udah nya, dua iku beruang indu pansut ari utan, lalu nyarikka 42 iku bala nembiak nya.
25 Iya pan neruska pejalai ngagai Gunung Karmel. Udah nya, iya pulai baru ngagai Samaria.
Nota Kaki
^ Tauka “atas nama nuan ti idup.”
^ Jaku Asal, “bala anak nabi.” Engka merujuk ngagai sekula ke ngelatih bala nabi tauka merujuk ngagai gerempung bala nabi.
^ Tauka “atas nama nuan ti idup.”
^ Tauka “atas nama nuan ti idup.”
^ Peda Penerang Leka Jaku.
^ Jaku Asal, “Apai aku! Apai aku!”
^ Tauka “ribut.”
^ Tauka engka, “lalu tanah ngasuh gugur anak.”
^ Tauka engka, “gugur anak.”
