2 Raja 20:1-21
20 Bisi sekali, Hesekiah sakit lalu nyauka mati. Nya alai, Nabi Isaiah anak Amoz datai lalu madah ngagai iya: “Tu meh utai ke dipadahka Jehovah: ‘Padah meh pesan nuan ti penudi ngagai ruang bilik nuan, laban nuan deka mati. Nuan enda ulih gerai.’”
2 Hesekiah pan malik ngagai dinding lalu besampi ngagai Jehovah:
3 “O Jehovah, ingat meh baka ni aku udah setia nitihka jalai Nuan enggau pengabis ati. Aku udah ngereja utai ti manah ba mata Nuan.” Udah nya, Hesekiah pan balat amat nyabak.
4 Sebedau Isaiah datai ba laman tengah istana, Jehovah lalu bejaku ngagai iya:
5 “Pulai baru ngagai Hesekiah ke nyadi tuai bala nembiak Aku, lalu padahka ngagai iya: ‘Tu meh utai ke dipadahka Jehovah, Petara aki nuan, David: “Aku udah ninga sampi nuan, lalu Aku udah meda ai mata nuan. Aku deka ngeraika nuan. Ba hari ti ketiga, nuan deka mansang ngagai Rumah Jehovah.
6 Aku deka ngasuh nuan idup 15 taun da agi, lalu Aku deka nyelamatka nuan enggau kuta tu ari raja Asiria. Aku deka nyaga kuta tu ketegal nama Aku enggau ketegal nembiak Aku, David.”’”
7 Udah nya, Isaiah madahka: “Bai buah ara ti rangkai ke udah dienyak.” Nyadi, sida pan mai buah ara nya lalu ngengkahka iya ba pisa Hesekiah. Udah nya, Hesekiah pan majak gerai.
8 Sebedau nya, Hesekiah bisi nanya Isaiah: “Nama tanda ke nunjukka Jehovah deka ngeraika aku, lalu aku deka mansang ngagai Rumah Jehovah ba hari ti ketiga?”
9 Ku Isaiah nyaut: “Tu meh tanda ari Jehovah ke nunjukka Jehovah deka ngamatka jaku Iya: Nuan ka meda bayang-bayang ba tangga* nya mansang ke depan 10 langkah, tauka surut ke belakang 10 langkah?”
10 Ku Hesekiah madah: “Sigi nadai penanggul enti bayang-bayang mansang ke depan 10 langkah. Tang surut ke belakang 10 langkah, enda ulih nya.”
11 Nya alai, Nabi Isaiah pan besampi ngagai Jehovah, lalu Iya ngasuh bayang-bayang ba tangga Ahas nya surut 10 langkah.
12 Maya nya, raja Babilon ke benama Berodak-baladan anak Baladan ngirumka surat enggau pemeri ngagai Hesekiah, laban iya bisi ninga rita pasal Hesekiah ke sakit.
13 Hesekiah nerima penatai bala sida ke dianjung raja nya, lalu iya nunjukka ngagai sida endur alai iya nyimpan reta. Ba dia bisi pirak, emas, minyak balsam,* minyak ti berega, senyata iya, sereta semua utai bukai ke bisi ba dia. Semua utai ke ba istana iya enggau ba serata perintah iya dipandangka iya magang ngagai sida.
14 Udah nya, Nabi Isaiah datai ngagai Raja Hesekiah lalu nanya: “Nama utai dipadah sida? Ari ni penatai sida?” Ku Hesekiah nyaut iya: “Sida datai ari endur ti jauh, ari Babilon.”
15 Udah nya, Isaiah nanya: “Nama utai dipeda sida ba istana nuan?” Ku Hesekiah nyaut: “Semua utai ke ba istana aku, nyengkaum utai ke bisi ba endur alai aku nyimpan reta, dipeda sida magang. Nadai utai ke enda dipandangka aku ngagai sida.”
16 Ku Isaiah madah ngagai Hesekiah: “Dingaka jaku Jehovah.
17 Ku Jehovah madah: ‘Maya deka datai alai semua utai ke bisi ba istana nuan, nyengkaum semua utai ke udah disimpan aki ini nuan nyentukka seharitu, deka dibai ngagai Babilon. Nadai siti pan ke deka tinggal.
18 Sekeda ari bala peturun nuan deka ditangkap lalu nyadi pegawai ba istana raja Babilon.’”
19 Ku Hesekiah madah ngagai Isaiah: “Manah utai ke dipadah Jehovah ngagai nuan nya.” Udah nya, iya nampung baru: “Udah chukup manah enti ba sepemanjai pengidup aku bisi pengelantang enggau pengelikun.”*
20 Sejarah bukai pasal Hesekiah, iya nya pasal semua pengering iya sereta chara iya ngaga kolam enggau saluran ke dikena mai ai ngagai kuta, bisi ditulis ba bup sejarah pasal jeman bala raja Judah.
21 Pengujung iya, Hesekiah mati, lalu anak lelaki iya, Manasi, nganti iya nyadi raja.
Nota Kaki
^ Engka tangga ke dikena madahka jam, baka jam mata panas.
^ Peda Penerang Leka Jaku.
^ Tauka “pemendar.”
