2 Raja 23:1-37
23 Nyadi, raja pan ngirumka pesan, lalu ngasuh orang ngangauka semua bala tuai orang Judah enggau Jerusalem.
2 Udah nya, raja mansang ngagai Rumah Jehovah sama enggau semua orang Judah, semua rayat Jerusalem, bala imam, enggau bala nabi. Semua orang ke biak tauka tuai nitihka raja. Ba depan sida, iya macha semua utai ke dipadahka ba bup sempekat ke udah ditemu ba Rumah Jehovah.
3 Raja bediri semak tiang lalu ngaga siti sempekat* enggau Jehovah. Raja besemaya deka nitihka Jehovah lalu deka ngasika pesan Iya, jaku pengingat Iya, sereta atur Iya. Raja deka ngereja nya enggau pengabis ati iya sereta pengabis pengidup iya. Iya besemaya deka ngereja semua utai ke ditulis ba bup nya. Semua rayat pan setuju enggau sempekat nya.
4 Udah nya, raja ngasuh Imam Besai Hilkiah, bala imam ke nulung Hilkiah, enggau orang ke nyaga pintu mai semua utai tu pansut ari Rumah Sembiang Jehovah: Semua pekekas ke dikena nyembah Baal, nyembah tiang kayu keramat, enggau pekekas ke dikena nyembah semua utai ke ba langit. Raja pan nunu semua utai nya ba lereng Kidron ke ba luar Jerusalem, lalu mai amau nya ngagai Bethel.
5 Raja muru semua imam ke nyembah petara orang asing. Sida meh ke dilantik bala raja Judah ngambika nyerahka pemeri ba endur alai orang nyembah petara pelesu,* ke ba kuta-kuta Judah enggau ba kawasan ke ngelingi Jerusalem. Raja mega muru orang ke nyerahka pemeri tunu* ngagai Baal, mata panas, bulan, bintang,* enggau semua utai ke ba langit.
6 Iya mansutka tiang kayu keramat ari Rumah Jehovah, lalu mai tiang nya ngagai Lebak Kidron ba luar Jerusalem. Ba dia meh iya nunu tiang nya. Udah nya, iya nganchurka tiang nya sampai nyadi debu, lalu iya naburka debu nya ngagai kubur orang biasa.
7 Iya mega ngeruntuhka endur alai bala pelacur lelaki* diau, ke bisi ba dalam Rumah Jehovah. Ba dia meh bala indu nenun langkau kain ke dikena nyembah tiang kayu keramat.
8 Josiah mai semua imam pansut ari kuta-kuta Judah. Iya ngamahka endur alai orang nyembah petara pelesu, ke bisi ba Geba nyentuk ngagai Beer-sheba. Nya meh endur ke dikena bala imam nyerahka pemeri tunu sida. Iya mega ngeruntuhka endur alai orang nyembah petara pelesu ba pintu penama Josua.* Endur nya bisi ba sepiak kiba lebuh orang tama nengah pintu kuta.
9 Bala imam ke gawa ba endur alai orang nyembah petara pelesu enda gawa ba alta Jehovah ke ba Jerusalem. Tang, sida agi makai roti ke enda beragi sama enggau bala menyadi sida.
10 Josiah mega ngamahka Topet ke ba Lebak Hinom,* ngambika nadai siku pan nunu anak sida nyadika pemeri ngagai Molek.
11 Sebedau tu, bala raja Judah udah nyerahka* kuda ke pengawa nyembah mata panas. Bala kuda nya dibai tama ngagai Rumah Jehovah nengah bilik* pegawai istana ke benama Natan-melek. Bilik iya ba dalam endur ke bisi atap sereta mayuh tiang. Josiah nagang bala kuda nya tama ngagai Rumah Sembiang. Iya mega nunu kerita kuda ke dikena ba pengawa nyembah mata panas.
12 Raja mega ngeruntuhka alta ke digaga bala raja Judah ba atas perabung bilik Ahas enggau alta ke digaga Manasi ba dua iti laman Rumah Jehovah. Iya nganchurka alta nya sampai nyadi debu lalu naburka debu nya ba Lebak Kidron.
13 Kelimpah ari nya, raja mega ngamahka endur alai orang nyembah petara pelesu ke bisi ba depan Jerusalem, iya nya ba selatan* Bukit Kana.* Ba dia meh raja Israel ke benama Solomon nirika endur alai nyembah petara Astoret, iya nya petara orang Sidon; Kemos, iya nya petara orang Moap; enggau Milkom, iya nya petara orang Amon. Semua nya dipegedika Petara magang.
14 Iya mechahka tiang batu keramat lalu nebang tiang kayu keramat. Iya mega ngasuh endur nya penuh enggau tulang mensia.
15 Iya ngeruntuhka alta ba Bethel, iya nya endur alai orang nyembah petara pelesu. Endur nya digaga Jeroboam anak Nebat ke udah ngasuh orang Israel bedosa. Udah nya, Josiah nunu endur nya lalu nganchurka iya sampai nyadi debu. Iya mega nunu tiang kayu keramat ke bisi ba dia.
16 Lebuh Josiah malik, iya tepedaka pendam ba kawasan gunung. Iya pan ngambi tulang ari pendam nya lalu nunu tulang nya ba alta, ngambika alta nya enda ulih agi dikena orang sembiang. Utai tu nyadi sejalai enggau utai ke dipadahka Jehovah nengah nembiak Petara ti bendar.
17 Udah nya, Josiah nanya: “Aku bisi meda batu nisan ba dia. Kubur sapa nya?” Ku orang ke diau ba kuta nya nyaut iya: “Nya kubur nembiak Petara ti bendar ari Judah. Iya meh ke udah dulu madahka pasal semua utai ke baru udah digaga nuan ngagai alta ba Bethel.”
18 Nya alai, Josiah madahka: “Tejuka aja. Anang ngachau tulang iya.” Nyadi, sida pan enda ngachau tulang nabi nya. Sida mega enda ngachau tulang nabi ari Samaria ke bisi ba dia.
19 Josiah mega ngeruntuhka semua kuil ba endur alai orang nyembah petara pelesu ke bisi ba kuta-kuta Samaria. Kuil nya digaga bala raja Israel kena ngemediska ati Petara. Josiah ngereja utai ti sama, baka ke udah digaga iya ba Bethel.
20 Iya munuh semua imam ke gawa ba endur alai orang nyembah petara pelesu. Semua imam nya dibunuh iya ba atas alta. Iya mega nunu tulang mensia ba alta nya. Udah nya, iya pulai ngagai Jerusalem.
21 Raja lalu madahka pesan tu ngagai semua rayat iya: “Intu Pengerami Paska ke Jehovah, Petara kita, baka ke udah ditulis ba bup sempekat tu.”
22 Sida nadai kala ngintu Pengerami Paska ke baka nya kenyau ari jeman bala hakim merintah Israel, tauka kenyau ari jeman bala raja Israel enggau bala raja Judah.
23 Ba taun ke-18 Raja Josiah merintah, sida ngintu Pengerami Paska ke Jehovah ba Jerusalem.
24 Josiah muru manang enggau orang ke nemu nujum.* Iya mega nganchurka patung terafim,* patung ti kamah,* enggau semua utai ke dipegedika Petara ke bisi ba Judah enggau Jerusalem. Iya ngereja nya laban deka nitihka Adat Moses ke bisi ditulis ba bup ke udah ditemu Imam Hilkiah ba dalam Rumah Jehovah.
25 Iya nitihka semua Adat Moses sereta pulai baru ngagai Jehovah enggau pengabis ati, pengabis pengidup, enggau pengabis pengering iya. Nadai kala bisi raja ke baka Josiah, enda ngira sebedau iya tauka pengudah iya.
26 Taja pia, Jehovah agi balat ringat ngagai Judah laban Manasi ngereja semua utai ke ngemediska ati Iya.
27 Ku Jehovah madah: “Aku mega deka muai Judah ngambika nadai agi dipeda Aku, baka Aku ke udah muai Israel. Aku deka nulak Jerusalem taja pan Aku udah milih kuta tu. Aku mega deka nulak Rumah Aku taja pan Aku kala madahka: ‘Nama Aku deka mengkang ba dia.’”
28 Sejarah bukai pasal Josiah, iya nya pasal semua utai ke udah digaga iya, bisi ditulis ba bup sejarah pasal jeman bala raja Judah.
29 Maya jeman Raja Josiah, Firaun Neko ke merintah Ejip datai betemu enggau raja Asiria ba tebing Sungai Eupratis. Raja Josiah mansang deka belaban enggau Raja Neko. Tang lebuh Neko tepedaka iya, Neko lalu munuh iya ba Megido.
30 Nyadi, bala pegawai iya mai bangkai iya ngena kerita kuda ari Megido ngagai Jerusalem, lalu nguburka iya ba kubur iya empu. Udah nya, bala rayat nata Jehoahas anak Josiah nyadi raja kena nganti apai iya.
31 Jehoahas beumur 23 taun lebuh iya berengkah nyadi raja, lalu iya merintah pengelama tiga bulan ba Jerusalem. Nama indai iya Hamutal. Hamutal nya anak Jeremiah ari Libnah.
32 Jehoahas berengkah ngereja utai ti jai ba mata Jehovah, nitihka semua utai ke digaga aki ini iya.
33 Firaun Neko ngejil Jehoahas ba Riblah, ngambika iya enda ulih merintah ba Jerusalem. Riblah bisi ba menua Hamat. Udah nya, Firaun ngasuh bala rayat Judah mayar denda 100 talenta* pirak enggau 1 talenta emas.
34 Kelimpah ari nya, Firaun Neko ngelantik Eliakim anak Josiah nyadi raja kena nganti apai iya. Firaun mega nukar nama Eliakim nyadi Jehoyakim. Udah nya, Firaun mai Jehoahas ngagai Ejip lalu pengujung iya Jehoahas mati ba Ejip.
35 Ketegal Jehoyakim patut mayar pirak enggau emas ngagai Firaun Neko, iya minta bala rayat mayar chukai ngagai iya. Iya ngasuh sida mayar emas enggau pirak, nitihka chukai ke udah ditentuka ke tiap iku orang.
36 Jehoyakim beumur 25 taun lebuh iya berengkah nyadi raja, lalu iya merintah pengelama 11 taun ba Jerusalem. Nama indai iya Sebidah. Sebidah nya anak Pedayah ari Ruma.
37 Jehoyakim majak ngereja utai ti jai ba mata Jehovah, nitihka semua utai ke udah digaga aki ini iya.
Nota Kaki
^ Tauka “ngaga baru siti sempekat.”
^ Jaku Asal, “endur ti tinggi.”
^ Tauka “pemeri tunu nyentukka asap niki.”
^ Tauka “zodiak.”
^ Tauka “pelacur lelaki ba kuil.”
^ Tauka “Josua, iya nya ketuai kuta nya.”
^ Peda Penerang Leka Jaku, “Gehena.”
^ Jaku Asal, “meri.”
^ Tauka “bilik makai.”
^ Jaku Asal, “kanan.” Iya nya, selatan, lebuh orang nunga ke timur.
^ Tauka “Bukit Pengerusak,” kelebih agi begian ti pemadu ujung ba selatan bukit nya, lalu mega dikumbai Bukit Penyai.
^ Pengawa ke ngasuh orang nemu utai ke deka nyadi.
^ Tauka “patung ke disembah diri sebilik.”
^ Leka jaku Hebrew nya engka bekaul enggau leka jaku “tai” kena nunjukka asai ati ti balat keji.
^ Peda Rujukan B14.
