2 Raja 25:1-30
25 Ba hari ke-10, dalam bulan ke-10, ba taun kesemilan Raja Sedekiah merintah, Raja Nebukadnesar ari Babilon enggau semua soldadu iya datai nyerang Jerusalem. Sida nirika kem semak kuta nya lalu ngaga benteng ngelingi kuta nya.
2 Sida ngepung kuta nya nyentukka taun ke-11 Raja Sedekiah merintah.
3 Ba hari kesemilan dalam bulan ti keempat, lapar pungkang balat nyadi ba kuta nya. Orang ba menua nya nadai agi pemakai.
4 Bala munsuh pan mujur mechahka dinding kuta. Semua soldadu Sedekiah ngerarika diri maya malam hari nengah pintu kuta ke ba entara dua iti dinding kuta ke semak enggau taman raja. Raja Sedekiah mupuk nengah jalai ke nuju ngagai Arabah. Maya nya, orang Kaldea benung ngepung kuta nya.
5 Bala soldadu Kaldea pan begagaika Raja Sedekiah, lalu nangkap iya ba menua puang Jeriko. Semua soldadu Sedekiah ngerarika diri ninggalka iya.
6 Pengudah Sedekiah ditangkap, iya lalu dibai ngagai raja Babilon ba Riblah ngambika diakim.
7 Sida munuh bala anak lelaki Sedekiah ba depan mata Sedekiah. Udah nya, Raja Nebukadnesar ngasuh Sedekiah nyadi buta, lalu nanchang iya ngena rantai temaga. Sida lalu mai iya ngagai Babilon.
8 Ba hari ti ketujuh, dalam bulan ti kelima, ba taun ke-19 Raja Nebukadnesar merintah Babilon, pegawai iya ke benama Nebusaradan datai ngagai Jerusalem. Nebusaradan nya ketuai jejaga istana iya.
9 Nebusaradan nunu Rumah Jehovah, istana raja, enggau semua rumah ba Jerusalem, nyengkaum rumah tiap iku orang ke tinggi pangkat.
10 Kelimpah ari nya, ketuai jejaga istana nya enggau semua soldadu Kaldea ngeruntuhka dinding kuta ke ngelingi Jerusalem.
11 Nebusaradan, iya nya ketuai jejaga istana nya, nangkap bala rayat ke agi bisi ba kuta nya, bala orang ke nyerahka diri ngagai raja Babilon, enggau sida ke bukai.
12 Tang, ketuai jejaga istana nya nejuka sekeda orang ke pemadu miskin tinggal ba menua nya, lalu sida diasuh gawa ba kebun anggur enggau ba ladang.
13 Orang Kaldea mechahka tiang temaga ba Rumah Jehovah. Sida mega mechahka kerita temaga enggau Tasik Temaga ke bisi ba Rumah Jehovah. Udah nya, sida mai semua temaga nya ngagai Babilon.
14 Sida mega ngambi beledi, sekup, utai kena madamka lampu, cawan, enggau semua pekekas temaga ke dikena ba Rumah Sembiang.
15 Ketuai jejaga istana ngambi pekekas endur engkah bara api enggau mangkuk ke digaga ngena emas enggau pirak ti tulin.
16 Temaga ke diulih ari dua iti tiang, ari Tasik Temaga, enggau ari kerita ke digaga Solomon ke Rumah Jehovah kelalu mayuh, nyentukka semua nya enda alah ditimbang.
17 Peninggi tiap iti tiang nya 18 kiubit.* Pala tiang nya digaga ngena temaga lalu peninggi pala tiang nya tiga kiubit. Buah delima enggau rantai ke baka jala ti melit pala tiang nya digaga ari temaga. Tiang ti kedua nya pan sama baka tiang ti keterubah.
18 Ketuai jejaga istana nya mega nangkap Serayah, Sepaniah, enggau tiga iku orang ke nyaga pintu. Serayah nya ketuai imam, lalu Sepaniah nya penulung ketuai imam.
19 Ari kuta nya, iya mega nangkap pegawai istana ke nyadi ketuai soldadu, 5 iku orang ke paling rapat enggau raja, 60 iku orang biasa, enggau sekretari ketuai soldadu ke ngempuruka orang nyadi soldadu.
20 Nebusaradan pan mai semua sida ngagai raja Babilon ba Riblah.
21 Raja Babilon lalu munuh semua sida ba Riblah ke ba menua Hamat. Baka nya meh orang Judah dibuai ari menua sida empu.
22 Raja Nebukadnesar ari Babilon ngelantik Gedaliah anak Ahikam ngemataka bala rayat ke agi tinggal ba menua Judah. Gedaliah nya uchu Sapan.
23 Lebuh semua ketuai soldadu enggau bala soldadu sida ninga pasal raja Babilon udah ngelantik Gedaliah, sida pan terus betemu enggau Gedaliah ba Mispah. Bala ketuai soldadu ke betemu enggau Gedaliah nya Ismail anak Netaniah, Johanan anak Kareah, orang Netopah ke benama Serayah anak Tanhumet, enggau Jasaniah anak orang Maakah.
24 Gedaliah besumpah ngagai sida enggau soldadu sida. Ku iya madah: “Anang takut nyadi ulun orang Kaldea. Diau ba menua tu lalu ngasika raja Babilon. Nya baru kita deka selamat.”
25 Ba bulan ti ketujuh, bisi siku peturun diraja ke benama Ismail anak Netaniah, iya nya uchu Elisama, datai ngagai Mispah. Bisi 10 iku orang ke enggau iya kia. Sida munuh Gedaliah, nyengkaum orang Judah enggau orang Kaldea ke bisi enggau Gedaliah ba Mispah.
26 Udah nya, semua rayat, enda ngira tuai tauka biak, rari ngagai Ejip sama enggau bala ketuai soldadu laban sida takutka orang Kaldea.
27 Ba taun ti sama Ebil-merodak berengkah nyadi raja Babilon, iya ngelepaska raja Judah ke benama Jehoyakin ari jil. Utai nya nyadi kena hari ke-27 dalam bulan ke-12, iya nya ba taun ke-37 pengudah Raja Jehoyakin ditangkap.
28 Ebil-merodak manah enggau Jehoyakin, lalu iya mega meri Jehoyakin penuduk ti tinggi agi ari bala raja ke dibai ngagai Babilon.
29 Nyadi, Jehoyakin enda agi ngena gari ke dikena iya ba jil. Jehoyakin mega seruran makai enggau raja nya sepemanjai pengidup iya.
30 Ba sepemanjai pengidup Jehoyakin, raja nya ngasuh orang nyediaka pemakai ke iya ninting hari.
Nota Kaki
^ Peda Rujukan B14.
