2 Raja 5:1-27
5 Raja Siria bisi siku ketuai soldadu ke benama Naaman. Mayuh orang ngelala iya lalu raja amat bebasaka iya, laban nengah iya, Jehovah udah ngasuh Siria menang.* Iya siku pahlawan ti kering. Taja pia, iya bisi penyakit kulit ti balat.*
2 Bisi sekali, lebuh orang Siria nyerang menua Israel, sida nangkap siku nembiak indu, lalu nembiak nya nyadi ulun bini Naaman.
3 Ku nembiak indu nya madah ngagai bini Naaman: “Endaka manah enti tuan ulih betemu enggau nabi ba Samaria? Nabi nya tentu ulih ngeraika penyakit kulit iya.”
4 Nya alai, iya* pan madah ngagai tuan iya pasal utai ke dipadahka nembiak indu ari Israel nya.
5 Udah nya, raja Siria madahka: “Alai meh, aku deka ngirumka surat ngagai raja Israel.” Nyadi, iya pan mupuk mai 10 talenta* pirak, 6,000 singkap emas, enggau 10 pasang gari.
6 Iya pan nyuaka surat nya ngagai raja Israel. Tu utai ke dipadah dalam surat nya: “Aku ngasuh pegawai aku, Naaman, mai surat tu ngagai nuan ngambika nuan ulih ngeraika penyakit kulit iya ti balat.”
7 Pengudah macha surat nya, raja Israel lalu nyarikka gari iya lalu madahka: “Iya ngumbai aku tu Petara pia, ke ulih ngasuh orang mati tauka idup? Iya nganjung lelaki tu ngagai aku, lalu ngasuh aku ngeraika penyakit kulit iya ti balat. Peda kita! Iya endang sengaja deka belaya enggau aku.”
8 Lebuh Elisa, nembiak Petara ti bendar nya, ninga pasal raja ke udah nyarikka gari diri, iya lalu terus ngirumka pesan tu ngagai raja: “Nama kebuah nuan nyarikka gari diri? Asuh iya datai ngagai aku kitu, ngambika iya nemu ba Israel bisi siku nabi.”
9 Nya alai, Naaman datai enggau bala iya, raban kuda iya, sereta kerita kuda iya, lalu bediri ba depan pintu rumah Elisa.
10 Elisa ngasuh orang ngirumka pesan tu ngagai Naaman: “Alai nuan nyelam tujuh kali ba Sungai Jordan. Nya baru nuan deka gerai, lalu kulit nuan nyadi manah baru.”
11 Pengudah ninga nya, Naaman pan ringat lalu mupuk. Ku iya madah: “Kumbai aku iya ka betemu enggau aku, bediri ditu ngangauka nama Petara iya, Jehovah, lalu ngayunka jari iya ke depan enggau ke belakang ba atas tubuh aku ke kena penyakit kulit, kena ngeraika aku.
12 Sungai Abanah enggau Sungai Parpar ba Damaskus manah agi ari semua sungai ba Israel. Nama kebuah enda ngasuh aku kia aja deh ngambika gerai?” Iya pan mupuk enggau ati ti ringat.
13 Ulun Naaman datai ngagai iya lalu madahka: “Tuan,* enti nabi nya ngasuh nuan ngereja utai ti tusah, tentu nuan deka ngereja iya, enda pia? Tang, iya semina ngasuh nuan nyelam ngambika nuan gerai. Endaka utai nya senang dikereja?”
14 Naaman mupuk ngagai Sungai Jordan lalu nyelam tujuh kali, nitihka asuh nembiak Petara ti bendar. Iya pan gerai, lalu kulit iya nyadi manah baru baka kulit anak mit.
15 Udah nya, Naaman enggau semua bala iya pulai baru ngagai nembiak Petara ti bendar. Iya bediri ba depan Elisa lalu madah: “Diatu baru aku nemu, nadai Petara bukai ba serata dunya, kelimpah ari Petara Israel. Terima meh pemeri ari aku tu.”
16 Tang Elisa madah: “Aku besumpah atas nama Jehovah, Petara ti idup ke disembah aku, aku enggai nerima pemeri nya.” Iya majak ngansak Elisa nerima pemeri nya. Tang, Elisa tetap enggai nerima.
17 Pengujung iya, Naaman madah: “Enti pia, beri aku tanah ari menua tu, naka ke ulih dibai dua iku baghal.* Aku deka nyerahka pemeri tunu enggau pemeri bukai ngagai Jehovah aja. Aku enggai agi nyerahka pemeri ngagai petara bukai.
18 Tang, aku deka minta ampun ari Jehovah pasal siti pekara tu: Tiap kali tuan aku besugang ba kuil* Rimon, iya bepegai ba lengan aku. Nyadi, lebuh iya besugang, aku terpaksa besugang sama enggau iya. Nya alai, aku ngarapka Jehovah ngampunka aku.”
19 Nyadi, Elisa madah ngagai iya: “Mupuk meh, anang irau.” Naaman pan mupuk. Pengudah Naaman bejalai jauh ari endur nya,
20 Gehasi, iya nya penulung Elisa, lalu berunding: “Tuan aku udah ngelakka Naaman, orang Siria nya, mupuk pia aja lalu enggai nerima utai ke dibai iya. Aku besumpah atas nama Jehovah, Petara ti idup, aku deka ngagai iya lalu ngulihka utai ari iya.”
21 Gehasi pan ngagai Naaman. Lebuh Naaman tepedaka bisi orang benung begagaika iya, iya pan nurun ari kerita kuda iya lalu betemu enggau orang nya. Ku iya nanya: “Bisi nama-nama utai?”
22 Ku Gehasi nyaut: “Nadai. Semua manah magang. Tuan aku ngasuh aku datai betemu enggau nuan. Ku iya madah: ‘Tadi bisi dua iku lelaki ke biak ari bala nabi* datai ngagai aku, ari kawasan ke begunung ba Efraim. Beri meh siti talenta pirak enggau dua pasang gari ngagai seduai iya.’”
23 Naaman pan madahka: “Endai, ambi meh dua talenta pirak.” Iya majak ngansak Gehasi, lalu ngengkahka dua talenta pirak enggau dua pasang gari ke dalam dua iti kantung. Udah nya, iya meri dua iti kantung nya ngagai dua iku orang gaji iya. Dua iku nya pan bejalai dulu ari Gehasi.
24 Lebuh Gehasi datai ba Opel,* iya pan ngambi utai nya ari dua iku orang gaji nya, lalu ngasuh seduai iya mupuk. Pengudah dua iku nya mupuk,
25 iya pan tama lalu bediri semak tuan iya. Ku Elisa nanya iya: “Ari ni nuan, Gehasi?” Ku iya nyaut: “Nadai aku kini-kini deh, tuan.”
26 Nyadi, Elisa madah ngagai iya: “Kumbai nuan enda nemu aku, nuan udah ngagai iya kin, lalu iya nurun ari kerita kuda iya betemu enggau nuan. Kati tu maya ti sesuai alai nerima pirak, gari, ladang buah kana, kebun anggur, bedus, sapi, tauka ulun lelaki, tauka ulun indu?
27 Diatu, penyakit kulit Naaman deka lekat ba nuan enggau peturun nuan belama iya.” Gehasi pan terus mupuk. Maya nya mega, iya kena penyakit kulit ti balat lalu kulit iya nyadi burak baka seleju.
Nota Kaki
^ Tauka “selamat.”
^ Tauka “sakit lan; kusta.”
^ Engka merujuk ngagai Naaman.
^ Peda Rujukan B14.
^ Jaku Asal, “Apai aku.”
^ Merujuk ngagai anak ke ada ari keledai lelaki enggau kuda indu.
^ Jaku Asal, “rumah.”
^ Engka siti bukit tauka kubu ba Samaria.
