2 Raja 6:1-33
6 Bala nabi* madah ngagai Elisa: “Sekut mai endur alai kitai diau tu.
2 Awakka kami ngagai Sungai Jordan. Tiap iku kami deka ngambi sebatang kayu balak, lalu ngaga endur alai diau ba din.” Ku iya madahka: “Alai meh.”
3 Siku ari sida iya nanya: “Ulih nuan enggau kami?” Ku iya nyaut: “Bah! Aram meh.”
4 Nyadi, iya pan mupuk enggau sida. Pengudah sida datai ba Sungai Jordan, sida lalu nebang pun kayu.
5 Lebuh siku ari sida iya benung nebang pun kayu, pala kapak iya ngelechut lalu labuh ke dalam ai. Ku iya madahka: “Akai dai, tuan! Kapak nya diinjau aku ari orang.”
6 Elisa, nembiak Petara ti bendar nya, lalu nanya: “Ba dini iya labuh?” Nyadi, lelaki nya pan nunjukka endur pala kapak nya labuh. Udah nya, Elisa mutung sebatang kayu lalu nikauka kayu nya kia. Pala kapak nya pan melepung.
7 Ku Elisa madahka: “Ambi pala kapak nya.” Nyadi, lelaki nya pan ngambi pala kapak nya.
8 Nyadi, bisi sekali, raja Siria deka beperang ngelaban Israel. Iya berandau enggau bala pegawai iya, lalu madah ngagai sida ba dini alai sida patut nirika kem.
9 Udah nya, nembiak Petara ti bendar ngirumka pesan tu ngagai raja Israel: “Bejimat kita. Anang mansa endur nya, laban orang Siria deka datai nengah endur nya.”
10 Raja Israel pan ngirumka pesan ngagai orang ke bisi ba endur nya. Beberapa kali, Elisa meri amaran ngagai raja Israel. Nya meh kebuah raja Israel ngenyauhka diri ari semua endur ke dipadahka Elisa nya.
11 Tu ngasuh raja* Siria balat amat ringat. Iya ngangauka bala pegawai iya, lalu madah ngagai sida: “Padah ngagai aku, sapa entara kita ke bepiak enggau raja Israel?”
12 Udah nya, siku ari pegawai iya madahka: “Ukai kami, tuan raja! Elisa ke madah ngagai raja Israel pasal utai ke dipadahka nuan ba bilik nuan. Elisa nya nabi ba Israel.”
13 Ku raja Siria madahka: “Alai, giga iya. Aku deka ngasuh orang nangkap iya.” Udah nya, raja bisi nerima berita pasal Elisa ke bisi ba Dotan.
14 Iya lalu terus nganjung seraban soldadu ti besai, sereta mayuh kuda enggau kerita kuda kia. Sida datai ba kuta nya maya malam hari, lalu ngepung kuta nya.
15 Tumu pagi hari siti, penulung nembiak Petara ti bendar dani lalu pansut. Iya meda seraban soldadu enggau bala kuda sereta kerita kuda ngepung kuta nya. Penulung nya lalu terus madah ngagai Elisa: “Apu, tuan! Nama utai ke patut digaga kitai?”
16 Tang, Elisa madahka: “Anang takut. Bala kitai mayuh agi ari bala sida.”
17 Udah nya, Elisa berengkah besampi: “O Jehovah, buka meh mata iya ngambika iya ulih meda.” Tekala nya mega, Jehovah muka mata penulung Elisa. Iya pan meda ba kawasan ke begunung nya penuh laban kuda enggau kerita kuda ke beapi ngelingi Elisa.
18 Lebuh orang Siria datai ngagai Elisa, iya besampi: “Asuh bala sida tu buta.” Nyadi, Jehovah pan ngasuh sida buta, baka ke dipinta Elisa.
19 Elisa madah ngagai sida: “Ukai tu jalai iya. Ukai tu kuta ke digiga kita. Titihka aku, lalu aku deka mai kita ngagai lelaki ke digiga kita.” Tang, Elisa mai sida ngagai Samaria.
20 Lebuh sida datai ba Samaria, Elisa madahka: “O Jehovah, buka meh mata sida ngambika sida ulih meda.” Nyadi, Jehovah pan muka mata sida, lalu sida nemu diri ba Samaria.
21 Lebuh raja Israel meda sida, iya madah ngagai Elisa: “Patut aku munuh sida? Patut aku munuh sida, tuan?”
22 Tang, ku Elisa nyaut: “Anang munuh sida. Kati nuan deka munuh orang ke ditangkap nuan ngena pedang enggau panah? Beri sida roti enggau ai, ngambika sida ulih makai sereta ngirup, lalu pulai baru ngagai tuan sida.”
23 Nya alai, raja nya pan nyediaka pengerami makai besai ke sida. Pengudah sida makai enggau ngirup, iya pan ngasuh sida pulai ngagai tuan sida. Kenyau ari nya, bala perumpak ari Siria nadai agi datai ngagai menua Israel.
24 Udah nya, Ben-hadad, iya nya raja Siria, ngempuruka semua soldadu iya. Sida mupuk lalu ngepung Samaria.
25 Ketegal nya, Samaria dituntung lapar pungkang ti balat, nyentukka pala keledai dijual ngena rega 80 singkap duit pirak. Indah mimit* aja tai burung achang deh dijual ngena rega lima singkap duit pirak.
26 Lebuh raja Israel benung bejalai ba atas dinding kuta, bisi siku indu madah ngagai iya: “O tuan raja, tulung meh aku!”
27 Ku raja nya nyaut: “Enti Jehovah enda nulung nuan, ba dini agi aku ulih minta tulung ke nuan? Nuan ngumbai aku ulih meri nuan pemakai, wain, tauka minyak?”
28 Ku raja nya nanya iya: “Nama penanggul nuan?” Ku indu nya nyaut: “Bisi siku indu madah ngagai aku: ‘Beri anak lelaki nuan ke diempa kitai seharitu, lalu pagila kitai deka makai anak lelaki aku.’
29 Nyadi, kami pan ngerebus anak lelaki aku lalu makai iya. Hari siti, aku madah ngagai indu nya: ‘Beri anak lelaki nuan ke diempa kitai.’ Tang, iya ngelalaika anak iya.”
30 Pengudah raja ninga utai ku indu nya, iya pan terus nyarikka gari diri. Lebuh iya bejalai ba atas dinding kuta, orang meda iya ngena kain guni ba dalam gari iya.
31 Udah nya, raja nya madah: “Awakka Petara ngukum aku enggau balat, enti pala Elisa anak Sapat enda dipumpung seharitu!”
32 Maya nya, Elisa enggau bala tuai benung duduk ba rumah iya. Raja Israel nganjung siku orang ngagai Elisa. Tang sebedau orang nya datai, Elisa madah ngagai bala tuai nya: “Anak pemunuh nya udah ngasuh orang kitu mumpung pala aku. Lebuh orang nya datai, tutup pintu lalu tanka pintu nya. Tuan iya bisi ba belakang iya.”
33 Maya Elisa benung bejaku enggau sida, orang ke dianjung raja Israel pan datai, lalu ku raja madahka: “Jehovah meh ke ngasuh penusah tu nyadi. Nama kebuah aku ka nganti Jehovah?”
