2 Raja 7:1-20
7 Ku Elisa madahka: “Dingaka jaku Jehovah. Tu meh utai ke dipadahka Jehovah: ‘Ba maya tu pagila, ba pintu kuta Samaria, rega seguni* tepung ti alus nya sesingkap duit pirak,* lalu rega dua guni* barli nya sesingkap duit pirak.’”
2 Pegawai soldadu ke dikearapka raja pan madah ngagai nembiak Petara ti bendar: “Taja Jehovah muka pintu langit pan, nadai meh utai tu ulih nyadi.” Ku Elisa nyaut: “Nuan empu deka meda, tang nuan enda makai nya.”
3 Bisi empat iku orang ke bisi penyakit kulit ti balat* ba pintu penama kuta, lalu sida bejaku ngagai pangan diri: “Nama kebuah kitai duduk ditu nganti diri deka mati?
4 Enti kitai tama ngagai kuta, mati keberuran ga kitai. Tang enti kitai duduk ditu, ba ditu ga kitai mati. Nyadi, manah agi kitai ngagai kem orang Siria. Enti sida nejuka kitai idup, idup meh kitai. Tang enti sida munuh kitai, mati ga kitai.”
5 Nya alai, sida mupuk ngagai kem orang Siria maya hari nyauka malam. Lebuh sida datai ba luar kem orang Siria, sida nadai tetemuka orang ba dia.
6 Nya ketegal Jehovah udah ngasuh orang Siria ninga bunyi raban soldadu ti besai, kerita kuda, enggau bala kuda. Nya alai, sida madah ngagai pangan diri: “Peda! Raja Israel udah ngaji raja Het enggau raja Ejip ngambika datai nyerang kitai!”
7 Nyadi, sida terus ngerarika diri lalu angkat ninggalka langkau kain sida, bala kuda, enggau bala keledai. Maya nya, hari nyauka malam. Sida angkat ninggalka kem pia aja, laban deka nyelamatka diri.
8 Lebuh empat iku orang ke bisi penyakit kulit nya datai ngagai kem orang Siria, sida tama ngagai siti langkau kain lalu makai sereta ngirup ba dia. Sida mega ngambi pirak, emas, enggau gari ke bisi ba dia. Sida mupuk lalu ngelalaika utai nya. Udah nya, sida pulai baru lalu tama ngagai langkau kain ke bukai. Sida mega ngambi utai ari langkau kain nya, mupuk, lalu ngelalaika utai nya.
9 Pengujung iya, sida bejaku enggau pangan diri: “Salah utai digaga kitai tu. Kitai patut madahka orang bukai berita manah tu. Enti kitai enda madah, lalu nganti hari baru ka tawas, kitai tentu deka diukum. Aram kitai mupuk, lalu madahka tu ngagai orang ke ba istana.”
10 Sida pan mupuk, lalu madah ngagai orang ke nyaga pintu kuta: “Kami udah ngagai kem orang Siria, tang nadai orang ba dia. Kami nadai ninga nyawa orang, lalu langkau kain sida ditinggalka pia aja. Semina bisi bala kuda enggau keledai ke ditanchang ba dia.”
11 Orang ke nyaga pintu kuta nya lalu terus madahka pasal nya ngagai orang ke ba istana.
12 Malam nya, raja dani lalu madah ngagai bala pegawai iya: “Aku deka madahka kita pelan orang Siria. Sida nemu kitai lapar. Nya kebuah sida ninggalka kem sida, lalu belalai ba padang. Ku sida madah: ‘Enti sida pansut ari kuta, kitai deka nangkap sida idup-idup. Udah nya, kitai tama ngagai kuta sida.’”
13 Siku ari pegawai iya lalu madah: “Tuan, asuh beberapa iku orang mai lima iku kuda ke agi tinggal ba kuta tu. Asuh sida kin ngambika sida meda utai ke nyadi ba din. Enda ngira sida kin tauka ba ditu, sida tetap deka mati baka semua orang Israel ke udah mati. Enda lama da agi, semua kitai pan deka mati.”
14 Nyadi, sida pan ngambi dua iti kerita kuda, lalu raja ngasuh sida mupuk ngagai kem orang Siria ngambika meda utai ke nyadi.
15 Sida neruska pejalai sampai ngagai Sungai Jordan. Ba rantau jalai, sida tepedaka mayuh gari enggau perengka ke ditinggalka orang Siria ke udah berumban ngerarika diri. Sida pan pulai lalu madahka pasal nya ngagai raja.
16 Orang Israel pan pansut lalu ngerampas utai ba kem orang Siria. Baka ke dipadahka Jehovah, rega seguni tepung ti alus nya sesingkap duit pirak, lalu rega dua guni barli nya sesingkap duit pirak.
17 Raja udah ngelantik pegawai soldadu ke dikearapka iya nya bejaga ba pintu kuta. Tang, iya mati ba dia ketegal diindik orang mayuh, baka ke dipadah nembiak Petara ti bendar lebuh raja datai betemu enggau iya.
18 Utai nya nyadi baka ke dipadahka nembiak Petara ti bendar ngagai raja: “Ba maya tu pagila, ba pintu kuta Samaria, rega seguni tepung ti alus nya sesingkap duit pirak, lalu rega dua guni barli nya sesingkap duit pirak.”
19 Tang, pegawai soldadu nya kala madah ngagai nembiak Petara ti bendar: “Taja Jehovah muka pintu langit pan, nadai meh utai tu ulih nyadi.” Ku Elisa nyaut: “Nuan empu deka meda, tang nuan enda makai nya.”
20 Nya meh utai ke nyadi ngagai pegawai soldadu nya. Iya mati laban diindik orang mayuh ba pintu kuta.
Nota Kaki
^ Jaku Asal, “1 seah.” Peda Rujukan B14.
^ Jaku Asal, “1 shekel.” Peda Rujukan B14.
^ Jaku Asal, “2 seah.”
^ Tauka “sakit lan; kusta.”
