2 Raja 8:1-29
8 Elisa madah ngagai indu nya (anak lelaki indu nya meh ke udah diidupka Elisa baru sebedau tu): “Jehovah udah madah, lapar pungkang deka nyadi ba menua tu pengelama tujuh taun. Nya alai, mupuk meh kita sebilik, lalu diau ba dini-dini endur nyadi orang asing.”
2 Indu nya pan mupuk, baka ke diasuh nembiak Petara ti bendar nya. Iya mupuk enggau sida sebilik, lalu diau ba menua orang Pilistin pengelama tujuh taun.
3 Pengudah tujuh taun, iya pulai ari menua Pilistin. Iya minta ngagai raja ngambika iya bulih rumah enggau tanah iya baru.
4 Maya nya, raja benung bejaku enggau Gehasi, iya nya penulung nembiak Petara ti bendar. Ku raja madah: “Padah ngagai aku semua utai ti luar biasa ke udah digaga Elisa.”
5 Lebuh Gehasi benung becherita pasal baka ni Elisa udah ngidupka orang ke udah mati, indu nya pan datai ngagai raja laban deka minta rumah enggau tanah iya. Nyadi, Gehasi lalu terus madahka: “Tuan raja, tu indu nya deh. Anak lelaki iya meh ke udah diidupka Elisa ari mati.”
6 Raja pan nanya indu nya, lalu indu nya madahka utai ke udah nyadi. Udah nya, raja ngasuh siku pegawai nulung indu nya. Ku raja madah ngagai pegawai nya: “Pulaika baru semua utai ke enggi iya sereta semua asil ari ladang iya kenyau ari maya iya ninggalka tanah iya.”
7 Lebuh Ben-hadad, iya nya raja Siria, benung sakit, Elisa bisi ba Damaskus. Nyadi, bisi orang madah ngagai raja: “Nembiak Petara ti bendar bisi ba ditu.”
8 Raja lalu madah ngagai Hasael: “Alai nuan betemu enggau nembiak Petara ti bendar. Bai meh pemeri ke iya. Asuh iya nanya Jehovah: ‘Kati ulih aku gerai?’”
9 Hasael pan betemu enggau nembiak Petara ti bendar nya. Iya mai semua macham utai ti manah ke bisi ba Damaskus, lalu semua utai nya dibai ngena 40 iku unta. Ku Hasael madah ngagai Elisa: “Ulun nuan, Raja Ben-hadad ari Siria, udah ngasuh aku nanya nuan sekalika iya deka gerai tauka enda.”
10 Ku Elisa nyaut: “Padah ngagai iya: ‘Nuan tentu deka gerai.’ Tang Jehovah mega nunjukka ngagai aku, iya tentu deka mati.”
11 Elisa pan majak merening Hasael sampai Hasael nyau enda nyamai asai. Udah nya, Elisa lalu nyabak.
12 Hasael pan nanya: “Nama kebuah nuan nyabak, tuan?” Ku Elisa nyaut: “Laban aku nemu nuan deka ngemediska orang Israel. Kuta sida ti teguh deka ditunu nuan, bala soldadu sida ti kering deka dibunuh nuan ngena pedang, bala anak sida deka dipalu nuan sampai mati, lalu perut bala indu ke ngandung deka dicharikka nuan.”
13 Ku Hasael madah: “Nadai aku ulih ngereja utai ke baka nya, tuan. Aku tu baka ukui, ukai orang ke penting.” Tang Elisa madah: “Jehovah udah nunjukka ngagai aku, nuan deka nyadi raja Siria.”
14 Udah nya, iya mupuk lalu pulai ngagai raja. Ku raja nanya iya: “Nama ku Elisa deh?” Ku iya nyaut: “Elisa madah nuan sigi deka gerai.”
15 Tang hari siti, Hasael ngambi siti pua, nyepuhka pua nya ke dalam ai, lalu nekup mua raja ngena pua nya sampai raja mati. Udah nya, Hasael nganti Ben-hadad nyadi raja.
16 Ba taun kelima Jehoram anak Ahap nyadi raja Israel, Jehoram anak Raja Jehosapat berengkah nyadi raja Judah. Maya nya, Jehosapat agi nyadi raja Judah.
17 Umur Jehoram 32 taun lebuh iya nyadi raja, lalu iya merintah ba Jerusalem pengelama lapan taun.
18 Ketegal iya kawin enggau anak indu Ahap, iya nunda pengawa bala raja Israel, baka ke digaga ruang bilik Ahap. Jehoram majak ngereja utai ti jai ba mata Jehovah.
19 Tang Jehovah enggai ngemunaska Judah, ketegal semaya ke udah digaga Iya enggau nembiak Iya, David. Iya besemaya peturun David deka mengkang merintah nyadi raja.*
20 Maya Jehoram merintah, orang Edom angkat ngelaban perintah Judah, lalu ngelantik raja sida empu.
21 Nya alai, Jehoram mai semua kerita kuda iya mansang ngagai Sair ba seberai. Ba dia, orang Edom ngelingi iya enggau bala ketuai raban kerita kuda iya. Tang maya malam hari, iya mansang lalu ngalahka orang Edom. Orang Edom pan ngerarika diri ngagai langkau kain sida.
22 Taja pia, orang Edom majak ngelaban Judah nyentukka seharitu. Maya nya, orang Libnah mega angkat ngelaban Judah.
23 Sejarah bukai pasal Jehoram, iya nya pasal semua utai ke udah digaga iya, bisi ditulis ba bup sejarah pasal jeman bala raja Judah.
24 Pengujung iya, Jehoram mati* lalu dikuburka enggau aki ini iya ba Kuta David. Udah nya, anak lelaki iya, Ahasiah, nganti iya nyadi raja.
25 Ahasiah anak Raja Jehoram nyadi raja Judah ba taun ke-12 Jehoram anak Ahap nyadi raja Israel.
26 Ahasiah beumur 22 taun lebuh iya nyadi raja, lalu iya merintah ba Jerusalem pengelama setaun. Indai iya benama Ataliah. Indai iya uchu* Raja Omri ari Israel.
27 Ahasiah nunda pengawa ruang bilik Ahap, lalu majak ngereja utai ti jai ba mata Jehovah baka sida. Nya ketegal iya kaban belayan ruang bilik Ahap.
28 Iya mansang enggau Jehoram anak Ahap ngagai Ramot-gilead, laban deka beperang ngelaban Raja Hasael ari Siria. Tang, Jehoram bakal laban orang Siria.
29 Abi bakal nya diulih Raja Jehoram lebuh iya belaban enggau Raja Hasael ari Siria ba Ramah.* Nya alai, iya pulai ngagai Jesril ngambika ulih ngenatka diri nganti abi bakal iya gerai. Nyadi, Ahasiah anak Raja Jehoram ari Judah datai ngagai Jesril, laban deka ngabas Jehoram anak Ahap ke udah bakal.*
Nota Kaki
^ Jaku Asal, “besemaya deka seruran meri siti lampu kelita ngagai David enggau bala anak lelaki iya.”
^ Jaku Asal, “digalika begulai enggau aki ini iya.”
^ Jaku Asal, “anak indu.”
^ Nama pandak Ramot-gilead.
^ Tauka “benung sakit.”
