2 Raja 9:1-37
9 Nabi Elisa ngangauka siku ari bala nabi* lalu madahka: “Tanchangka gari nuan ba punggung nuan. Jampat bai butul minyak tu lalu mupuk meh ngagai Ramot-gilead.
2 Pengudah nuan datai ba din, giga Jehu anak Jehosapat. Iya uchu Nimsi. Jehu bisi enggau bala iya. Asuh iya ninggalka sida, lalu bai iya tama ngagai bilik ke ba belakang sekali.
3 Udah nya, ambi butul minyak lalu tuangka minyak ba atas pala iya, lalu padahka: ‘Tu utai ke dipadahka Jehovah: “Aku nata nuan nyadi raja Israel.”’ Udah nya, buka pintu lalu jampat nuan rari ari endur nya.”
4 Nyadi, nabi* nya pan mupuk ngagai Ramot-gilead.
5 Lebuh iya datai, bala ketuai soldadu benung duduk ba dia. Ku iya madah: “Aku bisi pesan ke nuan, tuan.” Jehu nanya: “Pesan ke sapa?” Ku iya madah: “Ke nuan, tuan.”
6 Nyadi, Jehu pan angkat lalu tama ke dalam rumah. Nabi nya nuangka minyak ba atas pala iya lalu madahka: “Tu meh utai ke dipadahka Jehovah, Petara orang Israel: ‘Aku nata nuan nyadi raja bala nembiak Jehovah, Israel.
7 Nuan mesti munuh semua orang ba ruang bilik tuan nuan, Ahap. Aku, Jehovah, deka malas Jesebel laban udah munuh* bala nabi Aku enggau semua nembiak Aku ke bukai.
8 Semua orang ba ruang bilik Ahap deka dipunaska Aku magang. Aku deka munuh semua lelaki ba ruang bilik Ahap, nyengkaum sida ke lemi sereta sida ke nadai daya ba Israel.
9 Aku deka ngasuh ruang bilik Ahap nyadi baka ruang bilik Jeroboam anak Nebat enggau ruang bilik Baasa anak Ahijah.
10 Tang, Jesebel deka diempa bala ukui ba siti padang ba Jesril, lalu nadai orang deka nguburka iya.’” Udah nya, nabi nya muka pintu lalu ngerarika diri.
11 Lebuh Jehu pulai baru ngagai bala ketuai soldadu ke bukai, sida nanya iya: “Bisi nama-nama utai? Nama kebuah orang gila nya datai ngagai nuan?” Ku iya nyaut sida: “Ukai kita enda nemu, orang ke baka nya selalu nyebut utai ke sengapa.”
12 Tang sida madahka: “Enda patut! Padah meh ngagai kami.” Jehu pan madah ngagai sida utai ke dipadahka nabi nya. Udah nya, Jehu madah: “Iya mega madahka: ‘Tu meh utai ke dipadahka Jehovah: “Aku nata nuan nyadi raja Israel.”’”
13 Udah nya, sida terus muka gari diri, lalu ngengkahka gari sida ba tangga ke deka ditengah Jehu. Sida mega nyepu terumpit* lalu madahka: “Jehu udah nyadi raja!”
14 Udah nya, Jehu anak Jehosapat, iya nya uchu Nimsi, bepakat deka ngelaban Jehoram.
Maya nya, Jehoram enggau semua soldadu Israel benung bejaga ba Ramot-gilead, kena nyaga Israel ari diserang Raja Hasael ari Siria.
15 Tang, lebuh Raja Jehoram belaban enggau Raja Hasael, iya bakal laban orang Siria. Nya alai, iya pulai ngagai Jesril, ngambika abi bakal iya ulih gerai.
Ku Jehu madah ngagai bala soldadu iya: “Enti kita setuju, anang nejuka sapa-sapa pansut ari kuta, enggaika sida madahka pekara tu ba Jesril.”
16 Udah nya, Jehu nepan kerita kuda iya lalu mansang ngagai Jesril. Maya nya, Jehoram benung gali ngenatka diri ke udah bakal, lalu Raja Ahasiah ari Judah bisi datai ngabas iya.
17 Siku jejaga ba menara Jesril tepedaka mayuh amat bala Jehu datai. Iya terus madahka: “Mayuh amat orang datai.” Ku Jehoram madahka: “Asuh siku soldadu ke nepan kuda mupuk betemu enggau sida, lalu asuh iya nanya sida: ‘Kati kita datai enggau tuju ti manah?’”
18 Nyadi, soldadu ke nepan kuda nya pan pansut betemu enggau Jehu lalu madahka: “Tu utai ke dipadahka raja: ‘Kati nuan datai enggau tuju ti manah?’” Tang Jehu nyaut: “Tu ukai hal nuan. Titihka aja aku!”
Jejaga menara nya pan madah: “Orang ke dianjung nuan udah betemu enggau sida, tang iya enda pulai.”
19 Nyadi, raja pan ngasuh siku da agi soldadu ke nepan kuda betemu enggau sida. Soldadu nya pan mupuk betemu enggau sida lalu madahka: “Tu utai ke dipadahka raja: ‘Kati nuan datai enggau tuju ti manah?’” Tang Jehu nyaut: “Tu ukai hal nuan. Titihka aja aku!”
20 Jejaga menara nya pan madah: “Orang ke dianjung nuan udah betemu enggau sida, tang iya enda pulai. Pia mega, chara ketuai sida ngemudi kerita kuda iya baka Jehu, uchu* Nimsi, laban iya mai kerita kuda iya baka orang gila.”
21 Ku Raja Jehoram ari Israel madah: “Sediaka kerita kuda!” Pengudah orang nyediaka kerita kuda iya, iya enggau Raja Ahasiah ari Judah mupuk betemu enggau Jehu. Seduai iya bela ngena kerita kuda diri empu. Sida betemu ba tanah ke enggi siku orang Jesril ke benama Nabot.
22 Lebuh Jehoram betemu enggau Jehu, iya lalu terus nanya: “Kati nuan datai enggau tuju ti manah?” Ku Jehu nyaut: “Ni bisi tuju ti manah, enti indai nuan, Jesebel, majak nyundalka diri lalu ngereja mayuh pengawa sihir!”*
23 Jehoram lalu terus nguingka kerita kuda iya deka ngerarika diri. Iya madah ngagai Ahasiah: “Ahasiah, kitai kena tipu!”
24 Jehu ngambi panah iya lalu nimbak Jehoram. Anak panah nya kena entara bau Jehoram lalu ngachuk jantung iya sampai tembus. Iya pan rebah ba dalam kerita kuda iya.
25 Udah nya, Jehu madah ngagai pegawai soldadu iya ke benama Bidkar: “Ambi bangkai Jehoram lalu tikauka iya ba tanah enggi orang Jesril ke benama Nabot. Kati nuan agi ingat utai ke nyadi lebuh tua ngemudi kerita kuda ba belakang apai iya, Ahap? Maya nya, Jehovah madahka utai tu pasal Ahap:
26 ‘“Kemari, Aku meda darah Nabot enggau darah bala anak iya,” ku Jehovah. “Aku deka malas nuan ba tanah tu,” ku Jehovah agi.’ Nyadi, bai bangkai Jehoram lalu tikauka bangkai iya ngagai tanah nya, nitihka utai ke dipadahka Jehovah.”
27 Lebuh raja Judah, iya nya Ahasiah, meda utai ke benung nyadi, iya pan ngerarika diri nitihka jalai ke semak enggau rumah ba siti taman. (Udah nya, Jehu ngagai iya lalu madahka: “Bunuh iya!” Nyadi sida pan nyerang Ahasiah lebuh iya nepan kerita kuda iya ngagai Gur, ke semak enggau Iblim. Tang iya mujur ngerarika diri sampai ngagai Megido, lalu ba dia meh iya mati.
28 Udah nya, bala ulun Ahasiah mai bangkai iya ngagai Jerusalem ngena kerita kuda. Sida nguburka iya ba kubur iya empu begulai enggau aki ini iya ba Kuta David.
29 Ahasiah berengkah nyadi raja Judah ba taun ke-11 Jehoram anak Ahap merintah.)
30 Lebuh Jesebel ninga Jehu udah datai ba Jesril, iya pan ngechuk lilit mata iya chelum lalu ngaduka buk iya. Udah nya, iya malik ke baruh ari jenila.
31 Lebuh Jehu tama nengah pintu kuta, Jesebel madah ngagai iya: “Kati nuan enda ingat utai ke nyadi ngagai Simri ke udah munuh tuan iya empu?”
32 Jehu malik ke atas ngagai jenila lalu madahka: “Sapa ke nyukung aku? Sapa?” Tekala nya, dua tauka tiga iku pegawai istana malik ke baruh.
33 Jehu madahka: “Ju ka iya!” Nyadi, sida pan ngejuka Jesebel, lalu Jesebel labuh ke baruh. Darah iya teperanchit ngagai dinding enggau ngagai kuda. Udah nya, Jehu ngindik Jesebel ngena kuda iya.
34 Jehu pan tama lalu makai enggau ngirup. Ku iya madahka: “Intu bangkai indu ke udah kena sumpah nya lalu kuburka iya, laban iya kan anak indu raja.”
35 Tang lebuh sida mupuk deka nguburka iya, sida semina tetemuka tengkorak, kaki, enggau tapa jari iya aja.
36 Lebuh sida nikal baru ngagai Jehu lalu madah ngagai iya pasal utai ke nyadi, Jehu madahka: “Tu ngamatka jaku Jehovah ke dipadah nengah nembiak Iya, Elijah, orang Tisbi nya. Iya madahka: ‘Ukui deka makai bangkai Jesebel ba tanah menua Jesril.
37 Bangkai Jesebel deka nyadi baja ba tanah Jesril ngambika nadai orang ngelala iya.’”
Nota Kaki
^ Tauka “penulung nabi.”
^ Tauka “laban darah.”
^ Jaku Asal, “tanduk.”
^ Jaku Asal, “anak lelaki.”
^ Peda Penerang Leka Jaku, “Ilmu sihir.”
