2 Samuel 1:1-27
1 Pengudah Saul mati, David pulai pengudah iya ngalahka orang Amalek. Iya diau ba Siklak pengelama dua hari.
2 Ba hari ti ketiga, bisi siku lelaki datai ari kem Saul. Gari iya charik lalu ba pala iya bisi tanah. Lebuh iya datai semak ngagai David, iya lalu nyungkurka diri ke tanah.
3 Ku David nanya iya: “Ari ni penatai nuan?” Ku lelaki nya nyaut: “Aku udah ngerarika diri ari kem Israel.”
4 Ku David nanya iya: “Padah meh ngagai aku, nama utai nyadi ba din?” Ku lelaki nya nyaut: “Bala soldadu Israel udah ngerarika diri. Mayuh ari sida iya mati. Saul enggau anak iya, Jonatan, pan mati.”
5 Udah nya, David nanya lelaki ke agi biak nya, iya ke madahka berita nya ngagai David: “Baka ni nuan nemu Saul enggau anak iya, Jonatan, udah mati?”
6 Lelaki ke biak nya nyaut: “Maya nya, ngam-ngam aku bisi ba Gunung Gilboa, lalu aku bisi meda Saul nyandih ba sangkuh iya. Maya nya, bala soldadu ke nepan kerita kuda enggau soldadu ke nepan kuda majak semak ngagai iya.
7 Lebuh iya malik lalu tepedaka aku, iya pan ngangauka aku. Ku aku nyaut iya: ‘Nama utai, tuan?’
8 Iya nanya aku: ‘Sapa nuan?’ Ku aku nyaut: ‘Aku orang Amalek.’
9 Udah nya, iya madah: ‘Datai kitu meh lalu bunuh aku, laban aku balat amat pedis, tang bedau ga mati.’
10 Nya alai, aku pan mansang semak ngagai iya lalu munuh iya, laban aku meda iya udah labuh sereta balat bakal, lalu aku nemu iya tentu sigi deka mati. Udah nya, aku ngambi makota ke ba pala iya enggau gelang ba lengan iya, lalu mai utai nya ngagai nuan kitu, tuan.”
11 Pengudah ninga nya, David pan nyarikka gari diri. Semua orang ke enggau iya mega ngereja utai ti sama.
12 Sida nyerauh, nyabak, sereta bepuasa sampai malam, laban Saul, anak iya Jonatan, enggau mayuh ari nembiak Jehovah, sereta mayuh orang Israel udah dibunuh ngena pedang.
13 David lalu nanya lelaki ke biak, ke madahka iya berita nya: “Ari ni penatai nuan?” Ku lelaki nya nyaut: “Aku tu anak orang asing, orang Amalek.”
14 Udah nya, David madah ngagai iya: “Nama kebuah nuan berani munuh orang ke ditata Jehovah?”
15 David pan ngangauka siku ari bala iya lalu madahka: “Datai kitu nuan lalu bunuh iya.” Nyadi, orang nya lalu munuh lelaki nya. Lelaki nya pan mati.
16 David madah ngagai iya: “Nuan empu ke betanggungjawapka pemati diri,* laban mulut nuan empu udah ngaku munyi tu: ‘Aku empu udah munuh orang ke ditata Jehovah.’”
17 Udah nya, David besebana ke pemati Saul enggau anak iya, Jonatan, nengah lagu.
18 Lagu nya dikumbai “Panah,” lalu bisi ditulis ba bup Jasar. David mega madahka lagu nya patut diajar ngagai orang Judah. Tu munyi leka lagu nya:
19 “O Israel, orang ke bemulia udah mati ba endur nuan ti tinggi.
Pahlawan nuan ti kering udah rebah!
20 Anang ngerembaika berita tu ba Gat;Anang madahka tu ba jalai ba Askelon,Enggaika anak indu orang Pilistin gaga ati,Enggaika anak indu orang ke enda besunat rami gaga.
21 O gunung-gunung Gilboa,Awakka nadai ambun tauka ujan ninggang nuan,Awakka ladang nuan enda mansutka pemeri ti kudus,Laban ba dia meh terabai pahlawan ti kering nyadi kamah;Terabai Saul nadai agi ditata ngena minyak.
22 Panah Jonatan enggau pedang SaulNgerejang isi bala pahlawan lalu basah laban darah munsuh;Panah enggau pedang seduai iya enda kala nadai asil.
23 Seumur idup seduai iya, Saul enggau Jonatan dikesayauka sereta dikerinduka orang;Indah pemati pan enda ulih nyeraraka seduai iya.
Seduai iya laju agi ari burung menaul,Kering agi ari singa.
24 O anak indu Israel, nyabak meh kita ke Saul.
Iya udah ngias kita lalu ngerasukka gari mirah ba kita,Iya udah ngias gari kita enggau emas.
25 Pahlawan ti kering rebah maya beperang!
Jonatan mati garing-garing ba endur nuan ti tinggi!
26 O menyadi aku, Jonatan, tusah amat ati aku ngenang nuan;Nuan amat dikesayauka aku.
Pengerindu nuan ke aku dalam agi ari pengerindu bala indu.
27 Pahlawan ti kering udah rebah,Lalu senyata perang udah nadai agi!”
Nota Kaki
^ Jaku Asal, “Darah nuan ba pala nuan empu.”
