2 Samuel 14:1-33
14 Joap anak Seruyah nyau nemu raja balat amat lelengauka Absalom.
2 Nya alai, Joap ngasuh orang ngagai Tekoa lalu mai siku indu ke pintar. Ku Joap bejaku enggau indu nya: “Aku minta nuan ngaga diri baka orang ke balat tusah ati. Kena meh gari ke nunjukka nuan balat tusah ati, lalu anang ngunsut diri ngena minyak. Ngaga diri meh baka indu ke udah lama tusah ati ke orang ke udah mati.
3 Udah nya, mansang nuan ngagai raja lalu padahka tu ngagai iya.” Joap pan madahka indu nya utai ke patut disebut iya.
4 Indu ari Tekoa nya lalu betemu enggau raja. Iya nyungkurka diri lalu madahka: “O tuan raja, tulung meh aku.”
5 Ku raja nya nanya iya: “Nama utai ke udah nyadi?” Ku indu nya nyaut: “Kebendar iya, aku tu balu, lalu laki aku udah nadai.
6 Aku bisi dua iku anak lelaki. Bisi sekali, seduai iya belaya ba padang. Maya nya, nadai orang nyeraraka seduai iya. Siku malu ke siku da lalu munuh iya.
7 Diatu, semua kami sebilik ngelaban aku. Ku sida madah: ‘Serahka anak nuan ke udah munuh menyadi iya nya. Kami deka munuh iya kena malas nyawa menyadi iya ke udah mati, taja pan iya waris ruang bilik nuan.’ Sida ka munuh anak aku ke siku-iku nya. Anak aku nya aja meh harapan aku. Enti sida munuh anak aku, nama laki aku enggau peturun iya deka nadai agi ba dunya tu.”
8 Udah nya, raja nya madah ngagai indu nya: “Pulai meh nuan. Aku deka mutarka pekara nya.”
9 Indu ari Tekoa nya madah ngagai raja: “O tuan raja, awakka aku enggau ruang bilik apai aku betanggungjawapka penyalah anak aku nya. Nuan enggau peturun nuan enda salah.”
10 Udah nya, raja bejaku munyi tu: “Enti agi bisi orang bejaku pasal nya ngagai nuan, asuh iya ngagai aku kitu, ngambika iya enda ngachau nuan agi.”
11 Ku indu nya madahka: “Tuan raja, kingatka meh Jehovah, Petara nuan, ngambika orang ke deka malas* enda munuh anak aku.” Raja lalu madah: “Aku besumpah atas nama Jehovah, Petara ti idup, nadai selambar pan buk anak nuan deka labuh ke tanah.”
12 Ku indu nya agi: “Tuan raja, aku agi bisi utai deka dipadahka ngagai nuan.” Ku raja: “Padahka dia meh.”
13 Ku indu nya madah: “Nama kebuah nuan ngereja utai ti tau ngemediska nembiak Petara? Lebuh nuan bejaku munyi nya tadi, nya nunjukka nuan salah, laban nuan muru anak nuan lalu enda mai iya pulai baru.
14 Semua kitai sigi deka mati baka ai ke dituang ngagai tanah, ke enda ulih digumpul baru. Tang, Petara enda nejuka orang mati pia aja. Iya ngiga kebuah deka mai orang ke diburu pulai baru.
15 Aku datai kitu deka madahka pasal pekara tu ngagai tuan raja, laban bisi orang ngenakutka aku. Nyadi, aku berunding: ‘Aku deka bejaku enggau raja. Ni nemu iya deka ngereja utai ke dipinta aku.
16 Raja engka deka mendingka aku lalu nyelamatka aku, laban bisi orang deka nagang aku enggau anak aku ari bulih pesaka ke diberi Petara ngagai kami.’
17 Udah nya, aku berunding: ‘Arapka jaku tuan raja ngelantangka ati aku,’ laban tuan raja baka melikat Petara ti bendar, ke nemu utai ti manah enggau utai ti jai. Arapka Jehovah, Petara nuan, bisi enggau nuan.”
18 Ku raja nya madah: “Enti aku nanya nuan, anang ngelalaika utai ari aku.” Ku indu nya nyaut: “Au, tuan raja.”
19 Raja pan nanya iya: “Kati Joap ke ngasuh nuan ngereja semua utai tu?” Ku indu nya nyaut: “O tuan raja, aku besumpah atas nama nuan,* amat utai ku nuan nya. Joap meh ke ngasuh aku ngereja semua utai tu, lalu madahka semua utai tu ngagai nuan.
20 Joap ngereja tu laban iya deka nuan beratika pekara tu nengah chara bukai, tang nuan bisi penemu-dalam baka melikat Petara ti bendar, lalu nemu semua utai ke nyadi ba menua tu.”
21 Udah nya, raja madah ngagai Joap: “Au, aku deka ngereja nya. Alai meh, bai pulai kitu anak aku, Absalom.”
22 Joap pan nyungkurka diri lalu muji raja. Ku Joap: “O tuan raja, seharitu aku nemu nuan udah lantang ati enggau aku, laban nuan deka ngereja utai ke dipinta aku.”
23 Joap lalu mupuk ngagai Gesur, lalu mai Absalom pulai ngagai Jerusalem.
24 Tang, raja madahka: “Asuh iya pulai ngagai rumah iya empu, tang iya enda tau betemu enggau aku.” Nya alai, Absalom pan pulai ngagai rumah iya empu lalu enda betemu enggau raja.
25 Ba serata Israel, nadai orang ke balat agi dipuji ari Absalom ketegal penyigat gamal iya. Ari tapa kaki sampai punjung pala iya, iya nadai pengurang.
26 Tiap ujung taun, iya patut nyukur buk iya laban buk iya nyau kelalu berat. Pemerat buk iya kira-kira dua kilogram,* nitihka timbang berat diraja.*
27 Absalom bisi tiga iku anak lelaki enggau siku anak indu. Anak indu iya benama Tamar. Tamar nya indu ti amat bajik.
28 Absalom diau ba Jerusalem pengelama dua taun. Tang, iya nadai kala betemu enggau raja.
29 Nyadi, Absalom ngangauka Joap ngambika mai iya betemu enggau raja, tang Joap enggai datai. Udah nya, iya ngangauka Joap baru, tang agi ga Joap enggai datai.
30 Pengujung iya, Absalom madah ngagai orang gaji iya: “Ladang Joap bisi ba sepiak ladang aku, lalu iya bisi nanam barli ba dia. Alai, tunu ladang iya.” Nya alai, orang gaji Absalom pan ngereja nya.
31 Ketegal nya, Joap mansang ngagai rumah Absalom lalu nanya iya: “Nama kebuah orang gaji nuan nunu ladang aku?”
32 Absalom nyaut Joap: “Aku udah ngasuh nuan betemu enggau raja lalu madahka pesan tu: ‘Nama kebuah aku ba ditu? Manah agi aku diau ba Gesur. Awakka aku betemu enggau nuan, raja. Enti aku salah, awakka nuan empu munuh aku.’”
33 Nya alai, Joap pan mansang ngagai raja lalu madahka pesan nya ngagai iya. Udah nya, raja ngangauka Absalom. Lebuh Absalom betemu enggau raja, iya nyungkurka diri, lalu raja nyium iya.
Nota Kaki
^ Tauka “ke nagih utang darah.”
^ Tauka “atas nama nuan ti idup.”
^ Jaku Asal, “200 shekel.” Peda Rujukan B14.
^ Engka timbang berat ke biasa dikena ba istana tauka ke enda sama enggau timbang berat ke biasa dikena orang.
