2 Samuel 17:1-29
17 Udah nya, Ahitopel madah ngagai Absalom: “Awakka aku milih 12,000 iku orang begagaika David malam tu.
2 Aku deka nyerang iya lebuh iya lelak sereta lemi. Aku deka ngasuh iya kesal, lalu semua orang ke enggau iya deka rari. Udah nya, aku deka munuh iya aja.
3 Aku deka mai semua orang pulai ngagai nuan. Enti lelaki ke digiga nuan nya mati, semua bala iya deka pulai ngagai nuan, lalu semua orang deka idup likun.”
4 Absalom enggau semua tuai orang Israel rinduka jaku lalau ke dipadahka Ahitopel nya.
5 Tang Absalom madahka: “Kangauka Husai, orang Arki nya. Aram kitai ninga runding iya.”
6 Nya alai, Husai pan datai betemu enggau Absalom. Absalom lalu madah ngagai iya: “Tu jaku lalau Ahitopel. Patut kitai nitihka jaku lalau iya? Enti enda, padahka utai ke patut digaga kitai.”
7 Ku Husai nyaut Absalom: “Jaku lalau ke diberi Ahitopel ngagai kitai kali tu, enda manah.”
8 Ku Husai nampung: “Nuan empu nemu, apai nuan enggau bala iya orang ke kering. Sida benung ringat baka indai beruang ke udah lenyau anak ba padang. Apai nuan mega siku pahlawan. Nyadi, tentu iya enda tinduk begulai enggau orang maya malam hari.
9 Diatu, engka iya benung belalai ba gua* tauka ba endur bukai. Enti iya dulu agi nyerang, orang ke ninga pasal nya tentu deka madah: ‘Sida ke nitihka Absalom udah alah!’
10 Indah, orang ke berani baka singa deh deka getar-getar takut, laban semua orang Israel nemu apai nuan orang ke kering, lalu bala ke enggau iya orang ke berani.
11 Tu jaku lalau aku: Gempuruka semua orang Israel ari Dan nyentuk ngagai Beer-sheba, sampai penyampau sida mayuh baka pasir ba tebing tasik, lalu nuan mesti nguluka sida beperang.
12 Enda ngira dini alai kitai tetemuka David, kitai deka nyerang iya baka ambun ke labuh ke tanah. Semua sida enda ulih selamat, enda ngira David tauka bala iya.
13 Enti David nyurutka diri ngagai kuta, semua orang Israel deka nanchang kuta nya ngena tali lalu narit kuta nya ngagai lebak, nyentukka nadai sigi pan batu tinggal.”
14 Udah nya, Absalom enggau semua tuai orang Israel madahka: “Manah agi jaku lalau Husai ari jaku lalau Ahitopel.” Jehovah udah ngasuh sida enda nerima jaku lalau ti manah ari Ahitopel nya, ngambika Jehovah ulih mai penusah ngagai Absalom.
15 Udah nya, Husai madah ngagai Imam Sadok enggau Imam Abiatar: “Tu jaku lalau Ahitopel ngagai Absalom enggau semua tuai orang Israel, lalu tu jaku lalau aku ngagai sida.
16 Jampat padahka tu ngagai David lalu beri amaran ngagai iya: ‘Malam tu, anang bemalam ba endur alai orang suah meraka sungai* ba menua puang. Kita mesti meraka sungai, ngambika nuan enggau semua bala nuan enda dibunuh.’”
17 Jonatan enggau Ahimas ba luar kuta, iya nya ba En-rogel, laban seduai iya enggai dipeda orang. Nya alai, siku ulun indu datai lalu madahka seduai iya pasal semua utai. Seduai iya pan mupuk deka madahka nya ngagai Raja David.
18 Tang, bisi siku lelaki ke biak meda seduai iya, lalu madahka utai nya ngagai Absalom. Seduai iya pan jampat-jampat mupuk, lalu datai ba rumah siku lelaki ke bisi telaga ba laman rumah iya ba Bahurim. Seduai iya lalu tama ke dalam telaga nya.
19 Udah nya, bini lelaki nya nutup telaga nya, lalu ngengkahka bijirin ke udah ditutuk ba atas penutup telaga nya. Nadai orang nemu pasal utai ke nyadi.
20 Bala ulun Absalom datai ngagai rumah indu nya lalu nanya iya: “Ni Jonatan enggau Ahimas?” Ku indu nya nyaut: “Udah mupuk ke sungai kin seduai iya.” Nyadi, bala ulun Absalom pan ngiga seduai iya, tang nadai tetemuka seduai iya. Udah nya, sida pulai ke Jerusalem.
21 Pengudah bala ulun Absalom mupuk, Ahimas enggau Jonatan pan pansut ari telaga. Seduai iya mansang ngagai David lalu madahka iya pasal jaku lalau Ahitopel ngagai Absalom. Ku seduai iya madah ngagai David: “Jampat! Nuan mesti meraka sungai.”
22 David enggau semua orang ke enggau iya pan beguai-guai meraka Sungai Jordan. Semua orang meraka sungai nya sebedau hari tawas.
23 Pengudah Ahitopel nemu nadai orang nitihka jaku lalau iya, iya pan nyediaka keledai iya lalu mupuk ngagai rumah iya ba menua asal iya. Pengudah iya ngatur utai ke bekaul enggau ruang bilik iya, iya lalu ngantung diri. Iya mati lalu dikuburka ba kubur aki ini iya.
24 Maya nya, David mupuk ngagai Mahanaim, lalu Absalom enggau semua orang Israel ke enggau iya meraka Sungai Jordan.
25 Absalom ngelantik Amasa nyadi ketuai soldadu kena nganti Joap. (Apai Amasa nya orang Israel ke benama Yitra. Indai Amasa nya Abigail anak Nahas, iya nya adik Seruyah. Seruyah nya indai Joap.)
26 Orang Israel enggau Absalom nirika kem ba Gilead.
27 Lebuh David datai ba Mahanaim, Sobi anak Nahas ari Rabah (kuta orang Amon), Makir anak Amil ari Lo-debar, enggau Barsilai, iya nya orang Gilead ari Rogelim, pan datai ngambat iya.
28 Sida mai tikai, bisin, periuk tanah, gandum, barli, tepung, bijirin ke udah dipanggang, dua jenis kachang, bijirin ke udah dirangkaika,
29 madu, mentega, bedus, enggau keju.* Sida mai semua nya ke diempa David enggau orang ke enggau iya. Ku sida madah: “Semua orang ke ba menua puang tentu lelak, lapar, sereta aus.”
