2 Samuel 20:1-26
20 Bisi siku lelaki Benjamin ke benama Sheba anak Bikri. Iya orang ke rindu ngelaban. Iya nyepu terumpit* lalu madahka: “Kitai nadai kaul enggau David, lalu kitai nadai pesaka ari anak Jesi. O orang Israel, pulai meh ngagai petara-petara* kita.”
2 Semua orang Israel ninggalka David, lalu nitihka Sheba anak Bikri. Tang, orang Judah agi nitihka raja sida, ari Sungai Jordan nyentuk ngagai Jerusalem.
3 Lebuh David datai ba istana iya ba Jerusalem, iya ngambi 10 iku gundik iya ke udah diasuh iya nyaga istana, lalu mai sida ngagai siti rumah ke bisi jejaga. Iya nyediaka pemakai ke sida, tang iya nadai agi tinduk* enggau sida. Sida diau dia nyentukka sida mati. Pengidup sida baka indu ke balu, taja pan laki sida agi idup.
4 Ku raja bejaku ngagai Amasa: “Aku meri nuan timpuh tiga hari kena ngempuruka orang Judah ngagai aku, lalu nuan mega mesti datai kitu.”
5 Amasa pan ngempuruka orang Judah, tang iya datai laun agi ari maya ke udah ditetapka raja.
6 Udah nya, David madah ngagai Abisai: “Sheba anak Bikri bahaya agi ari Absalom. Nyadi, bai bala soldadu aku lalu gagai iya, enggaika iya datai ba kuta ke bisi dinding ti teguh lalu ngelepaska diri ari kitai.”
7 Nya alai, bala soldadu ke enggau Joap, orang Kereti, orang Peleti, enggau semua pahlawan ti kering pan mupuk ari Jerusalem, lalu begagaika Sheba anak Bikri.
8 Lebuh sida datai semak batu ti besai ba Gibeon, Amasa datai betemu enggau sida. Maya nya, Joap ngena baju perang iya. Iya udah nangkin pedang, lalu pedang nya ba dalam sarung. Lebuh iya nyingkang, pedang nya lalu labuh.
9 Ku Joap madah ngagai Amasa: “Nama berita nuan, menyadi?” Udah nya, Joap megai ragum Amasa ngena jari kanan iya, baka ke ka nyium iya.
10 Amasa nadai meda Joap benung megai pedang. Joap ngerejang perut Amasa nyentukka gelung perut Amasa pansut labuh ke tanah. Joap enda ibuh ngerejang iya baru, laban sekali aja udah chukup kena munuh iya. Udah nya, Joap enggau abang iya, Abisai, begagaika Sheba anak Bikri.
11 Siku lelaki ke biak ari bala Joap, ke bediri ba sepiak Amasa, madahka: “Sapa-sapa ke nyukung Joap enggau David, titihka Joap!”
12 Maya nya, Amasa garing-garing dibalut darah ba tengah jalai. Lebuh lelaki ke biak nya meda semua orang ngetu ba dia, iya lalu mindahka Amasa ngagai tisi jalai. Udah nya, iya mungkur Amasa ngena gari. Iya ngereja nya laban iya meda semua orang deka ngetu lebuh meda Amasa.
13 Pengudah lelaki nya mindahka Amasa ari jalai, semua orang ke nitihka Joap pan begagaika Sheba anak Bikri.
14 Sheba mansa kawasan semua raban bansa Israel, lalu nuju ngagai Abel-bet-maakah. Udah nya, orang Bikri begelumu lalu nitihka Sheba ngagai endur nya.
15 Joap enggau bala soldadu iya* datai lalu ngelulung Abel-bet-maakah, laban Sheba bisi ba kuta nya. Sida ngaga tugung tanah ba luar kuta nya, laban kuta nya dikelingi benteng. Udah nya, sida numbak tanah ba baruh dinding kuta nya, ngambika dinding nya runtuh.
16 Siku indu ke pintar lalu ngangau ari kuta nya: “Dinga kita! Asuh Joap datai kitu. Aku deka bejaku enggau iya.”
17 Joap pan datai ngagai indu nya. Ku indu nya bejaku: “Nuan tu Joap?” Ku Joap nyaut: “Aku meh tu.” Udah nya, indu nya madahka: “Dingaka jaku aku.” Joap lalu nyaut: “Au, aku ningaka nuan.”
18 Ku indu nya bejaku: “Suba orang selalu madah: ‘Alai minta jaku lalau ba kuta Abel,’ lalu penanggul deka diputarka.
19 Aku ngarika orang Israel ke setia sereta ke rinduka pengelantang. Nuan deka nganchurka kuta ke penting ba Israel. Nama kebuah nuan deka muai pesaka Jehovah?”
20 Ku Joap nyaut: “Nadai aku deka muai tauka nganchurka kuta tu.
21 Ukai baka nya. Kebendar iya, bisi siku lelaki ke benama Sheba anak Bikri, ari kawasan ke begunung ba Efraim, udah ngelaban Raja David. Enti nuan nyerahka lelaki nya ngagai aku, aku deka mupuk ari kuta tu.” Udah nya, indu nya madah ngagai Joap: “Kami deka nikauka pala iya ke luar dinding kuta ngagai nuan.”
22 Indu nya terus betemu enggau semua orang ba kuta nya. Sida mumpung pala Sheba anak Bikri, lalu nikauka pala iya ngagai Joap. Udah nya, Joap nyepu terumpit, lalu semua soldadu iya mupuk ari kuta nya. Sida pulai ngagai rumah sida empu, lalu Joap pulai ngagai Jerusalem deka betemu enggau raja.
23 Joap nyadi ketuai semua soldadu Israel, lalu Benayah anak Jehoyada nyadi ketuai orang Kereti enggau orang Peleti.
24 Adoram betanggungjawap ngemataka orang ke wajib gawa ke raja. Jehosapat anak Ahilut nyadi orang ke nulis rekod.
25 Sheva nyadi sekretari. Sadok enggau Abiatar nyadi imam.
26 Lalu Ira ari Jair nyadi ketuai menteri* David.
Nota Kaki
^ Jaku Asal, “tanduk.”
^ Tauka engka, “langkau kain.”
^ Iya nya, ngereja pengawa seks.
^ Jaku Asal, “Sida.”
^ Jaku Asal, “nyadi imam.”
