2 Samuel 24:1-25
24 Sekali agi, Jehovah ringat ngagai orang Israel lebuh bisi orang ngasut David munyi tu: “Alai, itung penyampau orang Israel enggau orang Judah.”
2 Nyadi, raja pan madah ngagai Joap, iya nya ketuai soldadu ke bisi enggau iya: “Alai nuan bejalai ngagai semua raban bansa Israel, ari Dan ngagai Beer-sheba. Gaga banci ngambika aku nemu penyampau rayat aku.”
3 Tang Joap madah ngagai raja: “Awakka Jehovah, Petara nuan, ngasuh rayat nuan nambah 100 kali lipat, lalu awakka nuan empu ke meda nya. Tang, nama kebuah nuan deka ngereja tu?”
4 Taja pia, raja tetap enggai ngubah pemutus iya. Nyadi, Joap enggau bala ketuai soldadu pan mupuk ari raja, lalu ngaga banci kena ngitung orang Israel.
5 Sida meraka Sungai Jordan lalu nirika kem ba Aroer, iya nya ba sepiak kanan* kuta ke bisi ba tengah-tengah lebak.* Udah nya, sida mupuk ngagai kawasan orang Gat lalu ngagai Jaser.
6 Udah nya, sida mansang ngagai Gilead lalu ngagai menua Tahtim-hodshi. Sida neruska pejalai sida ngagai Dan-jaan lalu belok ngagai Sidon.
7 Udah nya, sida mupuk ngagai kubu Tirus enggau ngagai semua kuta orang Ibi sereta kuta orang Kanaan. Pengujung iya, sida datai ba Beer-sheba ke ba Negeb, iya nya ba kawasan Judah.
8 Pengudah sida bejalai ngelingi serata menua Israel pengelama 9 bulan 20 hari, sida pan pulai baru ngagai Jerusalem.
9 Joap lalu madah ngagai raja pasal penyampau orang ke direjista ba dalam banci. Bisi 800,000 iku pahlawan Israel ke mai pedang sereta bisi 500,000 iku orang Judah.
10 Tang, David berasai besalah* laban iya udah ngaga banci. Udah nya, David madah ngagai Jehovah: “Aku udah ngereja dosa ti besai, laban ngereja utai tu. O Jehovah, ampunka meh penyalah nembiak Nuan tu, laban aku udah ngereja utai ti amat beli.”
11 Maya pagi hari, lebuh David dani, jaku Jehovah datai ba Nabi Gat, iya nya orang ke ulih meda utai ke dipandangka Petara dalam runding iya. Ku Petara bejaku:
12 “Mupuk nuan, lalu padahka tu ngagai David: ‘Tu meh utai ke dipadahka Jehovah: “Aku meri nuan tiga iti pilihan. Pilih siti, ni ke patut digaga Aku ke nuan.”’”
13 Gat pan betemu enggau David lalu madah ngagai iya: “Kati nuan ka lapar pungkang nyadi ba menua nuan pengelama tujuh taun? Tauka kati nuan ka ngerarika diri ari bala munsuh pengelama tiga bulan? Tauka kati nuan ka penyakit berampit nyadi ba menua nuan pengelama tiga hari? Perundingka enggau manah saut nuan, lalu aku deka madahka saut nuan ngagai Iya ke udah nganjung aku.”
14 David lalu nyaut Gat: “Tu tusah amat ba aku. Aku minta, awakka kami labuh ba jari Jehovah laban pengasih Iya amat besai. Anang nejuka aku labuh ba jari mensia.”
15 Udah nya, Jehovah ngasuh penyakit berampit ninggang Israel, kenyau ari pagi nyentuk ngagai maya ke udah ditetapka Iya. Ketegal nya, bisi 70,000 iku orang mati ari Dan sampai ngagai Beer-sheba.
16 Lebuh melikat ngunjurka jari iya ngagai Jerusalem laban deka nganchurka kuta nya, Jehovah nesal* laban udah ngenataika penyakit berampit nya. Ku Iya madah ngagai melikat nya: “Umbas nya! Turunka jari nuan.” Maya nya, melikat Jehovah enda jauh ari endur alai ngindik utai ke diketau, ke enggi siku orang Jebus ke benama Araunah.
17 Lebuh David meda melikat benung munuh orang, iya madah ngagai Jehovah: “Aku meh ke bedosa. Aku meh ke salah. Tang sida* tu, nama penyalah ke udah digaga sida? O Petara, awakka jari Nuan ngukum aku enggau ruang bilik apai aku.”
18 Ba hari nya, Gat betemu enggau David lalu madah ngagai iya: “Alai nuan mansang ngagai endur alai ngindik utai ke diketau enggi siku orang Jebus, ke benama Araunah. Gaga siti alta* ke Jehovah ba dia.”
19 David pan mansang ngagai endur nya, nitihka utai ke dipadahka Jehovah nengah Gat.
20 Lebuh Araunah malik ke baruh lalu meda raja enggau bala pegawai iya datai, iya pan jampat-jampat pansut lalu besugang ngagai raja.
21 Ku Araunah nanya: “Nama kebuah tuan raja datai kitu?” Ku David nyaut: “Aku deka meli endur alai ngindik utai ke diketau tu ari nuan, laban aku deka ngaga siti alta ke Jehovah ba ditu, ngambika penulah ke ninggang rayat ulih ngetu.”
22 Tang, Araunah madah ngagai David: “Ambi aja meh endur tu tuan raja, lalu serahka nama-nama aja pemeri ti manah ba mata nuan. Tu sapi ke pemeri tunu. Nuan ulih ngena papan ke dikena ngindik utai ke diketau sereta perengka ke dipasang ba sapi nyadika kayu api.
23 O tuan raja, semua utai tu diberi aku ngagai nuan magang.” Ku iya agi: “Awakka Petara nuan, Jehovah, lantang ati enggau nuan, tuan raja.”
24 Tang, raja madah ngagai Araunah: “Enda, aku mesti meli nya ari nuan. Aku enda nyerahka pemeri tunu ngagai Petara aku, Jehovah, enti pemeri nya pechuma.” Nya alai, David mayar 50 shekel* pirak kena meli endur nya enggau sapi nya.
25 David pan ngaga siti alta ke Jehovah. Iya nyerahka pemeri tunu enggau pemeri bebaik ba dia. Udah nya, Jehovah ningaka peminta David ngarika orang Israel, lalu penulah nya pan ngetu.
Nota Kaki
^ Tauka “ba selatan.”
^ Tauka “wadi.”
^ Tauka “ati David nyalahka David.”
^ Tauka “tusah ati.”
^ Jaku Asal, “bedus.”
^ Peda Penerang Leka Jaku.
^ Peda Rujukan B14.
