2 Samuel 3:1-39
3 Ruang bilik Saul enggau ruang bilik David majak beperang ngelaban pangan diri. Ruang bilik David majak kering, tang ruang bilik Saul majak lemi.
2 Maya nya, David bisi beberapa iku anak lelaki ba Hebron. Anak iya ke tuai benama Amnon, ke diadaka Ahinoam ari Jesril.
3 Anak iya ti kedua benama Chileap, ke diadaka Abigail, iya nya balu Nabal ari Karmel. Anak iya ti ketiga benama Absalom, ke diadaka Maakah, iya nya anak indu Raja Talmai ari Gesur.
4 Anak iya ti keempat benama Adonijah, ke diadaka Hagit, lalu anak iya ti kelima benama Sepatiah, ke diadaka Abital.
5 Anak iya ti keenam benama Itrim, ke diadaka Eglah. Nya meh semua anak David ke ada ba Hebron.
6 Sepemanjai timpuh ruang bilik Saul enggau ruang bilik David beperang, Abner bebendar ngulihka mayuh agi kuasa ba ruang bilik Saul.
7 Saul bisi siku gundik ke benama Rizpah, iya nya anak indu Aiah. Bisi sekali, Is-boset nanya Abner: “Nama kebuah nuan tinduk* enggau gundik apai aku?”
8 Abner balat amat ringat ninga utai ke disebut Is-boset nya. Ku iya madah: “Kati aku tu ukui orang Judah ke nadai guna? Ngelama tu, aku ngayanka pengerindu ti setia ngagai ruang bilik apai nuan, Saul, ngagai bala menyadi iya, enggau bala kaban iya, lalu aku mega nadai kala nyerahka nuan ngagai David. Tang, nama kebuah seharitu nuan nuduh aku ngereja utai ti salah enggau siku indu?
9 Awakka Petara ngukum aku enggau balat, enti aku enda ngereja utai ti sejalai enggau semaya Jehovah ngagai David.
10 Petara besemaya deka mindahka kuasa merintah Saul enggau peturun iya ngagai David. David deka merintah Israel enggau Judah, ari Dan ngagai Beer-sheba.”
11 Is-boset enda ulih tesautka Abner laban iya takutka Abner.
12 Abner tekala nya lalu nganjung orang ngirumka pesan tu ngagai David: “Sapa empu menua tu?” Ku iya nampung: “Gaga meh sempekat enggau aku, lalu aku deka ngereja nama-nama utai ke ulih aku, ngambika semua orang Israel nyukung nuan.”
13 Ku David nyaut: “Manah nya. Aku deka ngaga siti sempekat enggau nuan. Tang, aku bisi siti aja peminta. Anang nguji betemu enggau aku enti nuan enda mai Mikal, anak indu Saul, lebuh nuan datai kitu.”
14 Udah nya, David ngirumka pesan tu ngagai anak Saul, Is-boset: “Beri ngagai aku bini aku, Mikal. Aku udah mayar 100 iti kulit tutus orang Pilistin ngambika ulih kawin enggau iya.”
15 Nya alai, Is-boset ngasuh orang ngambi Mikal ari laki iya, Paltiel anak Lais.
16 Laki Mikal bejalai nitihka Mikal sambil nyabak, sampai sida datai ba Bahurim. Udah nya, Abner madah ngagai laki Mikal: “Pulai nuan.” Laki Mikal pan pulai.
17 Abner ngirumka pesan tu ngagai bala tuai orang Israel: “Kita udah lama deka David nyadi raja kita.
18 Tu meh maya kita ngaga iya nyadi raja kita, laban Jehovah udah madah ngagai David: ‘Nengah nembiak Aku, David, Aku deka nyelamatka bala nembiak Aku, Israel, ari orang Pilistin enggau ari semua munsuh sida.’”
19 Udah nya, Abner bejaku enggau orang Benjamin. Abner mega bejaku enggau David kediri ba Hebron, lalu madahka iya pasal pemutus orang Israel enggau semua orang Benjamin.
20 Lebuh Abner enggau 20 iku orang datai ngagai David ba Hebron, David lalu nyediaka pengerami makai besai ke sida.
21 Udah nya, Abner madah ngagai David: “Awakka aku mupuk lalu ngempuruka semua orang Israel ke nuan, tuan raja, ngambika sida ngaga sempekat enggau nuan, lalu nuan deka nyadi raja ke semua orang Israel baka ke dikedekaka nuan.” Nya alai, David nejuka Abner pulai, lalu Abner pan mupuk enggau selamat.
22 Enda lama udah nya, Joap enggau soldadu David pan pulai pengudah nyerang munsuh. Mayuh amat utai ke dirampas dibai sida pulai. Maya nya, Abner nadai agi enggau David ba Hebron, laban David udah nejuka iya pulai enggau selamat.
23 Lebuh Joap enggau semua soldadu ke enggau iya datai, bisi orang madah ngagai Joap: “Abner anak Ner bisi datai ngagai raja, lalu raja nejuka iya pulai enggau selamat.”
24 Nyadi, Joap pan betemu enggau raja lalu madah: “Nama kebuah nuan baka nya? Abner udah datai ngagai nuan, tang nama kebuah nuan ngelepaska iya pia aja?
25 Ukai nuan enda nemu sapa iya. Iya datai kitu deka nipu nuan. Iya ka nemu semua utai ke digaga nuan sereta kini ke tunga pejalai nuan.”
26 Nyadi, Joap pan ninggalka David lalu ngasuh orang betemu enggau Abner. Sida mai Abner pulai ari telaga ba Sirah. Tang, David enda nemu nama-nama utai pasal nya.
27 Lebuh Abner datai ba Hebron, Joap mai iya ngagai pintu penama kuta laban deka bejaku enggau iya kediri. Tang, ba dia iya ngerejang perut Abner, lalu Abner pan mati. Nya ketegal Abner udah munuh menyadi iya, Asahel.
28 Pengudah David ninga pasal nya, iya madah: “Jehovah nemu pemati Abner anak Ner endang ukai salah aku enggau perintah aku.
29 Awakka Joap enggau semua ruang bilik apai iya betanggungjawapka utai nya. Awakka ruang bilik Joap seruran bisi lelaki ke mansutka lendir ari perengka seks iya, lelaki ke bisi penyakit kulit ti balat,* lelaki ke mintal ubung,* lelaki ke mati laban pedang, tauka lelaki ke enda chukup pemakai.”
30 Baka nya meh chara Joap enggau Abisai munuh Abner, laban Abner udah munuh menyadi seduai iya, Asahel, maya beperang ba Gibeon.
31 Udah nya, David bejaku ngagai Joap enggau semua orang ke enggau iya: “Charikka gari kita. Pasukka kain guni lalu nyabakka Abner.” Raja David empu bejalai ba belakang peninduk ke dikena mai bangkai Abner.
32 Sida pan nguburka Abner ba Hebron. Raja nyabak enggau inggar ba kubur Abner, lalu semua orang bukai mega sama nyabak enggau iya.
33 Raja nyabakka Abner nengah lagu tu:
“Patut Abner mati baka orang ke beli?
34 Jari nuan enda ditanchang,Lalu kaki nuan enda dirantai.*
Nuan rebah baka orang ke dibunuh orang jai.”
Semua orang pan nyabakka Abner baru.
35 Udah nya, maya hari agi siang, semua orang datai ngagai David lalu meri iya roti kena ngelantangka ati iya. Tang, David besumpah: “Enti aku makai roti tu tauka nama-nama utai sebedau mata panas padam, awakka Petara ngukum aku enggau balat!”
36 Semua orang meda utai ke nyadi, lalu nya ngerinduka ati sida. Semua utai ke dikereja raja ngerinduka ati semua orang.
37 Ba hari nya, semua orang Judah enggau semua orang Israel nemu, pemati Abner anak Ner ukai salah raja.
38 Udah nya, raja bejaku ngagai bala pegawai iya: “Baka ke ditemu kita, siku ketuai ti kering udah rebah ba Israel seharitu.
39 Seharitu, aku lemi taja pan aku ditata nyadi raja. Ba aku, chukup jai bala anak lelaki Seruyah. Awakka Jehovah malas orang ke jai nitihka penyai sida.”
Nota Kaki
^ Iya nya, ngereja pengawa seks.
^ Tauka “sakit lan; kusta.”
^ Engka merujuk ngagai lelaki ke lumpuh tauka enda ulih bejalai, lalu semina ulih ngereja pengawa orang indu.
^ Tauka “dirantai ngena temaga.”
