2 Samuel 9:1-13
-
Pengerindu David ti setia ngagai Mepiboset (1-13)
9 Udah nya, David nanya: “Kati bisi sapa-sapa ari ruang bilik Saul ke agi idup? Aku deka ngayanka pengerindu ti setia ngagai orang nya, baka ke disemayaka aku ngagai Jonatan.”
2 Maya nya, ruang bilik Saul bisi siku ulun ke benama Siba. Nyadi, iya diasuh datai ngagai David, lalu David nanya iya: “Nuan tu Siba?” Ku iya nyaut: “Au, tuan.”
3 Ku raja nanya baru: “Kati bisi sapa-sapa ari ruang bilik Saul ke agi idup? Aku deka ngayanka pengerindu ti setia ngagai orang nya, baka pengerindu ti setia ke diayanka Petara.” Ku Siba nyaut: “Bisi, tuan. Jonatan bisi siku anak lelaki. Kedua piak kaki iya tachat.”
4 Ku raja nanya iya: “Ba dini iya?” Siba nyaut: “Iya ba rumah Makir anak Amil, ba Lo-debar.”
5 Raja David pan terus ngasuh orang ngambi iya ba rumah Makir anak Amil, ba Lo-debar.
6 Lebuh Mepiboset anak Jonatan, iya nya uchu Saul, datai ngagai David, iya pan terus besugang. Udah nya, David madahka: “Mepiboset!” Ku iya nyaut: “Aku meh tu, tuan.”
7 David pan madah ngagai iya: “Anang takut, laban aku tentu deka ngayanka pengerindu ti setia ngagai nuan, baka ke udah disemayaka aku ngagai apai nuan, Jonatan. Aku deka mulaika semua tanah aki nuan, Saul, ngagai nuan. Nuan deka seruran makai ba mija aku.”
8 Mepiboset pan besugang lalu madahka: “Sapa meh aku tu, ke baka bangkai ukui, nyentukka nuan ngelayan aku enggau manah amat?”
9 Udah nya, raja ngasuh Siba, iya nya ulun Saul, datai. David madah ngagai iya: “Semua utai ke enggi tuan nuan, Saul, enggau semua rumah iya deka diberi aku ngagai uchu iya.
10 Nuan, bala anak nuan, enggau bala ulun nuan deka ngintu tanah iya. Nuan deka ngetau asil ari tanah nya, ngambika ruang bilik iya bisi pemakai. Tang, Mepiboset deka seruran makai ba mija aku.”
Siba bisi 15 iku anak lelaki enggau 20 iku ulun.
11 Udah nya, Siba madah ngagai raja: “Aku deka ngereja semua utai ke diasuh nuan, tuan.” Nyadi, Mepiboset makai ba mija David baka anak raja.
12 Mepiboset bisi siku anak lelaki ke agi biak, ke benama Mika. Semua orang ke diau ba rumah Siba nyadi ulun Mepiboset.
13 Nyadi, Mepiboset ke tachat kedua piak kaki diau ba Jerusalem, lalu iya seruran makai ba mija raja.
